'અધિક' વરસે / આજે ફરી અમદાવાદ, બનાસકાંઠા સહિતના જિલ્લાઓમાં મેઘરાજા બોલાવશે ધડબડાટી, જુઓ શું કહે છે આગાહી

• ગુજરાતમાં 3 દિવસ વરસાદની આગાહી 
• હળવાથી મધ્યમ વરસાદની શક્યતા 
• આ વિસ્તારોમાં આજે વરસાદની આગાહી

ગુજરાતમાં વરસાદનું જોર ખાસ્સું એવું ઘટ્યું છે. ત્યારે હવામાન વિભાગે આગામી ત્રણ દિવસ હળવાથી મધ્યમ વરસાદની આગાહી કરી છે. રાજ્યમાં હવામાન વિભાગની આગાહી જોતાં આગામી 3 દિવસ હળવોથી મધ્યમ પ્રકારનો વરસાદ પડશે એટલે હજુ પણ લોકો વરસાદનો ધમાકેદાર ચોથો રાઉન્ડ શરૂ થયા તેની પહેલાં થોડીક નિરાંત અનુભવી શકશે.

3 દિવસ હળવાથી મધ્યમ વરસાદની આગાહી
સ્થાનિક હવામાન વિભાગની આગાહી મુજબ, ગુજરાતમાં આગામી 3 દિવસ  વરસાદી માહોલ યથાવત્ રહેશે. આજે બનાસકાંઠા, પાટણ, મહેસાણામાં વરસાદની આગાહી છે. આ સાથે જ આજે સાબરકાંઠા, અરવલ્લી, ખેડા, અમદાવાદ, આણંદ, વડોદરા અને પંચમહાલમાં વરસાદની સંભાવના છે. આજે દાહોદ, મહીસાગર અને છોટાઉદેપુરમાં હળવાથી મધ્યમ વરસાદની શક્યતા છે. 

સાયક્લોનિક સર્ક્યુલેશન બનશે
હવામાન વિભાગના જણાવ્યા અનુસાર, આગામી સમયમાં ઉત્તર ગુજરાત તરફ સાયક્લોનિક સ્ટક્યુલેશન બનશે. સર્ક્યુલેશની અસર સમગ્ર ગુજરાતમાં જોવા મળશે. ઓગસ્ટ અને સપ્ટેમ્બર  મહિનામાં સામાન્ય વરસાદ નોંધાશે.

અમદાવાદમાં પડશે વરસાદી ઝાપટાં
અમદાવાદની વાત કરીએ તો અમદાવાદમાં પણ વરસાદી ઝાપટાં જેવું વાતાવરણ રહેશે. તા.6 ઓગસ્ટ સુધી વરસાદી માહોલ રહેવાની સંભાવના છે. જોકે,  વરસાદી માહોલના કારણે શહેર સહિત રાજ્યભરમાં મચ્છરજન્ય અને પાણીજન્ય રોગચાળો વકર્યો છે. 

અમદાવાદમાં સિઝનનો 24.5 ઈંચ વરસાદ નોંધાયો
શહેરમાં ત્રીજા રાઉન્ડના વરસાદે હવે વિરામ લીધો છે. જોકે, વરસાદી માહોલ જળવાઈ રહ્યો હોઈ છૂટાછવાયા વિસ્તારમાં તેના ઝાપટાં પડી રહ્યા છે. જો એક વિસ્તારમાં ઝાપટું પડે તો તેની નજીકનો વિસ્તાર સાવ કોરોધાકોર હોય છે. જોકે, લોકોને હવે ભારે વરસાદ પડતો ન હોઈ ચોમાસાની તકલીફ ખાસ અડચણરૂપ બનતી નથી. શહેરમાં ચાલુ સિઝનનો 24.5 ઈંચ જેટલો વરસાદ પડી ચૂક્યો છે.