દ્વારકા / જળપ્રલયથી સલાયામાં માર્ગો, પાલિકા કચેરી, પશુ દવાખાના અને નીચાણવાળા વિસ્તારોમાં ઘૂસ્યા પાણી, લોકો બેહાલ

• ધોધમાર વરસાદના પગલે સલાયામા ભરાયા પાણી 
• સલાયાના મુખ્ય માર્ગો પર ભરાયા ગોઠણસમાં પાણી 
• પાલિકા કચેરીના પાર્કિંગ એરિયામાં પણ ઘૂસ્યા વરસાદી પાણી 

દ્વારકા પંથકમાં છેલ્લા કેટલાય દિવસથી મેઘો ગાંડોતૂર થઇ વરસતો હોવાથી જન જીવન પ્રભાવીત થયું છે. ઠેર-ઠેર પાણી ભરાતા લોકોને મુશ્કેલીનો સામનો કરવાનો વારો આવ્યો છે તેવામાં ધોધમાર વરસાદના પગલે દ્વારકાના સલાયામાં વરસાદી પાણી ભરાયા હતા. સલાયાના મુખ્ય માર્ગો પર ગોઠણસમા પાણી ભરાતા માર્ગો જાણે નદી બન્યા હોય  તેવી સ્થિતિ સર્જાઇ હતી. જેમાંથી સલાયા પાલિકા કચેરી પણ બાકાત રહી ન હતી. કચેરીના પાર્કિંગ એરિયામાં વરસાદી પાણી ભરાયા હતા. પશુ દવાખાનામાં પણ વરસાદી પાણી ઘુસ્યા હતા. વધુમાં સલાયાના નીચાણવાળા વિસ્તારમાં આવેલા ઘરોમાં પણ પાણી ઘૂસ્યા હતા. સ્થળ ત્યાં જળને પગલે સલાયામાં રહેતા લોકોનું જનજીવન પ્રભાવિત થયું હતું.

જામનગર મનપાની એસ્ટેટ વિભાગની કચેરીમાં પાણી ભરાયા 
ઉલ્લેખનીય છે કે, દ્વારકા ઉપરાંત જામનગર સહિત હાલાર પંથકમાં સતત પડી રહેલા વરસાદના કારણે તંત્રની પ્રિ-મોન્સૂનની કામગીરીની પોલી ખુલી ગઈ હતી. સલાયા ઉપરાંત જામનગર શહેર સહિત આસ-પાસના વિસ્તારોમાં ઠેર ઠેર પાણી ભરાયા હતાં. તેમજ જામનગરના એસ્ટેટ વિભાગની કચેરીમાં પણ પાણી ભરાયા છે. જેને લઈને મનપાના કર્મીઓને જ ભારે મુશ્કેલી પડી રહી છે.આ સાથે જામનગરના જોડિયામાં ધોધમાર વરસાદથી અનેક વિસ્તારોમાં ઘુંટણસમા પાણી ભરાયા છે. 

આમાં દ્વારકા અને જામનગર સહિત હાલારભરમાં કેટલાય દિવસથી ત્રાટકી રહેલા વરસાદને લઇને જન જીવન પ્રભાવિત થયું છે. જળ પ્રલય જેવી સ્થિતિ વચ્ચે હવે મેઘરાજા વિરામ લે તેવી લોકો પ્રાર્થના કરી રહ્યા છે.