વ્હિપનું ઉલ્લંઘન / ભાજપમાં આંતરિક ડખો: પૂર્વમંત્રી અરવિંદ રૈયાણી અને સાથીઓને નોટિસ સી.આર.પાટીલે ફટકારી શિસ્તભંગની નોટિસ, જાણો મામલો

• ભાજપમાં આંતરિક લડાઈ ચરમસીમાએ 
• અરવિંદ રૈયાણી અને તેના સાથીઓને નોટિસ 
• 7 દિવસમાં જવાબ આપવા કરાયો આદેશ 
• સી.આર.પાટીલે ફટકારી શિસ્તભંગની નોટિસ

રાજકોટ લોધિકા સંઘની ચૂંટણી વખતે વ્હિપનું ઉલ્લંઘન કરનાર પૂર્વ મંત્રી અરવિંદ રૈયાણી, નીતિન ઢાંકેચા, બાબુ નસીત અને મનસુખ સરધારાને પ્રદેશ ભાજપ પ્રમુખ સી.આર.પાટીલે નોટિસ ફટકારી સાત દિવસમાં ખુલાસો કરવા તાકીદ કરતા જીલ્લાનાં રાજકારણમાં ગરમાવો આવી ગયો હતો. આઠેય આગેવાનો સામે કડક પગલા લેવાય તેવી શક્યતાઓ છે.

લોધિકા સંઘની ચૂંટણીમાં પૂર્વ મંત્રીએ અલગ જૂથ બનાવી પાર્ટીનાં આદેશનું ઉલ્લંઘન કર્યું
તાજેતરમાં જ રાજકોટમાં લોધિકા સંઘની ચૂંટણીમાં પૂર્વ મંત્રી અરવિંદ રૈયાણી અને  નીતિન ઢાંકેચા સહિતનાં નેતાઓએ અલગ જૂથ બનાવી પાર્ટીનાં આદેશનું ઉલ્લંઘન કર્યું હતું. ત્યારે 2 મે નાં રોજ લોધિકા સંઘની ચૂંટણી યોજાઈ હતી. જેમાં જીલ્લા ભાજપ પ્રમુખ અલ્પેશ ઢોલરિયા સહિતનાઓ હાજર રહ્યા હતા. અને સંઘનાં પ્રમુખ તરીકે નરેન્દ્રસિંહ જાડેજાને રિપીટ કરાયા હતા.
પાર્ટી વિરૂદ્ધ પ્રવૃતિ કરતા પ્રદેશ પ્રમુખે કારણ દર્શક નોટીસ ફટકારી
પૂર્વ મંત્રી અરવિંદ રૈયાણી તેમજ તેમનાં સાથીદારો દ્વારા કરવામાં આવેલ પાર્ટી વિરૂદ્ધ પ્રવૃતિનાં કારણે રાજકારણમાં ગરમાવો આવી ગયો હતો. જે બાદ પ્રદેશ પ્રમુખ બે દિવસ પૂર્વ અરવિંદ રૈયાણી, નીતિન ઢાંકેચા, બાબુ નસીત, મનસુખ સરધારા, ભીમજી કલોલા, કાનજી ખાપરા, નરેન્દ્ર ભુવા અને અરજણ રૈયાણીને કારણદર્શક નોટીસ આપી હતી.

વિધાનસભા ચૂંટણી વખતે પક્ષ વિરોધી કામગીરી કરતા કાર્યકરોમાં અસંતોષ
તાજેતરમાં જ યોજાયેલી વિધાનસભાની ચૂંટણીમાં અરવિંદ રૈયાણીની ટિકિટ કપાયા બાદ જીલ્લા અને સહકારી રાજકારણમાં પોતાનું વર્ચસ્વ જમાવવાનો પ્રયત્ન કર્યો હતો. પરંતું વિધાનસભાની ચૂંટણી વખતે પક્ષ વિરોધી કામગીરી કરતા પક્ષમાં તેમની આ કામગીરીથી કાર્યકરોમાં અસંતોષ જોવા મળી રહ્યો હતો.