બ્લેકલિસ્ટ / કોઈ વિદેશીને ભારતીય વિઝા મેળવવાનો અધિકાર નથી, તબલીગી જમાતના લોકોને બ્લેકલિસ્ટ કરવા મામલે સુપ્રીમે શું કહ્યું જુઓ

•  તબલીગી જમાતના કાર્યક્રમમાં ભાગ લેનારા 10 વર્ષ સુધી બ્લેકલીસ્ટેડ 
• સુપ્રીમ કોર્ટમાં કરવામાં આવી અરજી 
• સુપ્રીમે કહ્યું વિઝા આપવા કે નહીં તે સરકારે નક્કી કરવાનું છે

સુપ્રીમ કોર્ટે ગુરુવારે કહ્યું હતું કે કોઈ પણ વિદેશીને ભારતના વિઝા મેળવવાનો અધિકાર નથી. કોઈ વ્યક્તિને બ્લેકલિસ્ટ કરવાના કિસ્સામાં, કેન્દ્ર દ્વારા નોટિસ જાહેર કર્યા પછી સત્તાવાળાઓ કેસ-બાય-કેસ વિઝા અરજી પર નિર્ણય લેશે.

 તબલીગી જમાતના કાર્યક્રમમાં ભાગ લેનારા 10 વર્ષ સુધી બ્લેકલીસ્ટેડ 
જસ્ટિસ એએમ ખાનવિલકરની બેંચ આગામી 10 વર્ષ સુધી તબલીગી જમાતના કાર્યક્રમમાં ભાગ લેનારા 35 દેશોના લોકોને બ્લેકલિસ્ટ કરવા સામે દાખલ અરજીઓની સુનાવણી કરી રહી હતી. કેન્દ્ર તરફથી હાજર રહેલા સોલિસિટર જનરલ તુષાર મહેતાએ બેન્ચને કહ્યું કે વિઝા આપવો કે નકારવો એ એક્ઝિક્યુટિવ નિર્ણય છે.

સરકાર એવ ઉકેલ શોધી રહી છે જેથી રાષ્ટ્રીય હિત અને વિદેશી નાગરિકોના હિતોનું રક્ષણ થાય. વિદેશી નાગરિકો તરફથી હાજર રહેલા એડવોકેટ સીયુ સિંઘે જણાવ્યું હતું કે સેંકડો વિદેશી નાગરિકોને બ્લેકલિસ્ટ કરવામાં આવ્યા છે અને તેઓ આગામી દસ વર્ષ સુધી વિઝા માટે અરજી કરી શકશે નહીં.

વિઝા આપવા કે નહીં તે સરકાર નક્કી કરશે

આના પર બેન્ચે કહ્યું, "તમને શું લાગે છે કે જ્યારે પણ તમે અરજી કરો ત્યારે તમને વિઝા મળી જશે?" ના એવું બિલકુલ નહિ થાય. વિઝા આપવા કે નહીં તે સરકારે નક્કી કરવાનું છે.

સિંઘે કહ્યું, "અમારા આસિલોને વિઝા આપવાના ભારતના અધિકાર પર કોઈ તકલીફ નથી." તેમની સમસ્યા એ છે કે તબલીગી જમાતના કેસમાં જે લોકોને કોર્ટ દ્વારા નિર્દોષ જાહેર કરવામાં આવ્યા છે તેઓને પણ આગામી દસ વર્ષ માટે બ્લેકલિસ્ટ કરવામાં આવ્યા છે અને આ લોકોને ભારતના વિઝા મળી શકશે નહીં. અમે ફક્ત આ બ્લેન્કેટ પ્રતિબંધ હટાવવાની માંગ કરી રહ્યા છીએ.

નવી અરજી લાગુ નિયમો મુજબ ધ્યાનમાં લેવામાં આવશે
"જ્યારે તમે નવી અરજી કરો છો, ત્યારે તે સમયે અમલમાં રહેલા નિયમો અનુસાર ધ્યાનમાં લેવું જોઈએ," બેન્ચે કહ્યું હતું . જે કેસોમાં આરોપી નિર્દોષ છૂટ્યા હોય, બ્લેકલિસ્ટ આપોઆપ ખતમ થઈ જવું જોઈએ.

અમે તેના કેસની તપાસની જવાબદારી વિભાગને સોંપીએ છીએ. મહેતાએ કહ્યું કે, અમે ઉકેલ શોધી રહ્યા છીએ. સુનાવણી મંગળવાર સુધી મુલતવી રાખવી જોઈએ. અગાઉ, કેન્દ્રએ સુપ્રીમ કોર્ટને વિઝા શરતોના ઉલ્લંઘનમાં સ્થાનિક અદાલતોમાં જવાના વિદેશી નાગરિકના અધિકારો પર ઉઠાવવામાં આવેલા પ્રશ્નની તપાસ કરવા વિનંતી કરી હતી.