ખુલાસો / હવે નબીરો તથ્ય નહીં બચી શકે.! ઇસ્કોન બ્રિજ અકસ્માતમાં મળ્યું સૌથી મોટું સબૂત, ચાર્જશીટમાં કરાયો ઉલ્લેખ

• અમદાવાદના ઇસ્કોન અકસ્માત મામલે મોટો ખુલાસો 
• જેગુઆર કારમાંથી મળેલા વાળ અને તથ્યનો DNA રિપોર્ટ થયો મેચ
• આવતીકાલે ચાર્જશીટમાં પોલીસ DNA રિપોર્ટ પણ મુકશે 

 અમદાવાદનાં ઈસ્કોન અકસ્માત મામલે વધુ એક મોટો ખુલાસો થયો છે. જેમાં જગુઆર કારમાંથી મળેલા વાળ અને તથ્યનો DNA  રિપોર્ટે મેચ થયો છે. ડ્રાઈવિંગ સીટ પર પોલીસને વાળ મળ્યા હતા. આવતીકાલે ચાર્જશીટમાં પોલીસ DNA  રિપોર્ટ પણ મુકશે. ત્યારે DNA  રિપોર્ટ બાદ તથ્ય જ ગાડી ડ્રાઈવ કરી રહ્યો હોવાનો પણ ખુલાસો થયો હતો. 

ગત રોજ જેગુઆર કંપનીએ UK થી લાઈટિંગ ઈફેક્ટ અંગે રિપોર્ટ મોકલ્યો હતો
ઈસ્કોન બ્રિજ અકસ્માત મામલે જેગુઆર કંપનીએ UK થી લાઈટિંગ ઈફેક્ટ અંગે રિપોર્ટ મોકલ્યો છે. રોડ પર પૂરતી લાઈટ ન હોવાનું તથ્ય પટેલે બહાનું કાઢ્યું હતું. ત્યારે આરોપી તથ્ય પટેલે પોલીસને આપેલા નિવેદનમાં ખોટું બોલ્યો હતો. જેગુઆર કંપનીએ રિપોર્ટમાં 300 મીટર સુધી લાઈટ હોવાનો ખુલાસો કર્યો હતો. તેમજ જગુઆર કંપનીએ ગાડીમાં કોઈ ખામી નહી હોવાનો પણ રિપોર્ટમાં ખુલાસો કર્યો છે. 
તથ્ય પટેલે અનેક વખત નિયમો તોડ્યા છે
અમદાવાદ ઇસ્કોન બ્રિજ અકસ્માત કેસમાં નવો ખુલાસો સામે આવ્યો છે. આરોપી તથ્ય પટેલ પહેલાથી જ કારને સ્પીડમાં ચલાવતો હતો. છેલ્લા એક મહિનામાં તથ્યએ 25 વખત સ્પીડ લિમિટનાં નિયમ તોડ્યા હતાં. પરંતુ નવાઈની વાત તો એ છે કે 25 વખત નિયમ તોડ્યા છતાં એક પણ વખત તેના નામે ચલાન કપાયું નહોતું. હાઈવે પર સ્પીડ ટ્રેકર લાગ્યાં હોવા છતાં તથ્ય જેવા નબીરાઓ કાયદાનું ઉલ્લંઘન કરતાં રહે છે જેમાં બદનસીબે નિર્દોષ લોકો પોતાનો જીવ ગુમાવે છે.

સિગ્નલ તોડવાનો એક્સપર્ટ હતો તથ્ય
માહિતી અનુસાર તથ્યએ છેલ્લાં એક મહિનામાં 5 વખત રેડલાઈટ સિગ્નલ તોડ્યું હતું. સિગ્નલ તોડ્યું હોય કે ઓવર સ્પીડીંગ- તથ્યના નામે એકપણ વખત મેમો કપાયો નથી. તથ્યએ એસ.જી.હાઈવે, સિંધુભવન રોડ અને એસ.પી રીંગ રોડ પર સ્પીડમાં કાર ચલાવતો હતો અને અંતે તેણે ઈસ્કોન બ્રિજ પર 9 લોકોનો જીવ એક જ સેકન્ડમાં લઈ લીધો.
કારની લાઇટનો પ્રકાશ પૂરતો હોવાનું આવ્યું સામે
પોલીસે તથ્ય વિરુદ્ધ પુરાવા એકત્ર કર્યા છે. તથ્ય વિરુદ્ધ પોલીસે એકત્ર કરેલ પુરાવાઓમાં સૌથી મોટો પુરાવો કારની સ્પીડ છે. FSLના રિપોર્ટમાં અકસ્માત સમયે કારની સ્પીડ 142.5 હોવાનું સામે આવ્યું છે. આ ઉપરાંત રોડ પર પૂરતું વિઝિબ્લિટી વિઝન હોવાનું અને કારની લાઇટનો પ્રકાશ પૂરતો હોવાનું પણ તપાસમાં સામે આવ્યું છે.