ખુલાસો / લો બોલો! રાતનો રાજા 'તથ્ય' દિવસે કોલેજમાંથી પણ બંક મારતો, અનેક નોટિસો આપી છતાંય..., સાબરમતી યુનિ.નો ઘટસ્ફોટ

• તથ્ય પટેલ મામલે વધુ એક ખુલાસો
• તથ્ય પટેલ ક્યારેય કોલેજ નથી આવ્યોઃ રજીસ્ટ્રાર
• યુનિ. દ્વારા તથ્યને અનેવ વખત નોટીસ પણ ફટકારી છેઃ રજીસ્ટ્રાર

ઈસ્કોન બ્રિજ અકસ્માત સિવાય કેદી 8683 ની નવી ઓળખાણ મેળવનાર તથ્ય પટેલ મામલે વધુ એક ખુલાસો થયો છે.  અમદાવાદ સાબરમતી યુનિવર્સિટીમાં અભ્યાસ કરતા તથ્ય પટેલ મામલે યુનિવર્સિટી દ્વારા અનેક ખુલાસા કરવામાં આવ્યા છે. પોતાને રાતનો રાજા ગણાવતો તથ્ય દિવસે કોલેજમાં ગુલ્લી મારતો હતો. ત્યારે તથ્ય સાબરમતી યુનિવર્સિટીમાં BBA Sem-2  માં અભ્યાસ કરતો હતો.

યુનિ. દ્વારા અનેકવાર તથ્યને નોટીસ ફટકારી

યુનિવર્સિટીનાં રજીસ્ટ્રાર જ્યોતિ શ્રીવાસ્તવે તથ્યને લઈને નિવેદન આપ્યું છે કે તથ્ય ક્યારેય કોલેજ આવ્યો જ નથી. તેમજ તે માત્ર સેમ-1 માં જ રેગ્યુલર કોલેજ આવતો હતો. તથ્યએ BBA Sem-2  ની પરીક્ષા પણ ન આપી હોવાનું રજીસ્ટ્રારે જણાવ્યું હતું. ત્યારે યુનિવર્સિટી દ્વારા આ બાબતે તથ્યનાં પિતા પ્રજ્ઞેશ પટેલને વારંવાર જાણ કરાઈ હોવાનું પણ જણાવ્યું હતું. જે બાદ પણ તથ્ય કોલેજ ન આવતા યુનિવર્સિટી દ્વારા અનેકવાર તેને નોટિસ આપવામાં આવી હતી. યુનિવર્સિટીની નોટિસને પણ તથ્ય અવગણી રહ્યો હતો. તથ્યએ કરેલા અકસ્માત બાદ કોલેજે પણ કડક નિયમો કર્યા છે. જેમાં સાબરમતી યુનિવર્સિટીમાં હેલ્મેટ કે લાયસન્સ વગર પ્રવેશ બંધ કરી દેવામાં આવ્યો છે. 

ગત રોજ તથ્ય પટેલે નવી ઓળખાણ મેળવી
ઈસ્કોન બ્રિજ અકસ્માત મામલે ગત રોજ તથ્ય પટેલનાં ત્રણ દિવસનાં રિમાન્ડ પૂર્ણ થતા તેને કોર્ટમાં રજૂ કરાયો હતો. પોલીસ દ્વારા વધુ રિમાન્ડની માંગણી ન કરાતા કોર્ટે તથ્યને જ્યુડિશીયલ કસ્ટડીમાં મોકલ્યો હતો. જે બાદ તથ્યને સાબરમતી સબજેલમાં મોકલી આપવામાં આવ્યો હતો. જ્યાં તેણે નવી ઓળખ મેળવી હતી. સાબરમતી જેલમાં તથ્યને કેદી નંબર 8683 ની નવી ઓળખ મળવા પામી હતી.  જેલમાં ગયા બાદ તથ્ય પટેલ મામલે અનેક ખુલાસા થઈ રહ્યા છે.  હજુ પણ તથ્ય મામલે વધુ ખુલાસા થવાની સંભાવનાં છે.