- કેન્દ્રીય મંત્રી નીતિન ગડકરીએ ભારતમાં કાર બનાવવાની ટેસ્લાને કરી ઓફર
- ટેસ્લા ભારતમાં આવીને કાર બનાવે, પણ ચીનમાં નહીં મોકલી શકે
- ટેસ્લા ભારતમાં ઈલેક્ટ્રીક કારની ફેક્ટરી સ્થાપે, તમામ સગવડો આપીશું-ગડકરી
આજકાલ દુનિયાના નંબર વન અમીર એલન મસ્ક ચર્ચામાં છે. એલન મસ્ક હવે ટ્વિટરના માલિક બન્યાં છે ત્યારે હવે સરકારે પણ ટેસ્લાના ચીફ એલન મસ્કને ભારતમાં આવીને કાર બનાવવાનું આમંત્રણ આપી દીધું છે.
કેન્દ્રીય મંત્રી નીતિન ગડકરીએ એલન મસ્કને આપી ઓફર
કેન્દ્રીય મંત્રી નીતિન ગડકરીએ વિશ્વના સૌથી અમીર એલન મસ્કને ભારતમાં આવીને ટેસ્લા કાર બનાવવાની ઓફર કરી છે.કેન્દ્રીય મંત્રી નીતિન ગડકરીએ મંગળવારે ફરી એકવાર ટ્વિટર ડીલ બાદ ટેસ્લાને ભારતમાં કાર બનાવવાની ઓફર કરી હતી. તેમણે રાયસીના ડાયલોગ પ્રોગ્રામ દરમિયાન કહ્યું કે જો એલોન મસ્ક ભારતમાં ટેસ્લા બનાવવા માગતા હોય તો અમને કોઈ વાંધો નથી, આપણી પાસે તમામ ક્ષમતાઓ છે, અમારી પાસે તમામ પ્રકારની ટેકનોલોજી છે, આ કારણોસર તેઓ ખર્ચ ઘટાડી શકે છે.
મેડ-ઇન-ચાઇના ટેસ્લા ભારતમાં ચાલશે નહીં
ગડકરીએ મસ્કને ભારત આવવાનું આમંત્રણ પણ આપ્યું હતું.તેમણે કહ્યું કે "મારી તેમને વિનંતી છે કે તેઓ ભારત આવે અને અહીં ઉત્પાદન શરૂ કરે. ભારત એક મોટું બજાર છે. અહીં બંદરો ઉપલબ્ધ છે. તેઓ ભારતમાંથી નિકાસ કરી શકે છે." જો કે, તે જ સમયે, તેમણે ફરીથી 'મેડ ઇન ચાઇના' ટેસ્લાના ભારતમાં પ્રવેશની સંભાવનાને નકારી કાઢી હતી. "તેમનું (મસ્ક) ભારતમાં સ્વાગત છે, પરંતુ માની લો કે તે ચીનમાં ઉત્પાદન કરવા માંગે છે અને તેને ભારતમાં વેચવા માંગે છે, તે ભારત માટે સારું નથી. અમારી વિનંતી છે કે તમે ભારતમાં આવો અને ભારતમાં ઉત્પાદન કરો."
ટેસ્લાની આ માંગને ફગાવી દેવાઈ છે
દુનિયાના સૌથી અમીર વ્યક્તિ એલન મસ્કની ઈલેક્ટ્રિક કાર કંપની ટેસ્લા લાંબા સમયથી ભારતીય બજારમાં એન્ટ્રીની તલાશમાં છે. કંપની આ માટે ભારત સરકાર પાસેથી ટેક્સમાં છૂટની માંગ કરી રહી છે. ભારત સરકારે ટેસ્લાની ટેક્સ બ્રેકની માંગને ઘણી વખત નકારી કાઢી છે અને સ્પષ્ટ કરી દીધું છે કે ટેક્સ છૂટછાટની માગ પૂરી શકાય તેવી નથી. મસ્કની કંપની ટેસ્લા ભારતમાં પોતાની કાર આયાત કરવા માંગે છે અને તેના માટે ટેક્સમાં છૂટની જરૂર છે. તો બીજી તરફ ભારત સરકાર સતત કહી રહી છે કે કંપની કાર આયાત કરવાને બદલે સ્થાનિક સ્તરે જ તેનું ઉત્પાદન કરે.
રેડીમેડ ઇલેક્ટ્રિક કાર પર છે આટલો ટેક્સ
મસ્કની કંપની ટેસ્લા હાલમાં અમેરિકા ઉપરાંત જર્મની અને ચીનમાં પણ પોતાની કારનું ઉત્પાદન કરે છે. કંપની ચીની ફેક્ટરીમાંથી એશિયન અને યુરોપિયન બજારોમાં આયાત કરે છે. કેન્દ્રીય મંત્રી નીતિન ગડકરીએ ભૂતકાળમાં અનેક પ્રસંગોએ કહ્યું હતું કે, ટેસ્લાએ મેડ ઇન ચાઇના વાહનો ભારતમાં નાખવાને બદલે અહીં એક ફેક્ટરી સ્થાપવા અંગે વિચારવું જોઇએ. ભારત સરકાર હાલમાં સંપૂર્ણ તૈયાર ઇલેક્ટ્રિક વાહનોની આયાત પર 100 ટકા ડ્યુટી લગાવે છે. આ સીધી રીતે આવી કારોની કિંમતને બમણી કરે છે, જે તેમની સ્પર્ધા કરવાની ક્ષમતાને ઘટાડે છે. બીજી તરફ સરકાર ઇલેક્ટ્રિક વાહનોના પાર્ટ્સની આયાત પર 15થી 30 ટકા ચાર્જ વસૂલે છે. સરકારની આ વ્યૂહરચનાનો હેતુ બહારની કંપનીઓને ભારતમાં ફેક્ટરીઓ સ્થાપવા માટે પ્રેરિત કરવાનો છે.
