- ટેસ્લાની ભારતમાં થઈ ગઈ એન્ટ્રી
- પુણેનાં પંચશીલ બિઝનેસ પાર્કમાં લીધી ઓફિસ
- ઓફિસનું 11.65 લાખનું માસિક ભાડું
ઈલેક્ટ્રિક કાર કંપની ટેસ્લાની ભારતમાં એન્ટ્રી થઈ ચૂકી છે. જૂન મહિનામાં PM નરેન્દ્ર મોદી અમેરિકાની યાત્રાએ હતાં જે દરમિયાન તેમણે TESLAનાં CEO એલન મસ્ક સાથે મુલાકાત કરી હતી. જે બાદ એલન મસ્કે PM મોદીનાં ખૂબ વખાણ કર્યાં હતાં. ત્યારે જ સંકેત મળી ગયાં હતાં કે ટૂંક જ સમયમાં ભારતમાં Tesla કંપનીની એન્ટ્રી થવાની છે. હવે કંપનીએ પૂણે ખાતે ઓફિસ ભાડે લીધી છે.
ટેસ્લાએ ભારતની બજારમાં મૂક્યો પગ
ટેસ્લા કંપનીએ ભારતમાં પોતાનો વેપાર શરુ કરવા માટે મોટો સ્ટેપ લીધો છે. ટેસ્લા ઈન્ડિયા મોટર એન્ડ એનર્જી પ્રાઈવેટ લિમિટેડે પૂણેનાં પંચશીલ બિઝનેસ પાર્કમાં એક ઑફિસ ભાડે લીધું છે. હાલમાં ટેસ્લાનાં તમામ અધિકારીઓ અહીં કામ કરશે અને ધીરે-ધીરે બિઝનેસ શરૂ કરશે. કહેવામાં આવી રહ્યું છે કે આ ઓફિસમાં તમામ પ્રકારની સગવડ અને બેઠક વ્યવસ્થા હશે.
11.65 લાખ રૂપિયાનું મહિનાનું ભાડું
રિયલ એસ્ટેટ એનાલિટિક્સ ફર્મ CRE મેટ્રિક્સ અનુસાર ટેસ્લા 60 મહિના માટે ઓફિસ માટે માસિક 11.65 લાખ રૂપિયાનું ભાડું આપશે અને 34.95 લાખ રૂપિયાની સિક્યોરિટી ડિપોઝીટ પણ ભરશે. પંચશીલ બિઝનેસ પાર્ક હાલમાં બની રહ્યું છે અને તેની કુલ સાઈઝ 10,77,181 વર્ગ ફુટ છે. ટેસ્લાની સહાયક કંપનીએ પંચશીલ બિઝનેસ પાર્કમાં બી વિંગનાં પહેલા ફ્લોર પર 5,580 વર્ગ ફુટ ઑફિસ લીધું છે. આ ડીલ ટેબલસ્પેસ ટેક્નોલોજીઝ પ્રાઈવેટ લિમિટેડની સાથે થઈ છે. તેનું ભાડું 1 ઑક્ટોબર 2023થી શરૂ થશે અને બંને કંપનીઓ 5% દરવર્ષનાં વધારાની શરતની સાથે 60 મહિનાની લૉક-ઈન ડીલ પર સહમત થઈ છે.
એરપોર્ટથી નજીક છે આ ઓફિસ
ટેસ્લાની આ ઓફિસ પુણે ઈંટરનેશનલ એરપોર્ટથી આશરે 3 કિ.મી દૂર છે. આ ઓફિસની પાર્કિંગમાં 5 કાર જ્યારે 10 બાઈક પાર્ક શામેલ છે. આ ઓફિસથી કલ્યાણી નગર, કોરેગાંવ પાર્ક, વાડગાંવશેરી અને ખરાડી જેવા સ્થળો પર સરળતાથી પહોંચી શકાશે.
ટેસ્લાની પહેલી કારની કિંમત 20 લાખ
મસ્ક પહેલા પણ કહી ચૂક્યાં છે કે તે ભારતીય બજારમાં પોતાની ઈલેક્ટ્રિક કાર ટેસ્લાને લઈ આવવા માટે ઉત્સુક છે. રિપોર્ટ અનુસાર ભારતીય બજારમાં ટેસ્લાની પહેલી કારની કિંમત આશરે 20 લાખ રૂપિયા હોઈ શકે છે.
