તમારા કામનું / 10 વર્ષથી નાની છે બહેન, તો રક્ષાબંધનની ગિફ્ટમાં આપો આ સરકારી સ્કીમ: લગ્ન-ભણવાના ખર્ચની નહીં રહે ચિંતા, અત્યાર સુધી 3 કરોડ લાભાર્થી

• 10 વર્ષથી નાની ઉંમરની બાળકી માટે સ્કીમ
• 'સુકન્યા સમૃદ્ધિ યોજના' 2015માં શરૂ થઈ હતી
• આ સરકારી સ્કીમનું વાર્ષિક 8%નું વ્યાજદર 

ભાઈ-બહેનનો દિવસ એટલે કે રક્ષાબંધન..આજનાં આ પવિત્ર પર્વે ભાઈ પોતાની બહેનને કંઈક ભેટ આપતો હોય છે. ત્યારે જો તમારી બહેન 10 વર્ષ કે તેથી નાની ઉંમરની છે તો તમે તેને આ સરકારી સ્કીમ ગિફ્ટ તરીકે આપી શકો છો. જેનાથી તેનાં ભણતર કે લગ્ન સંબંધિત અનેક ખર્ચાઓનું ટેન્શન ઓછું થઈ જશે. આ સ્કીમનું નામ છે 'સુકન્યા સમૃદ્ધિ યોજના.' આ એક સ્મોલ સેવિંગ લૉન્ગ ટર્મ ઈન્વેસ્ટમેંટ છે જેમાં સરકાર 8% જેટલું મોટું વ્યાજ ફાળવે છે. આ સ્કીમ 2015માં શરૂ કરવામાં આવી હતી જે અંતર્ગત અત્યાર સુધી 3 કરોડથી વધારે એકાઉન્ટ ખુલ્યાં છે.

માતા-પિતાની મદદથી ખોલાવી શકો છો એકાઉન્ટ
આ એકાઉન્ટ 10 વર્ષ કે તેથી નાની ઉંમરની બાળકીઓ માટે ખોલાવી શકાય છે. 250 રૂપિયા ડિપોઝિટ કરીને તમે આ એકાઉન્ટ ખોલી શકો છો. આ સ્કીમ અંતર્ગત વાર્ષિક વધુમાં વધુ 1.50 લાખ રૂપિયા જમા કરાવી શકાય છે. નિયમ અનુસાર આ સ્કીમમાં કોઈ બાળકીનાં નામની નોંધણી માતા-પિતા દ્વારા જ થઈ શકે છે અથવા તો કાયદાકીય રીતે છોકરીનાં ગાર્ડિયન એકાઉન્ટ ખોલાવી શકે છે. જો માતા-પિતા જીવીત ન હોય તો દાદા-દાદી કે અન્ય કોઈ પણ સંબંધી જેણે કાયદાકીય પ્રક્રિયા પૂરી કરી લીધી હોય તે પણ આ એકાઉન્ટ ખોલાવી શકે છે.

મેચ્યોરિટી પીરિયડ 21 વર્ષ
SSY Schemeનો મેચ્યોરિટી પીરિયડ 21 વર્ષનો છે. બાળકી 21 વર્ષની થાય ત્યારે જ તમે સંપૂર્ણ જમા રકમ વ્યાજ સહિત મેળવી શકશો.જો કે 18 વર્ષ થયા બાદ જો ભણતર માટે રકમ કાઢવી હોય તો પણ એ શક્ય છે. શિક્ષણ માટે જમા બેલેન્સની 50% રકમ કાઢી શકાય છે. પરંતુ એ માટે તમારે દીકરીનાં શિક્ષણ સંબંધિત દસ્તાવેજો જમા કરાવવાનાં રહેશે.

લગ્ન માટે પણ કઢાવી શકો છો રકમ
શિક્ષણ સિવાય જો દીકરીનાં લગ્ન માટે પૈસા કઢાવવા હોય તો એકાઉન્ટમાં જમા કુલ રકમનાં 50% પૈસા ઉપાડી શકો છો. લગ્ન માટે એક મહિના પહેલાથી લઈને 3 મહિના પછી સુધી પૈસા કઢાવી શકાય છે પરંતુ જો સમગ્ર જમા રકમ કાઢવી હોય તો બાળકીને 21 વર્ષ થશે ત્યારે જ મળી શકશે.

21 વર્ષે મળી શકશે 67 લાખ
સરકારની આ સ્કીમનાં 8% વ્યાજ અંતર્ગત જો તમે દીકરીનાં જન્મ બાદ જ દરમહિને 12500 રૂપિયા જમા કરો છો તો વાર્ષિક 1,50000 લાખ રૂપિયા જમા થઈ શકશે. આ રીતે 15 વર્ષમાં તમે 2250000 રૂપિયાનું રોકાણ કરશો. 8 % વ્યાજનાં હિસાબે તમને 4484534 રૂપિયા વ્યાજ મળશે. સ્કીમ મેચ્યોર થશે ત્યારે કુલ તમને 6734534 રૂપિયા મળી શકશે.