સરકારનો ટેકો / ખેડૂતો આનંદો: ઘઉં, જવ, ચણા, મસૂર, રાયડો, કસુમ્બીના ટેકાનો ભાવ જાહેર, ગત વર્ષની સરખામણીએ સરકારે આટલા ટકા વધારો કર્યો

• વર્ષ 2023-24 માટે ઘઉં,  જવ, ચણા, મસૂર, રાયડાના ટેકાના ભાવ જાહેર
• ગત વર્ષની સરખામણીએ ટેકાના ભાવમાં 2 થી 7 ટકાનો વધારો કર્યો
• ઘઉંમાં રૂ. 150 પ્રતિ ક્વિ., ચણામાં રૂ. 105 પ્રતિ ક્વિ. જેટલો વધારો કરાયો 

ધરતીપુત્રોના હિતને વરેલી ભારત સરકારે વર્ષ 2023-24માં રવિ પાકોની ખરીદી માટે ટેકાના ભાવની જાહેરાત કરી છે. ખેડૂતોને આર્થિક સુરક્ષા આપવા તેમજ તેમની ખેતપેદાશોના પોષણક્ષમ ભાવ મળી રહે તે માટે ટેકાના ભાવમાં ગત વર્ષની સરખામણીએ સરેરાશ 2થી 7 ટકા જેટલો વધારો કરવામાં આવ્યો છે. જ્યારે રાજ્યના મુખ્ય પાક ઘઉંમાં રૂ. 150 પ્રતિ ક્વિ., ચણામાં રૂ. 105 પ્રતિ ક્વિ. અને રાયડામાં રૂ.200 પ્રતિ ક્વિ. જેટલો વધારો કરાયો છે.

ટેકાના ભાવ જાહેર
રાજ્યમાં ઘઉં, જવ, ચણા, મસૂર, રાયડો અને કસુમ્બી જેવા રવિ પાકોના વાવેતરની શરૂઆત થાય તે પહેલાં જ ભારત સરકાર દ્વારા ટેકાના ભાવ જાહેર કરાતા ખેડૂતો હવે પોતાના પાકને મળનારા ભાવને ધ્યાને રાખી વાવેતર કરી શકશે. આટલા ટૂંકા ગાળામાં જ ટેકાના ભાવોની જાહેરાત કરવા બદલ કૃષિ મંત્રી શ્રી રાઘવજીભાઈ પટેલે રાજ્ય સરકાર તેમજ ગુજરાતના ખેડૂતો વતી આર્થિક બાબતોની કેબિનેટ કમિટીના અધ્યક્ષ અને વડાપ્રધાન શ્રી નરેન્દ્રભાઈ મોદી તેમજ કેન્દ્રીય કૃષિ મંત્રી નરેન્દ્રસિંહ તોમરનો આભાર વ્યક્ત કર્યો છે. આ ઉપરાંત ખેડૂતોના હિત માટે માટે પ્રયત્નશીલ રહી સતત માર્ગદર્શન આપતા મુખ્યમંત્રી ભૂપેન્દ્ર પટેલનો પણ તેમણે આભાર વ્યક્ત કર્યો છે.

આટલો વધારો કરાયો
અત્રે ઉલ્લેખનીય છે કે, ભારત સરકાર દ્વારા દર વર્ષે ખરીફ અને રવિ પાકો માટે વાવેતર પહેલાં ટેકાના ભાવ જાહેર કરવામાં આવે છે, જેથી ખેડૂત મિત્રો આગોતરું આયોજન કરી શકે. વર્ષ 2023-24માં ટેકાના ભાવની પોલીસી અંતર્ગત સમાવિષ્ટ ઘઉં માટે રૂ. 2275 પ્રતિ ક્વિ., જવ માટે રૂ. 1850 પ્રતિ ક્વિ., ચણા માટે રૂ. 5440 પ્રતિ ક્વિ., મસૂર માટે રૂ. 6425 પ્રતિ ક્વિ., રાયડા માટે રૂ. 5650 પ્રતિ ક્વિ. અને કસુમ્બી માટે રૂ. 5800 પ્રતિ ક્વિ. ભાવ જાહેર કરવામાં આવ્યો છે. આમ, વર્ષ 2022-23ની સરખામણીએ વર્ષ 2023-24માં જુદા-જુદા રવિ પાકો હેઠળ રૂ.105 થી રૂ. 425 પ્રતિ ક્વિ.નો વધારો કરવામાં આવ્યો છે.