નુકસાની / છોટાઉદેપુરમાં વરસાદી તારાજી ! ઉચ્છ નદી ઉફાન પર, સંખેડામાં 100 વર્ષ જૂનો રેલવે બ્રિજ ધોવાયો

• છોટા ઉદેપુરમાં વરસાદે સર્જી તારાજી
• છોટાઉદેપુરના સંખેડા નગરવાડા પાસે રેલવે બ્રિજ ધોવાયો 
• ઉચ્ચ નદીમાં ભારે પૂર આવવાથી રેલવે બ્રિજ ધોવાયો
   

દક્ષિણ ગુજરાત અને કચ્છમાં મેઘો આ વખતે ધનાધન બેટિંગ કરી રહ્યો છે. ભારે વરસાદને કારણે નદી નાળામાં નવા નીરની આવક થવા પામી છે તો બીજી તરફ એવા ઘણા વિસ્તારો છે જ્યાં હાલાકી વેઠવાનો વારો આવ્યો છે. નીચાણવાળા વિસ્તારો પાણીમાં ગરકાવ થયા છે તો બીજી તરફ કરોડોના ખર્ચે બનાવેલા પુલ અને રસ્તા ધોવાતા અનેક ગામો સંપર્ક વિહોણા બન્યા છે. ત્યારે વાત કરીએ છોટાઉદેપુરની તો અહીં ધોધમાર વરસાદમાં રેલવે બ્રિજ ધોવાઇ ગયો.

100 વર્ષ જૂનો રેલવે બ્રિજ ધોવાયો 

છોટાઉદેપુરના સંખેડા નગરવાડા પાસે રેલવે બ્રિજ ધોવાયો હોવાનું સામે આવ્યું છે. ઉચ્છ નદીમાં ભારે પૂર આવવાને કારણે રેલવે બ્રિજ પાણીમાં ગરકાવ થઇ ગયો. છેલ્લા 4 દિવસથી ભારે વરસાદ વરસતા મોટા પ્રમાણમાં નુકસાન થયુ હોવાનું સામે આવ્યું છે. અંગ્રેજ શાસન દરમિયાન બનાવવામાં આવેલો રેલવે બ્રિજ તૂટી ગયો છે જ્યારે અમુક ભાગ વરસાદી પાણીમાં વહી જવા પામ્યો છે. 100 વર્ષ જૂનો ગણાતો રેલવે બ્રિજ ઉચ્છ નદીમાં પુર આવતા ધરાશાયી થયો છે.છુંછાપુરાથી તણખલાને જોડતી રેલવે લાઈન તૂટી પડી હતી. 

છોટાઉદેપુરમાં ધોધમાર વરસાદથી નુકસાન 

આ અંગે સ્થાનિકોનું કહેવુ છે કે છોટાઉદેપુરમાં છેલ્લા 3-4 દિવસથી ભારે વરસાદ પડતા મોટું નુકસાન થયુ છે કોઇનું ઘર તૂટી પડ્યુ છે તો કોઇનું ખેતર ધોવાઇ ગયુ છે. મહત્વનું છે કે છોટાઉદેપુર જિલ્લામાં ભારે વરસાદને કારણે નદી-નાળાં, કોતરો છલકાતાં અનેક ગામો સંપર્કવિહોણાં બન્યાં હતાં. તો નસવાડી તાલુકાનાં 12 ગામ અને કવાંટના બે રસ્તા બંધ કરાયાં હતાં. સંખેડા તાલુકામાં આવેલી ઉચ્છ નદીમાં વરસાદનું પાણી આવતાં જ બે કાંઠે વહેતી થઇ હતી.