ગુજ'રાજ' 2022 / નેતાઓ જ નહીં, આપણાં ગુજરાતી મતદારો પણ કોઈનાથી ઓછા નથી! વોટિંગ કરવા જુઓ કઈ રીતે પહોંચ્યા

• લોકશાહીનો પર્વ ઉજવવા ખેડૂતો-યુવાનોમાં થનગનાટ
• અમરેલી-સાવરકુંડલામાં ખેડૂત બળદગાડામાં બેસીને મત આપવા પહોંચ્યા
• સુરતમાં ત્રણ યુવાનો મતદાન કરવા ઘોડા પર પહોંચ્યા

ગુજરાત વિધાનસભાની ચૂંટણીને લઈ આજે પ્રથમ તબક્કાનું મતદાન છે. તેવામાં આજે મતદારોએ અનેક સંદેશા સાથે લોકોને  મતદાન કરવા અપીલ કરી હતી. આજે નેતાઓની સાથે સાથે સામાન્ય વ્યક્તિ પણ અનોખી રીતે મતદાન મથકે પહોંચ્યા હતા. આજે અમરેલી-સાવરકુંડલાના આંબરડી ખાતે ખેડૂતો બળદ ગાડામાં મતદાન કરવા નીકળ્યા હતા. આ સાથે સુરતના કતારગામ બેઠક પર ત્રણ યુવાનો ઘોડા પર સવાર થી મતદાન મથકે પહોચ્યા હતા. 

બળદ ગાડામાં મતદાન કરવા પહોંચ્યા ખેડૂત 

લોકશાહીના પર્વને ઉજવવામાં ખેડૂતોમાં થનગનાટ જોવા મળ્યો છે. અમરેલી-સાવરકુંડલાના આંબરડી ખાતે આજે ખેડૂતો બળદ ગાડામાં મતદાન કરવા નીકળ્યા હતા બળદ ગાડામાં ખેડૂતો જય જવાન જય કિસાન ના નારા ઓ નાખતા મતદાન મથકે પહોંચ્યા હતા. વિગતો મુજબ ખેડૂત નેતા મહેશ ચોડવડીયા સહપરિવાર બળદ ગાડામાં મતદાન મથકે પહોંચ્યા હતા. જ્યાં મતદાન મથકની બહાર બળદ ગાડું છોડીને ખેડૂતો મતદાન કરવા પહોંચ્યા હતા. 

સુરતમાં ત્રણ યુવાનો ઘોડા પર મતદાન કરવા પહોંચ્યા 

સુરતના કતારગામ બેઠક પર યુવા મતદારો અલગ અંદાજ મતદાન કરવા પહોંચ્યા છે. જેમાં ત્રણ યુવાનો ઘોડા પર સવાર થી મતદાન મથકે પહોંચ્યા હતા. યુવાનોએ કહ્યું હતું કે, મતદારોમાં મતદાન જાગૃત્તિ માટે નવો પ્રયોગ કર્યો છે. આ સાથે યુવાઓએ કહ્યું હતું કે,  મતદાર રાજા છે અને અશ્વ સવારી કરીને રાજાની જેમ મતદાન કરવા આવ્યા છીએ. મહત્વનું છે કે, ઘોડા પર સવારથી આવેલા જોઈ લોકોમાં પણ આશ્ચર્ય જોવા મળ્યું હતું.  

આ સાથે આજે મતદારોએ અનેક સંદેશા સાથે લોકોને  મતદાન કરવા અપીલ કરી હતી. જેમાં નવસારીમાં લગ્ન કર્યા પહેલાં પીઠી લગાવીને યુવકે મતદાન કરી લોકોને મતદાન કરવા અપીલ કરી છે. આ સાથે  સુરતના મેયર હેમાલી બોઘાવાલા સાયકલ પર બેસીને મત આપવા આવ્યાં હતા. સાયકલ પર બેનર લગાવી મતદાન કરવા લોકોને અપીલ કરી. 

આ તરફ અમરેલીમાં કોંગ્રેસના ઉમેદવાર પરેશ ધાનાણીએ સાયકલ પર ગેસનો બાટલો મુકી મોંઘવારીનો વિરોધ કર્યો હતો. આ સાથે દરેકને મતદાન કરવા અપીલ કરી હતી. આ સાથે ગોંડલમાં એક વૃદ્ધા પોલીસ સહાયતાથી મતદાન મથકે પહોંચ્યા હતા. જ્યાં તેમણે વૃદ્ધાએ મતાધિકારનો ઉપયોગ કરી અન્યને મતદાન કરવાનો સંદેશ આપ્યો હતો.