નિર્ણય / રાજકોટનો લોકમેળો વધુ એક દિવસ લંબાવ્યો, માત્ર 4 જ દિવસમાં લાખો લોકોનું માનવ મહેરામણ ઉમટ્યું

• સૌરાષ્ટ્ર અને ખાસ કરી રાજકોટવાસીઓ માટે મોટા સમાચાર 
• રાજકોટનો જન્માષ્ટમીની લોકમેળો એક દિવસ લંબાવાયો
• લોકલાગણીને ધ્યાને રાખી કલેક્ટર દ્વારા નિર્ણય

સૌરાષ્ટ્ર અને ખાસ કરી રાજકોટવાસીઓ માટે મોટા સમાચાર સામે આવી રહ્યા છે. વાત જાણે એમ છે કે, હાલ રાજકોટમાં જન્માષ્ટમીની મેળો ચાલી રહ્યો છે. જેમાં લાખોની સંખ્યામાં લોકો આ લોકમેળાનો આનંદ માણવા પહોંચી રહ્યા છે. જોકે આ મેળો પહેલા આજે એટલે કે શનિવારે પૂર્ણ થવાનો હતો. પરંતુ હવે આ લોકમેળામાં એક દિવસનો વધારો કરવામાં આવતા લોકોમાં આનંદ જોવા મળી રહ્યો છે. 

રાજકોટના જન્માષ્ટમી લોકમેળામાં એક દિવસનો વધારો કરવામાં આવ્યો છે. એટલે કે આજે શનિવારે પૂર્ણ થનાર મેળો હવે આવતીકાલે રવિવાર સુધી ચાલુ રહેશે. વિગતો મુજબ લોકલાગણીને ધ્યાને રાખી કલેક્ટર દ્વારા આ નિર્ણય લેવામાં આવ્યો છે. લોકમેળા અમલીકરણ સમિતિના અધ્યક્ષ અને જિલ્લા કલેક્ટર પ્રભવ જોષીએ લોકલાગણીને માન આપીને મેળાની મુદતમાં એક દિવસનો વધારો જાહેર કર્યો છે. 

વિગતો મુજબ આ લોકમેળાનાં પ્રથમ દિવસે અંદાજિત 50,000થી વધુ લોકો આવ્યા હતા. આ તરફ બીજા દિવસે 1.25 લાખથી વધુ અને ત્રીજા દિવસે 3 લાખ જેટલા લોકોએ મેળાની મજા માણી હતી. આ સાથે ગઇકાલે 2 લાખ કરતા વધુ લોકો સહિત અત્યાર સુધીમાં કુલ 7 લાખ કરતા વધારે લોકો મેળાની મોજ માણી ચુક્યા છે.