ઘટસ્ફોટ / ઓહો..૩૫ રાજ્યના ૨૮ હજાર લોકો સાથે ૧૦૦ કરોડની ડિઝીટલ ઠગાઈ, દેશભરમાં ૧,૩૪૬ FIR સમગ્ર મોડસ ઓપરેન્ડીનો પર્દાફાશ

• સાયબર ફ્રોડનાં નેટવર્કનો પર્દાફાશ કરતી હરિયાણા  પોલીસ
• સાયબર ક્રિમિનલ નેટવર્ક દ્વારા રૂા. 100 કરોડની ઠગાઈનો પર્દાફાશ
• પાંચ હજાર પોલીસકર્મીઓની બનેલી 102 ટીમોએ સાગમટે દરોડા પાડ્યા

સાયબર ક્રિમિનલના નેટવર્કના પર્દાફાશ દરમિયાન એવો ચોંકાવનારો ઘટસ્ફોટ થયો છે કે, આ ઠગ વિવિધ ડિજિટલ પેમેન્ટ પ્લેટફોર્મનો ઉપયોગ કરીને લોકો સાથે ઠગાઈ આચરતા હતા. તપાસ ટીમે આ માટે ટીએસપી, આઈએસપી, બેન્ક, એનપીસીઆઈ, યુપીઆઈ, યુઆઈડીએઆઈ, ડીઓટી, સોશિયલ મીડિયા પ્લેટફોર્મ ફેસબુક, વોટ્સએપ, ઓએલએક્સ જેવા ડિજિટલ પ્લેટફોર્મ સંબંધિત જાણકારી એકત્ર કરી હતી અને કઈ રીતે ઠગાઈ કરવામાં આવી હતી તેની સમગ્ર મોડસ ઓપરેન્ડીનો પર્દાફાશ કર્યો હતો.
સાયબર ક્રિમિનલના એક મસમોટાં નેટવર્કનો પર્દાફાશ 
હરિયાણા પોલીસે નૂંહનાં ગામડાંમાં ફેલાયેલાં સાયબર ક્રિમિનલના એક મસમોટાં નેટવર્કનો પર્દાફાશ કર્યો છે.  હરિયાણામાં એક નવું ‘જામતારા’ ઊભું થયું છે કે, અસલી જામતારા ઝારખંડમાં આવેલું છે અને સાયબર ઠગનો ગઢ ગણાય છે.  હરિયાણાના જામતારા બનેલા નૂંહનાં ગામમાં સ્પેશિયલ ઓપરેશન હાથ ધરીને ઝડપી લેવામાં આવેલા સાયબર ક્રિમિનલની પૂછપરછના આધારે ચોંકાવનારા ખુલાસા થયા છે.

૧૦૦ કરોડની ઠગાઈ થઈ હોવાનો પર્દાફાશ
હરિયાણા પોલીસે સાયબર ક્રિમિનલના નેટવર્ક દ્વારા રૂપિયા ૧૦૦ કરોડની ઠગાઈ થઈ હોવાનો પર્દાફાશ કર્યો છે. આ સાયબર ક્રિમિનલ નકલી સિમ કાર્ડ, આધાર કાર્ડ વગેરે દ્વારા દેશભરમાં ઠગાઈને અંજામ આપતા હતા. એટલું જ નહીં, આ અપરાધીઓએ બોગસ બેન્ક એકાઉન્ટ પણ ખોલી રાખ્યાં હતાં.  જેમાં તેઓ ઠગાઈનાં નાણાં ટ્રાન્સફર કરતા હતા કે જેથી પોલીસ તેમના સુધી પહોંચી શકે નહીં.
પાંચ હજાર પોલીસકર્મીઓની બનેલી 102 ટીમોએ સાગમટે દરોડો પાડ્યો
આ અપરાધીઓએ દિલ્હીથી લઈને આંદામાન-નિકોબાર સુધી લોકોને નિશાન બનાવ્યા હતા. આ સાયબર ક્રિમિનલનું મહાનેટવર્ક સમગ્ર દેશમાં પથરાયેલું હતું અને પોલીસે સ્પેશિયલ ઓપરેશન હાથ ધરીને સાયબર ક્રાઈમના લગભગ ૨૮,૦૦૦ કેસ પકડી પાડ્યા છે. દેશભરમાં વિવિધ પોલીસ સ્ટેશનમાં સાયબર ક્રિમિનલ સામે ૧,૩૪૬ એફઆઈઆર દાખલ કરવામાં આવી છે. નૂંહના પોલીસ અધિક્ષક વરુણ સિંગલાએ જણાવ્યું હતું કે, ૨૭-૨૮ એપ્રિલની રાતે ૫,૦૦૦ પોલીસકર્મીઓની બનેલી ૧૦૨ ટીમોએ નૂંહ જિલ્લાના ૧૪ ગામમાં સપાટો બોલાવીને એકસાથે દરોડાની કાર્યવાહી હાથ ધરીને ૧૨૫ શકમંદ હેકર્સને ઝડપી લીધા હતા. તેમાંથી ૬૬ આરોપીની ઓળખ કરીને તેમની ધરપકડ કરવામાં આવી છે અને આ તમામને કોર્ટમાં રજૂ કરીને ૧૧ દિવસના રિમાન્ડ મેળવવામાં આવ્યા હતા. ત્યારબાદ આ સાયબર ક્રિમિનલની સખ્તાઈથી સઘન પૂછપરછ કરવામાં આવી હતી.
નવી નવી ટેક્નિકથી લોકો સાથે છેતરપિંડી કરતા
સાયબર અપરાધીઓએ જણાવ્યું છે કે તેઓ નકલી સિમ અને આધાર કાર્ડ મારફતે નવી નવી ટેક્નિકથી લોકો સાથે છેતરપિંડી કરતા હતા. પોલીસ દરોડા દરમિયાન જપ્ત કરાયેલા મોબાઈલ-સિમ કાર્ડની પણ તપાસ કરી રહી છે.  આ સાયબર ક્રિમિનલને રિમાન્ડ પર લીધા બાદ હરિયાણાના ડીજીપી પ્રશાંતકુમારે આ ઠગ ટોળકીની પૂછપરછ માટે સમગ્ર રાજ્યમાંથી ૪૦ સાયબર એક્સપર્ટની એક ટીમ તૈયાર કરી હતી. આ એક્સપર્ટની મદદથી ઝડપાયેલા સાયબર ઠગની પૂછપરછ કરવામાં આવી હતી.