બનાસકાંઠા / ઠંડી જોઈએ એવી પડતી નથી અને માવઠાની આગાહી... બટાકા પકવતા ખેડૂતોનું કેમ વધી ગયું ટેન્શન

• હવામાન વિભાગની આગાહીથી ખેડૂતો ચિંતિત
• 9 જાન્યુઆરીએ કમોસમી વરસાદની આગાહી
• બનાસકાંઠામાં માવઠાંથી નુકસાન થવાની સંભાવના

હવામાન વિભાગે આગામી 9 જાન્યુઆરીથી ઉત્તર ગુજરાતમાં કમોસમી વરસાદ થવાની આગાહી કરી છે. ત્યારે માવઠાંની આગાહીને લઈ બનાસકાંઠા જિલ્લાના ખેડૂતો ચિંતિત બન્યા છે. ડીસા પંથકમાં ખાતર, બિયારણ અને પિયત આપી તૈયાર કરેલા બટાટાના પાકમાં કમોસમી વરસાદ પડે તો ખેડૂતોને નુકસાન થાય તેમ છે. 

ડીસા પંથકમાં આટલું વાવેતર થયું
ડીસા પંથકમાં આ વર્ષે ખેડૂતોએ અંદાજે 64 હજાર હેક્ટર જમીનમાં બટાટાનું વાવેતર કર્યુ છે. બટાટાના વાવેતર સમયે નવેમ્બર મહિનામાં માવઠુ થતાં પાકના વિકાસ ઉપર અસર થઈ હતી. જ્યારે આ વર્ષે હજુ સુધી જોઈએ તેવી ઠંડી નહી પડતાં બટાટાના ઉત્પાદન ઉપર અસર થાય છે. તેવા સમયે કમોસમી વરસાદ થાય તો રહ્યો સહ્યો બટાટાનો પાક પણ નિષ્ફળ જવાની શક્યતા છે. તેના કારણે ખેડૂતો ઉપર ચિંતાના વાદળો ઘેરાયા છે. 

વાંચવા જેવું: ગુજરાતના ખેડૂતોના માથે છવાયા સંકટના વાદળ, રાજ્યમાં ફરી 3 દિવસ મેઘરાજા ત્રાટકશે, આ તારીખો ચિંતાજનક

કુદરતી આપત્તિઓથી ખેડૂતોને પારાવાર નુકસાન
આગાહી મુજબ વરસાદ થાય તો બટાટાના ઉત્પાદન પર માઠી અસર પડી શકે તેમ છે અને ખેડૂતોને લાખો અને કરોડો રૂપિયાનું નુકસાન વેઠવાનો વારો આવી શકે તેમ છે. બનાસકાંઠાના ખેડૂતો ઘણાં વર્ષોથી કુદરતી આપત્તિઓથી નુકસાની ભોગવી રહ્યા છે. ત્યારે હવે કમોસમી વરસાદ થાય તો બટાટા સહિતના કૃષિપાકોને ભારે નુકસાન થવાની શક્યતાએ ખેડૂતો ચિંતામાં મૂકાયા છે.