- ગુજરાત કોંગ્રેસના નવા પ્રભારી રઘુ શર્મા
- રાજસ્થાન સરકારમાં આરોગ્ય મંત્રી છે શર્મા
- કોંગ્રેસને જડમૂળથી ફેરફાર એ પહેલું લક્ષ્ય
ગુજરાત વિધાનસભા 2022ની ચૂંટણી પહેલા ગુજરાત કોંગ્રેસમાં સંજીવની ફૂંકવા રાજસ્થાન સરકારમાં આરોગ્યમંત્રી રહેલા રઘુ શર્માને ગુજરાત કોન્ગ્રેસના પ્રભારી બનાવાયા છે. યાદ રહે કે, ગુજરાત કોંગ્રેસના પ્રભારીં રહેલા રાજીવ સાતવનું કોરોના સંક્રમણના કારણે માત્ર 47 વર્ષની વયે નિધન થયું હતું.ત્યારથી ગુજરાત પ્રદેશ કોન્ગ્રેસના પ્રભારીનું પદ ખાલી હતું.રાજસ્થાનની કેક્જી વિધાનસભા બેઠકના ધારાસભ્ય રઘુ શર્મા સચિન પાયલટ જૂથમાંથી મંત્રી બન્યા છે.અને રાજસ્થાનના મુખ્યમંત્રી અશોક ગહેલોતના અત્યંત નીક્ટવર્તી ગણાય છે.રઘુ શર્મા રાજસ્થાન કોંગ્રેસ નાં કદાવર નેતા હોવા સાથે રાહુલ ગાંધીના પણ વિશ્વાસુ છે.
નવા પ્રભારી સામે પડકાર -ગુજરાત કોંગ્રેસ
ગુજરાત કોંગ્રેસની સ્થિતિ અત્યારે સારી નથી.લોકમાનસ પર એવી છાપ છે કે, કોંગ્રેસ પાસે કોઈ કદાવર નેતા નથી કે નથી કોઈ વક્તા. નિર્ણાયક મુદ્દાને વ્યાપક અસરકારકતાથી ઉઠાવી નથી શકતા.પરિણામે બધે રકાસ જોવા મળે છે. ગત વર્ષે વિધાનસભાની 8 બેઠકોની પેટા ચૂંટણીમાં કોન્ગ્રેસ એક પણ બેઠક જીતી ના શક્યો.અને સ્થાનિક સ્વરાજની ચૂંટણીમાં રાજકોટ અને સુરતમાં મહાપાલિકામાં એક પણ બેઠક ના મળી. પાલિકા-પંચાયતમાં પણ ગ્રામીણ વિસ્તારમાં જે પ્રભુત્વ કોંગ્રેસનું હતું તે પણ ગુમાવી દીધું. પરિણામે વિરોધ પક્ષના નેતા પરેશ ધાનાણી અને પ્રદેશ પ્રમુખ અમિત ચાવડાએ રાજીનામાં ધરી દીધા. આ વચ્ચે,હાદિક પટેલને ગુજરાત કોન્ગ્રેસના કાર્યકારી અધ્યક્ષ પદ પર નિમણૂક કરી. હવે જ્યારે વિધાન સભા 2022ની ચૂંટણી માટે 'રાત થોડીને વેશ ઝાઝા'જેવો ઘાટ છે ત્યારે, કોંગ્રેસ પાસે એક મોટા ચમત્કારથી કોઈ મોટી આશા ના રાખી શકાય.અને આ ચમત્કાર જન માનસ પર સર્જવો પડે એ પડકાર રઘુ શર્માઝીલવો પડશે.
'શા માટે 'રાત થોડીને વેશ ઝાઝા' ?
રાજ્યમાં ભાજપ મોવડી મંડળે આખી સરકારને ઉતારી મૂકી, નવા નક્કોર ચહેરા ઉતારી દઈ,નવું મંત્રી મંડળ બનાવી દીધું છે. એક ક્યાસ પ્રમાણે મોવડી મંડળ એ તાગ કાઢવા પ્રયાસ કરતુ હોય કે,પાંચ રાજ્યોની ચૂંટણી સાથે ગુજરાતમાં ચૂંટણી કરવી હોય તો જનમત કેટલો ? આ જ મુદ્દો આગળ લઇ,ગુજરાતના પાંચ કેન્દ્રીય મંત્રીને લઇ જન આશિર્વાદ યાત્રાનો તખતો ગોઠવાયો. યાત્રાની પૂર્ણાહૂતીનું રીપોર્ટ કાર્ડ પહોચતા જ આખી સરકાર બદલાઈ ગઈ. દરમિયાન ગાંધીનગર વિધાનસભાની ચૂંટણી નવી સરકારનો પહેલો 'લીટમસ ટેસ્ટ' હતો. ગાંધીનગરમાં વરસોથી કોંગ્રેસ નું પ્રભુત્વ અકબંધ હતું. જે ગત સપ્તાહે યોજાયેલી મહાનગર પાલિકા ચૂંટણીમાં કોન્ગ્રેસના ગઢના કાંગરા 'ય ખેરવી ગયા. મહાપાલિકાની 44 માંથી માંડ 1 બેઠક મળી. પરિણામે ભાજપનો આત્મવિશ્વાસ બુલંદી પર પહોચી ગયો
પ્રાણવાયુ ફૂંકવો એ જ ચમત્કાર
આ જ દૃષ્ટિકોણ થી વિચારો તો,ભાજપ ફેબ્રુઆરી-માર્ચ-એપ્રિલમાં ગુજરાતમાં વિધાનસભાની ચૂંટણી કરી શકે તેવી શક્યતા નકારી શકાય નથી. જો અચાનક આવી રીતે ચૂંટણી ગુજરાતમાં જાહેર થાય તો કોંગ્રેસ માટે 'રાત થોડી ને વેશ ઝાઝા'જેવો ઘાટ સર્જાશે.ગાંધીનગરે એ પણ દર્શાવી દીધું કે 'આપ'તેના 'માપ'થી વધારે વિસ્તરી શકે તેમ નથી. એટલે 'આપ'ને પણ ગુજરાતમાં જનાધાર ખેચવા લોહી-પાણી એક કરવા પડે તેમ છે. માત્ર મુદ્દા આધારિત રાજનીતિ અને નિવેદનીયા નેતાઓના જોરે લોક સિંહાસન પર બીરાજવું એ 'લોઢાનાં ચણા' ચાવવા જેવી બાબત છે. આ તમામ પાસાને ધ્યાને લઈએ તો રઘુ શર્માએ, ખુદ એ ગુજરાત આવી લોહી-પાણી સીંચીને કોંગ્રેસ માટે એવી જડીબુટ્ટી તૈયાર કરવી પડશે કે જેની મહેક માત્રથી મૂર્છિત મતદારમાં નવા પ્રાણનો સંચાર થાય.અને તો જ ગુજરાતમાં કોંગ્રેસનો દમ-ખમ દર્શાય. જેવો કોંગ્રેસનો ભવ્ય ભૂતકાળ હતો.
