- સ્ટેટ જીએસટી વિભાગનું ઓપરેશન મામલે
- 115 પેઢીઓના 205 સ્થળોએ સ્ટેટ જીએસટી ટીમની તપાસ
- અમદાવાદમાં સૌથી વધુ 14 બોગસ પેઢીઓ ઝડપાઇ
અમદાવાદ સ્ટેટ જીએસટીની ટીમ દ્વારા બે દિવસ અગાઉ એટીએસ અને ક્રાઇમ બ્રાન્ચની મદદથી અલગ અલગ જગ્યાએ દરોડા પાડવામાં આવ્યા હતા. જેમાં સ્ટેટ જીએસટી વિભાગ દ્વારા લાંબુ ઓપરેશન હાથ ધરવામાં આવ્યું હતું. આ દરમિયાન 115 જેટલી પેઢીઓના 205 સ્થળો પર તપાસનો ધમધમાટ હાથ ધરવામાં આવ્યો હતો અને મોટા પ્રમાણમાં કરચોરીની આશંકાએ 91 વ્યક્તિઓની પૂછપરછ શરૂ કરવામાં આવી હતી.
41 પેઢીઓ મારફતે 465 કરોડનું ટર્ન ઓવર દર્શાવાયું
આ મામલે સ્ટેટ જીએસટીના ઓપરેશનમાં 41 બોગસ પેઢીઓ મળી આવી છે. જેમાં સોથી વધૂ બોગસ પેઢી અમદાવાદમાંથી મળી આવી હતી. સૌથી વધુ 14 બોગસ પેઢીઓ ઝડપાતા હડકંપ મચી ગયો હતો. બોગસ 41 પેઢીઓ મારફતે 465 કરોડનું ટર્ન ઓવર દર્શાવાયું હોવાનું સામે આવ્યું છે. આમ રૂપિયા 85 કરોડની વેરાશાખ પાસ ઓન કરી કરચોરી કરવામાં આવી હોવાનું ઉઘાડુ પડતા અધિકારીઑ ચૌકી ગયા હતા.
ATS અને GSTનું સંયુક્ત ઓપરેશન
રાજ્યમાં ATS અને GSTએ સંયુક્ત ઓપરેશન હાથ ધર્યું હતુ. ATS અને GSTની ટીમો દ્વારા અમદાવાદ, સુરત, ભરૂચ, જામનગર અને ભાવનગરમાં દરોડા પાડવામાં આવ્યા હતા. બોગસ બિલિંગમાં કરોડોની ગેરરિતી થઈ હોવાની આશંકા એ એકસાથે 140થી વધુ સ્થળો પર તપાસ ચાલી હતી. ગુજરાતમાં વિધાનસભાની ચૂંટણી ટાણે જ ATS અને GSTની ટીમો દ્વારા સંયુક્ત ઓપરેશન હાથ ધરતા ખળભળાટ સર્જાયો છે. ચૂંટણી અગાઉ રાજ્યમાં દેશવિરોધી પ્રવૃત્તિ અને આર્થિક નુકસાન પહોંચાડતા લોકો સામે કાર્યવાહી આવીરત રહેવા પામી છે.
