Loksabha Election 2024 / 'કદાચ મોદીજીને મારા શબ્દો નહીં ગમ્યાં હોય' ભાજપે ટિકિટ કાપતાં બોલ્યાં સાધ્વી પ્રજ્ઞા

લોકસભા ચૂંટણી માટે ભાજપે જાહેર કરેલી ઉમેદવારોની પ્રથમ યાદીમાં ઘણા વર્તમાન સાંસદોની ટિકિટ કાપવામાં આવી છે જેમાં ભોપાલના સાંસદ પ્રજ્ઞા ઠાકુરનો પણ સમાવેશ થાય છે. તેમની જગ્યાએ આ વખતે આલોક શર્માને તક આપવામાં આવી છે. પ્રજ્ઞા ઠાકુરને જ્યારે ટિકિટ કપાવવા અંગે સવાલ કરવામાં આવ્યો તો તેમણે કહ્યું કે, મેં કેટલાક શબ્દો કહ્યા હશે જે કદાચ મોદીજીને પસંદ નહીં આવ્યાં હોય. કોને ટિકિટ આપવી અને કોને નહીં તે સંગઠનનો નિર્ણય છે. આવામાં ટિકિટ કેમ કપાઈ અને કેવી રીતે કપાઈ તેનો વિચાર જ ન કરવો જોઈએ. "મેં અગાઉ પણ ટિકિટ માંગી નહોતી અને અત્યારે પણ માગી નથી. 

હાલના 34 સાંસદોની ટિકિટ કપાઈ 
ગઈકાલે ભાજપે 195 ઉમેદવારોની યાદી જાહેર કરી છે. તેમાં 34 વર્તમાન સાંસદોની ટિકિટ કાપવામાં આવી છે. પ્રજ્ઞા ઠાકુરની ટિકિટ કપાવાની અટકળો પહેલાથી જ ચાલી રહી હતી. માનવામાં આવી રહ્યું હતું કે પ્રજ્ઞા ઠાકુરના વિવાદિત નિવેદનોથી પાર્ટી નેતૃત્વ નાખુશ છે. આવી સ્થિતિમાં તેમની ટિકિટ પર કાતર ચાલવાની શક્યતા સૌથી વધુ હતી.

ગોડસેને દેશભક્ત કહેવાથી પીએમ મોદી થયા હતા ગુસ્સે 
ઘણીવાર વિવાદિત નિવેદનો આપીને ટીકાથી ઘેરાયેલા પ્રજ્ઞા ઠાકુરે એક નિવેદન આપ્યું હતું જેની પીએમ મોદીએ પણ ટીકા કરી હતી અને કહ્યું હતું કે તેઓ તેમને ક્યારેય માફ નહીં કરી શકે. વાસ્તવમાં તેમણે મહાત્મા ગાંધીના હત્યારા નાથુરામ ગોડસેને સાચા દેશભક્ત ગણાવ્યા હતા. તેમના આ નિવેદનની વિપક્ષની સાથે સાથે પાર્ટીની અંદર પણ ઘણી ટીકા થઈ હતી. પીએમ મોદીએ તો ત્યાં સુધી કહી દીધું હતું કે ભલે તેમણે માફી માંગી લીધી હોય, પરંતુ તેઓ તેમને ક્યારેય માફ નહીં કરી શકે.

2019માં ભોપાલથી દિગ્વિજય સિંહને મોટા અંતરથી હરાવ્યા હતા
2019ની ચૂંટણીમાં સાધ્વી પ્રજ્ઞાએ ભોપાલમાં કોંગ્રેસના મજબૂત નેતા અને પૂર્વ મુખ્યમંત્રી દિગ્વિજય સિંહને મોટા અંતરથી હરાવ્યા હતા. ત્યાર બાદ તે ઘણી વખત વિવાદિત નિવેદનોને કારણે ચર્ચામાં રહી છે.