Rain In Gujarat: ગુજરાતમાં છેલ્લા 24 કલાકમાં મેઘરાજાએ ધડબડાટી બોલાવી છે. આ સમયગાળા દરમિયાન રાજ્યના 234 તાલુકામાં વરસાદ નોંધાયો છે. જેમાં સૌથી વધુ વરસાદ નવસારીમાં ખાબક્યો છે.
Share
રાજ્યનાં 234 તાલુકામાં વરસાદ
સૌથી વધુ નવસારીમાં સવા 12 ઈંચ
જૂનાગઢમાં પોણા 10 ઈંચ વરસાદ
ગુજરાતમાં વરસાદના ત્રીજા રાઉન્ડમાં મેઘરાજાએ રાજ્યના મોટાભાગના વિસ્તારોમાં તોફાની બેટિંગ કરી છે. જેના કારણે નદીઓ બે કાંઠે વહેતી થઈ છે, ડેમોમાં પાણીની આવક વધી છો. તો રસ્તાઓ અને ખેતરો બેટમાં ફરી વળ્યા છે. છેલ્લા 24 કલાકમાં ગુજરાતમાં ખાબકેલા વરસાદ વિશે વાત કરીએ તો છેલ્લા 24 કલાકમાં ગુજરાતના 234 તાલુકાઓમાં વરસાદ નોંધાયો છે. જેમાં સૌથી વધુ વરસાદ નવસારીમાં ખાબક્યો છે. 24 કલાકમાં સવા 12 ઈંચ વરસાદથી નવસારીમાં જનજીવન અસ્ત-વ્યસ્ત બન્યું છે. લોકોના ઘરોમાં ઘૂંટણસમા પાણી ભરાઇ ગયા છે. જ્યારે જલાલપોરમાં 11 ઈંચ વરસાદ નોંધાયો છે.
જૂનાગઢમાં પોણા 10 ઈંચ વરસાદ
જૂનાગઢમાં પણ છેલ્લા 24 કલાકમાં પોણા 10 ઈંચ વરસાદ નોંધાયો છે. ભારે વરસાદના કારણે જૂનાગઢમાં જળબંબાકારની સ્થિતિ જોવા મળી રહી છે. ભારે વરસાદથી રસ્તાઓ નદીમાં ફેરવાયા તો ક્યાંક વાહનો તણાઈ ગયાં છે. જૂનાગઢના ગિરનાર અને દાતાર પર્વત ઉપર સાંબેલાધારે વરસાદ પડતાં કાળવા નદી બે કાંઠે થઇ છે. ભારે વરસાદના કારણે જૂનાગઢના અનેક વિસ્તારોમાં ભયંકર સ્થિતિનું નિર્માણ થયું છે. લોકોના ઘરોમાં પાણી ઘૂસી જતા ઘરવખરી પાણીમાં પલળી ગઈ છે. તો અનેક વાહનો અને ઢોર-ઢાંખર પણ તણાઈ ગયાં છે.
CM ભૂપેન્દ્ર પટેલે યોજી હતી બેઠક
રાજ્યમાં ભારે વરસાદની પરિસ્થિતિને લઈ ગતરોજ મુખ્યમંત્રી ભૂપેન્દ્ર પટેલે સ્ટેટ ઇમરજન્સી સેન્ટરે બેઠક યોજી હતી. મુખ્યમંત્રીએ વરસાદ અંગે અધિકારીઓ સાથે સમીક્ષા કરી. આ બેઠકમાં વીડિયો કોન્ફરન્સના માધ્યમથી કલેક્ટર પણ બેઠકમાં જોડાયા હતા. સોમનાથ, જૂનાગઢ અને ભાવનગરના કલેક્ટર જોડાયા હતા. હવામાન વિભાગના ડાયરેક્ટર મનોરમા મોહંતી પણ જોડાયા હતા. સાથે જ મુખ્ય સચિવ રાજ કુમાર સહિતના ઉચ્ચ અધિકારીઓ પણ હાજર રહ્યા હતા.
મુખ્યમંત્રી શ્રી ભૂપેન્દ્ર પટેલે જૂનાગઢમાં ભારે વરસાદના કારણે સર્જાયેલી સ્થિતિની સમીક્ષા ગાંધીનગર ખાતેના સ્ટેટ ઇમરજન્સી ઓપરેશન સેન્ટર ખાતેથી કરી હતી.
મુખ્યમંત્રીશ્રીએ જૂનાગઢ જિલ્લા કલેકટર સાથે વિડિયો કોન્ફરન્સ કરીને પરિસ્થિતિનો તાગ મેળવ્યો હતો તેમજ લોકોના સ્થળાંતર, ફૂડ પેકેટ્સ… pic.twitter.com/trYEfw6Pxh
આલોક પાંડેએ યોજી હતી પત્રકાર પરિષદ
આ બેઠકને લઈ રાહત કમિશનર આલોક પાંડેએ પત્રકાર પરિષદ યોજી હતી. આલોક પાંડેએ સૌરાષ્ટ્ર, દક્ષિણ ગુજરાત અને ખાસ કરીને જૂનાગઢમાં વરસેલા વરસાદ અને ત્યાંની પરિસ્થિતિને લઈ માહિતી આપી હતી. તેમજ રાજ્યમાં વહિવટી તંત્ર દ્વારા લેવાયેલા પગલા અને બચાવ કામગીરીની માહિતી આપી હતી. જેમાં રોડ-રસ્તા, સ્થળાંતર, રેસ્ક્યૂ અને બચાવ કામગીરી વિશે માહિતી આપી હતી.
