- ટામેટાનું બજાર આવ્યું તળિયે
- ટામેટાએ ખેડૂતોને રડાવ્યા રાતા પાણીએ
- 200 રૂપિયાથી ભાવ ઘટીને પહોંચ્યો 2 રૂપિયાએ
ખેડૂત અનાજ પકવે, શાકભાજી પકવે, એ માલ બજારમાં આવે, આપણે ખરીદીએ અને સરવાળે આપણા ઘરનો ચૂલો સળગે. આપણે એવું ચોક્કસ કહી શકીએ કે આપણા ઘરનો ચૂલો સળગે છે અને આપણા પેટની આગ ઠરે છે તેની પાછળ અન્નદાતાની મહેનત જવાબદાર છે. દુખની વાત એ છે કે ખેડૂત મહેનત કરે છે, પરસેવો પાડે છે પણ જ્યારે ખેડૂતની મહેનતના વળતરનો સમય આવે છે ત્યારે પરિસ્થિતિ તદ્દન વિપરીત બને છે. ગુજરાતમાં ટામેટા પકવતા ખેડૂતો સાથે પણ આવું જ થયું. દોઢ થી બે મહિના પહેલા ટામેટાના ભાવ આસમાને આંબતા હતા, ગૃહિણીઓ પરેશાન હતી, લોકોના ખિસ્સા એકલા ટામેટા જ પળવારમાં ખાલી કરી નાંખતા હતા. આવા સમયે સારા ભાવ મળશે એવી આશાએ ખેડૂતોએ ટામેટાનું વાવેતર કર્યુ. હવે મોંઘવારી, મોંઘવારીની બૂમરાણ વચ્ચે સરકાર સામાન્ય માણસની પડખે તો ઉભી રહી અને નેપાળથી ટામેટા આયાત કરી લીધા, બીજી તરફ ટામેટાનો નવો પાક પણ સારો આવ્યો. હવે ટામેટાના ભાવ સામાન્ય માણસને પરવડે તેવા થઈ ગયા છે પરંતુ ખેડૂતની સ્થિતિ કફોડી થઈ ગઈ છે. જે ખેડૂતને ગત સિઝનમાં ટામેટાના મણના 200 થી 300 રૂપિયા મળતા હતા તે જ ખેડૂતને હવે ટામેટાના મણનો ભાવ 20 રૂપિયાથી વધીને 40 રૂપિયા સુધી જ મળે છે. એટલે પ્રતિ કિલોના હિસાબે જોઈએ તો સામાન્ય માણસ જે ટામેટા 20 રૂપિયા પ્રતિ કિલોએ ખરીદે તેના ખેડૂતને માત્ર 2 રૂપિયા જ મળે છે. પાયાનો પ્રશ્ન એટલો જ કે આટલી હદે વિષમતા કેમ ઉભી થાય છે.
ટામેટાના ભાવ તળિયે બેસ્યા
ટામેટા પકવતા ખેડૂતોની સ્થિતિ ખરાબ થઈ છે. ટામેટાના ભાવ તળિયે બેસી જતા ખેડૂતોને રડાવાનો વારો આવ્યો છે. ટામેટાના યાર્ડમાં ભાવ 2 રૂપિયે કિલો મળ્યા છે. ખેડૂતોને પડ્યા ઉપર પાટુ જેવી સ્થિતિ થઈ છે. ખેડૂતોએ 2 રૂપિયે કિલો ટામેટા યાર્ડમાં વેચવા પડે છે
ટામેટાએ ખેડૂતોને કેમ રડાવ્યા?
ટામેટા પકવતા ખેડૂતોની સ્થિતિ દોઢ મહિનાની અંદર બદલાઈ ગઈ છે. ખેડૂતોએ ટામેટાના ભાવની તેજી ધ્યાને લેતા ટામેટાનું ઉત્પાદન કર્યું છે. ખેડૂતોને રૂપિયા કમાવવાનો સમય આવ્યો ત્યારે ભાવ તળિયે બેસી ગયા. છેલ્લી સિઝનમાં ટામેટાનો 200 થી 300 રૂપિયા મણનો ભાવ હતો. અત્યારે સ્થિતિ એવી છે કે ખેડૂતોને ટામેટાના મણના 30 થી 50 રૂપિયા મળે છે. જો પ્રતિ કિલોની દ્રષ્ટિએ જોઈએ તો ખેડૂતોને ટામેટાના કિલોના 2 રૂપિયા મળે છે
ખર્ચ અને વળતરને મેળ કેમ બેસે?
ટામેટાની ખેતીનો ખર્ચ 1 લાખ રૂપિયા/વિઘા
મળતું વળતર 15 થી 20 હજાર રૂપિયા
ટામેટાનો બજાર ભાવ 20 રૂપિયા/ કિલો
ખેડૂતોને મળતો ભાવ 2 રૂપિયા/ કિલો
આ મુશ્કેલીનું સમાધાન શું?
વેપારીઓ બહારથી આવતા માલને પ્રાધાન્ય આપે છે. ટામેટા આયાત કરવામાં આવ્યા હોય તે પહેલા વેચવામાં આવે છે. ખેડૂતોને વેપારીઓ કહે છે કે તમારી ગાડી મુકી જાઓ. ખેડૂતો પાસે જ્યારે બિલ આવે ત્યારે ખ્યાલ આવે કે કેટલો ભાવ મળ્યો. નાછૂટકે ખેડૂતો જે ભાવ આવે તે ભાવે પોતાનો માલ વેંચે છે. ઘણા કિસ્સામાં તો ખેડૂતોએ જે મજૂરી ચુકવવાની થાય તે મળતા ભાવથી વધુ હોય
ટામેટાના ભાવ કેમ ઘટ્યા?
દેશમાં હાલ પૂરની સ્થિતિ નથી, પાકને નુકસાન નથી. ટામેટાનો નવો પાક સારો આવ્યો છે અને નવો પાક સારો આવવાથી ભાવ નીચે આવ્યા છે. સરકારે નેપાળથી ટામેટાની આયાત કરી જેથી ટામેટાના ભાવ ઘટ્યા છે.
