મોંઘવારી / હજી વધી શકે છે ડુંગળીના ભાવ, દેશમાં સર્જાઈ શકે છે મોટી અછત, આ છે કારણ

આ વર્ષે દેશમાં ડુંગળીની મોટી અછત સર્જાઈ શકે છે, કારણ કે ગત વર્ષ કરતા આ વખતે ડુંગળીના ઉત્પાદનમાં 47 લાખ ટન કરતા વધુનો ઘટાડો થયો છે. કેન્દ્ર સરકારે 2022-23માં બાગાયતી પાક અને ઉત્પાદનના અંતિમ અનુમાનની સાથે જ 2023-24ના આગોતરા અનુમાન પણ જાહેર કર્યા છે. આ રિપોર્ટમાં એ વાતનો ખુલાસો થયો છે કે 2023-24માં ડુંગળીનું ઉત્પાદન ગત વર્ષના લગભગ 302.08 લાખ ટનની સરખામણીએ આગામી વર્ષે 254.73 લાખ ટન રહેવાની શક્યતા છે. તેનું કારણ એ છે કે ડુંગળીનું મુખ્ય ઉત્પાદન કરતા રાજ્યોમાં જ ઉત્પાદન ઘટ્યું છે. મહારાષ્ટ્રમાં 34.31 લાખ ટન, કર્ણાટકમાં 9.95 લાખ ટન, આંધ્રપ્રદેશમાં 3.54 લાખ ટન અને રાજસ્થાનમાં 3.12 લાખ ટન જેટલું ઉત્પાદન ઘટ્યું છે. જેને કારણે ડુંગળી હજી મોંઘી થઈ શકે છે.

કૃષિ વિભાગે રાજ્યો અને અન્ય સરકારી સ્રોત એજન્સીઓ પાસેથી મેળવેલી માહિતીના આધારે 2022-23ના અંતિમ અનુમાન અને 2023-24ના પહેલા આગોતરા અનુમાન જાહેર કર્યા છે. જે મુજબ બાગાયતી પાક અને ઉત્પાદનમાં વધારો થયો છે. 2021-22માં બાગાયતી પાકનો વિસ્તાર 28.04 મિલિયન હેક્ટર હતો, જે 2023-24ના પહેલા આગોતરા અનુમાનમાં વધીને 28.77 મિલિયન હેક્ટર થયો છે. બાગાયતી પાકનું ઉત્પાદન 2021-22માં 347.18 મિલિયન ટન હતું, જે 2023-24ના પહેલા આગોતરા અનુમાનમાં વધીને 355.25 લાખ ટન થયું છે.

બીજી તરફ ભારત સરકારે ડુંગળીની નિકાસ પર લગાવેલા પ્રતિબંધોને હળવા કરવાની શરૂઆત કરી છે. ઘરેલુ માર્કેટમાં ડુંગળીનો સપ્લાય રેગ્યુલર થતા અને ડુંગળીની કિંમતમાં ઘટાડો થતા સરકારે આ નિર્ણય લીધો છે. જેને કારણે પાડોશી દેશોમાં ડુંગળીની કિંમતમાં ઘટાડો થશે. તાજેતરમાં જ કેન્દ્ર સરકારે ભૂટાન, બહેરીન અને મોરેશિયસમાં ડુંગળી મોકલવા માટે પરવાનગી આપી છે. વિદેશ વેપાર મહાનિર્દેશાયલે એક નોટિફિકેશન જાહેર કર્યું છે, જેમાં કહેવામાં આવ્યું છે કે ભૂટાન, મોરેશિયસ અને બહેરીનમાં હવે ડુંગળીની નિકાસ કરી શકાશે. 

વાંચવા જેવું: અમદાવાદ ક્રાઈમ બ્રાંચમાં મહિલા ડૉક્ટરના આપઘાત મામલે PIને બચાવવા પોલીસ મેદાને, કહ્યું 'બંને વચ્ચે મનદુઃખ થતા...'

કેમ લગાવાયો હતો પ્રતિબંધ?
ભારત સરકારે ડુંગળીની નિકાસ પર ગત વર્ષે પ્રતિબંધ મૂક્યો હતો. ડુંગળીની સ્થાનિક માર્કેટમાં અછત સર્જાતા આ પ્રતિબંધ મૂકવામાં આવ્યો હતો. ડુંગળીની નિકાસ પર આ પ્રતિબંધ ડિસેમ્બર 2023થી માર્ચ 2024 સુધી લગાવાયો હતો. જેને કારણે ડુંગળીની કિંમતો ઘટાડવામાં મદદ પણ મળી હતી. 

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો