હેરાનીભર્યો કિસ્સો / પરપુરુષ સાથે પત્નીના શારીરિક સંબંધ માનસિક ક્રૂરતા, પતિ છુટાછેડા લેવા હકદાર- કોર્ટનો ચુકાદો

• પરપુરુષ સાથેના પત્નીના સંબંધો માનસિક ક્રૂરતા સમાન
• જયપુર કોર્ટે પતિને આપ્યાં છુટાછેડા 
• પત્નીના વ્યભિચારથી આઘાત પામેલા પતિએ કરી હતી છૂટાછેડાની અરજી 

રાજસ્થાનની એક કોર્ટે કોઈ મહિલાના પતિ સિવાયના પુરુષ સાથેના ફિઝિકલ રિલેશનને માનસિક ક્રૂરતા સમાન ગણાવીને પતિને છૂટાછેડા લેવા  માટે હકદાર ઠેરવ્યો છે. જયપુરની એક કોર્ટે કહ્યું કે પત્નીના પર પુરુષ સાથે શારીરિક સંબંધ ગંભીર માનસિક ક્રૂરતા છે. કોર્ટમાં રજૂ કરવામાં આવેલા વીડિયો, ફોટોગ્રાફ્સ અને અન્ય સંજોગપૂર્ણ પુરાવાઓ સ્પષ્ટ પણે સાબિત કરે છે કે લગ્ન પછી પણ મહિલાએ અન્ય પુરુષો સાથે શારીરિક સંબંધ બાંધ્યા હતા. આવી સ્થિતિમાં, અરજદાર પતિ તેને છૂટાછેડા આપવાનો હકદાર છે.

પતિએ પત્નીના ગેરકાયદેસરના સંબંધોના ફોટા-વીડિયો રજૂ કર્યાં હતા 
કોર્ટે કહ્યું કે અરજદાર મહિલાએ પોતાના પતિ દ્વારા બનાવવામાં આવેલા ગેરકાયદેસરના સંબંધના વીડિયો અને ફોટોગ્રાફ્સને નકલી ગણાવ્યા છે, પરંતુ ન તો તેણે ના પાડી છે કે ન તો પોલીસમાં કોઈ રિપોર્ટ નોંધાવ્યો છે. આવી સ્થિતિમાં, તે સાબિત થાય છે કે પત્નીને અન્ય પુરુષ સાથે ગેરકાયદેસર સંબંધ છે. કોર્ટે સોફ્ટવેર એન્જિનિયર પતિની છૂટાછેડાની અરજી સ્વીકારતા આ આદેશ આપ્યો હતો. 

સોશિયલ મીડિયા દ્વારા પતિને થઈ પત્નીના આડાસંબંધોની જાણ 
કેસ મુજબ પતિએ કોર્ટમાં છૂટાછેડા માટે અરજી કરી હતી. જેમાં જણાવવામાં આવ્યું હતું કે, અરજદાર મહિલા સાથે તેના લગ્ન ફેબ્રુઆરી 2020ના રોજ થયા હતા. લગ્નના થોડા દિવસ બાદ મહિલાએ અરજદારને છૂટાછેડા આપવાનું કહ્યું હતું. આ સમય દરમિયાન તે તેની સાથે યોગ્ય વર્તન પણ કરતી ન હતી અને દરરોજ ઝઘડા કરતી રહી હતી. અને જુલાઈ 2020માં તે તેના ભાઈ સાથે રહેવા ગઈ. આ દરમિયાન ઓક્ટોબર 2020માં અરજદારે સોશિયલ મીડિયા પર અન્ય એક મહિલાનો સંપર્ક કર્યો હતો. મહિલાએ જણાવ્યું કે તેના પતિના અરજદારની પત્ની સાથે આડા સંબંધ હતા.

મહિલાએ વીડિયો-ફોટાને નકલી ગણાવ્યાં 
ત્યારબાદ મહિલા અરજદારને મળી હતી અને અરજદારની પત્ની અને તેના પતિના સેક્સ વીડિયો અને ફોટા આપ્યા હતા. પોતાની પત્નીના પરપુરુષ સાથેનો વ્યભિચાર જોતા પતિને ભારે માનસિક આઘાત લાગ્યો હતો અને તેણે પત્નીથી અલગ થવાનો નિર્ણય કરતાં કોર્ટમાં છુટાછેડાની અરજી કરી હતી.જોકે પત્નીએ આ વીડિયો અને ફોટા ખોટા ગણાવ્યાં હતા. બન્ને પક્ષની દલીલો સાંભળ્યા બાદ કોર્ટે માનસિક ક્રૂરતાના આધારે અરજી સ્વીકારી છૂટાછેડાનું ફરમાન બહાર પાડ્યું છે.