અમદાવાદ: આવતીકાલે રાજ્યમાં લોકસભાની ચૂંટણી માટે મતદાન થવાનું છે, ત્યારે ચૂંટણીની તૈયારીઓ વચ્ચે અમદાવાદ શહેરની 3 સ્કૂલને બોમ્બથી ઉડાવવાની ધમકી મળી છે. સ્કૂલને બોમ્બથી ઉડાવવાની ધમકી મળ્યા બાદ સ્થાનિક પોલીસે સ્કૂલમાં ચેકિંગ હાથ ધર્યું છે.
આજે સોમવારે સવારે અમદાવાદ શહેરની 3 સ્કૂલને બોમ્બથી ઉડાવવાની ધમકી મળી છે. અમદાવાદની કેટલીક શાળાઓને બોમ્બથી ઉડાવી દેવાની ધમકી મળી છે. દિલ્હીની માફક જ એક પછી એક સ્કૂલને મેઈલ આવી રહ્યા છે. ધમકી મળ્યા પછી અમદાવાદ પોલીસ સતર્ક થઈ ગઈ છે. ધમકી મળેલ સ્કૂલો પર પોલીસે ચેકિંગ હાથ ધર્યું છે. બોમ્બ ડિસ્પોઝલ સ્કવોડ પણ ઘટના સ્થળે પહોંચી ગયું છે.
અમદાવાદમાં પણ દિલ્હી જેવી ઘટનાનું પુનરાવર્તન
થલતેજની ઉદગમ સ્કૂલને બોમ્બથી ઉડાવી દેવાની ધમકી મળી છે, તો ઘાટલોડિયાની આનંદ નિકેતન સ્કૂલ અને ચાંદખેડાની કેન્દ્રીય વિદ્યાલયને પણ ધમકી ભર્યો ઈ-મેઈલ આવ્યો છે. બોમ્બથી ઉડાવી દેવાની ધમકી મળ્યા બાદ સ્થાનિક પોલીસે સ્કૂલમાં ચેકિંગ હાથ ધર્યું છે. SOG, બોમ્બ સ્કવોર્ડની ટીમ ઘટનાસ્થળે પહોંચી ગઈ છે. રશિયન સર્વરથી ધમકી મળ્યા હોવાનું અનુમાન લગાવવામાં આવી રહ્યું છે. હવે આ અંગે અમદાવાદ પોલીસે શહેરીજનોને અપીલ કરી છે. અમદાવાદ પોલીસે જણાવ્યું કે હાલ તપાસ ચાલી રહી છે. લોકોએ પેનિક થવાની જરૂર નથી, હાલ તમામ સ્થિતિ કાબૂમાં છે.
અગાઉ ગયા અઠવાડિયે દિલ્લીની અનેક સ્કૂલમાં પણ ધમકી મળી હતી. જોકે દિલ્લી પોલીસે તપાસ કરતા ધમકી ખોટી સાબિત થઈ હતી. દિલ્હી અને નોઇડાની અનેક શાળાઓને ધમકીભર્યા ઈમેલ મળ્યા હતા. ધમકી આપવામાં આવેલ શાળાઓમાં દ્વારકાની DPS, મયુર વિહારની મધર મેરી અને નવી દિલ્હીની સંસ્કૃતિ સ્કૂલ જેવી હાઈપ્રોફાઈલ શાળાઓ ઉપરાંત નોઈડાની ડીપીએસનો સમાવેશ થાય છે. આ ધમકી બાદ વિદ્યાર્થીઓને ઘરે મોકલી દેવામાં આવ્યા હતા.
માહિતી અનુસાર, દિલ્હીની ઘણી સ્કૂલોમાં બોમ્બની ધમકીભર્યા ઈમેલ મોકલવામાં આવ્યા હતા. ઈમેલના IP એડ્રેસ પરથી એવું લાગે છે કે આ ઈમેલ દેશની બહારથી મોકલવામાં આવ્યો છે. આ મામલે તપાસ ચાલી રહી છે. પ્રારંભિક તપાસમાં એવું લાગે છે કે ગઈકાલથી ઘણી જગ્યાએથી ઈમેલ આવ્યા છે. આ ઈમેલમાં કોઈ ડેટલાઈન નથી. એક જ ઈમેલ અનેક જગ્યાએ મોકલવામાં આવ્યો છે.
વધુ વાંચો: દિલ્હી-NCRની 50થી વધારે સ્કૂલોને મળ્યા ધમકીભર્યા મેઇલ, પોલીસ દોડતી થઇ ગઇ, શાળાઓ ખાલી કરાવાઇ
આપને જણાવી દઈએ કે, દિલ્હીની શાળાઓને આ પ્રકારના ધમકીભર્યા ઈમેલ વારંવાર મોકલવામાં આવ્યા છે. ફેબ્રુઆરી મહિનામાં દિલ્હીના આરકેપુરમ સ્થિત DPS સ્કૂલના પ્રિન્સિપાલને આવો જ એક ઈમેલ મોકલવામાં આવ્યો હતો. ફેબ્રુઆરીમાં સાકેતની Amity સ્કૂલને પણ આવો જ ઈમેલ મોકલવામાં આવ્યો હતો. આ ઈમેલમાં શાળા પાસેથી પૈસા પણ માંગવામાં આવ્યા હતા.
