ગુજરાતમાં લમ્પી વાયરસનો કાળો કહેર છે, જેના કારણે એક બાદ એક પશુઓ ભોગ બની મોતને ભેટી રહ્યા છે. આ વચ્ચે કેન્દ્રીય પશુપાલન મંત્રી પરસોત્તમ રૂપાલાએ મહત્વનું નિવેદન આપ્યું છે. તેમણે જણાવ્યું કે, કેન્દ્ર સરકાર સતત આ મુદ્દે નજર રાખી રહી છે.
Share
લમ્પી વાયરસ મુદ્દે કેન્દ્રીય પશુપાલન મંત્રીનું નિવેદન
ભારત સરકાર દ્વારા કંટ્રોલ રૂમ શરૂ કરાયા
લમ્પીના કારણે દૂધ ઉત્પાદનમાં કોઈ ઘટાડો થયો નથીઃ રૂપાલા
ગાંધીનગર ખાતે 11માં એગ્રી એશિયા એક્સ્પોનું ઉદ્ઘાટન કરવામાં આવ્યું છે. મુખ્યમંત્રી ભૂપેન્દ્ર પટેલના હસ્તે આજે ગાંધીનગર ખાતે 11માં એગ્રી એશિયા એક્સ્પોનું ઉદ્ઘાટન કરવામાં આવ્યું છે. આ તકે કેન્દ્રીય મંત્રી પરસોત્તમ રૂપાલા પણ હાજર રહ્યા હતા. કાર્યક્રમ પૂર્ણ થયા બાદ તેમણે લમ્પી વાયરસને લઈને મહત્વનું નિવેદન આપ્યું.
કેન્દ્રીય પશુપાલન મંત્રી પરસોત્તમ રૂપાલાએ જણાવ્યું કે, ભારત સરકાર દ્વારા લમ્પી વાયરસને લઈને કંટ્રોલ રૂમ શરૂ કરાયો છે. કેન્દ્રીય સ્તરે તેનું દરરોજ મોનિટરીંગ કરવામાં આવી રહ્યું છે. અમે દરેક રાજ્યોની સાથે સંપર્કમાં છીએ. આ રોગનો સામનો કેવી રીતે કરી શકાય તે માટે ભારત સરકાર વતી દરેક રાજ્યોને એક એડવાઇઝરી આપવામાં આવી છે. પાંચ રાજ્યોની મેં પ્રત્યક્ષ રીતે મુલાકાત લીધી છે.
કેન્દ્રીય મંત્રીએ વધુમાં જણાવ્યું કે, આજે ગુજરાતમાં 15 જિલ્લાઓમા ડેથ રેટ શૂન્ય થઈ ગયો છે. આ ઉપરાંત લમ્પી વાયરસના કારણે દૂધ ઉત્પાદનમા કોઈ ઘટાડો થયો નથી. પશુઓને આપવામાં આવતી વેક્સિનનું ઉત્પાદન પણ વધારી દેવામાં આવ્યું છે.
શું છે લમ્પી વાયરસના લક્ષણો?
અત્રે ઉલ્લેખનીય છે કે, લમ્પી સ્કીન ડિસીઝ એક વાયરસ જન્ય રોગ છે, જેનો ફેલાવો મચ્છર, માખી, જૂ, ઇતરડી વગેરે દ્વારા તથા રોગિષ્ઠ પશુ સાથે સીધો સંપર્ક, દૂષિત ખોરાક અને પાણીથી પણ ફેલાય છે. પશુઓમાં સામાન્ય તાવ, આંખ-નાકમાંથી પ્રવાહી આવવું, મોઢામાંથી લાળ પડવી, આખા શરીરે ગાંઠો જેવા નરમ ફોલ્લા થવા, પશુનું દૂધ ઉત્પાદન ઘટવું તથા ખાવાનુ બંધ કરવું કે ખાવામાં તકલીફ પડવી વગેરે આ રોગના લક્ષણો છે. અમુક સંજોગોમાં ગાભણ પશુ તરવાઇ જાય અને ક્યારેક મૃત્યુ પણ પામે છે.
લમ્પી વાયરસને અટકાવવા શુ કરવું?
પશુપાલકોને તકેદારી સાથે સતર્ક રહેવા અંગે અપીલ કરતાં જણાવ્યું હતું કે, જો કોઈ પશુઓમાં આ રોગના લક્ષણો જણાય તો પશુપાલકોએ એનિમલ હેલ્પલાઈન નં. 1962 પર ફોન કરવો તથા નજીકના સરકારી પશુ દવાખાનાનો સંપર્ક કરવો, જેથી સમયસર સારવાર અને રસીકરણ કરી અન્ય પશુઓમાં આ રોગ ફેલાતો અટકાવી શકાય છે અને આ રોગ પર નિયંત્રણ મેળવી શકાય છે. પશુપાલકોએ સ્થાનિક પશુચિકિત્સા અધિકારીના સૂચન મુજબ રોગીષ્ઠ પશુને સૌ પ્રથમ બીજા તંદુરસ્ત પશુઓથી અલગ કરવુ તથા તેના ખોરાક, પાણી અને માવજત અલગથી કરવી, રોગગ્રસ્ત વિસ્તારમાંથી પશુનું સ્થાળાંતર બંધ કરવું, પશુઓના રહેઠાણની જગ્યાએ સ્વચ્છતા રાખવી, પશુ ચિકિત્સા અધિકારીની સલાહ મુજબ યોગ્ય દવાઓ દ્વારા માખી, મચ્છર અને ઇતરડીના ઉપદ્રવનો અટકાવ કરવો, જેથી આ રોગનું સંક્રમણ અટકાવી શકાય.
