રજૂઆત / અમદાવાદમાં ડ્રગ્સનું દૂષણ ડામવા પોલીસ કમિશનર એક્શનમાં, ગૃહ વિભાગ સમક્ષ માંગી આ મંજૂરી

• અમદાવાદના સિંધુભવન રોડ પર બનશે નાર્કોટિક્સ પોલીસ સ્ટેશન
• પોલીસ કમિશનરે ગૃહ વિભાગ પાસે માંગી મંજૂરી
• સિંધુભવન રોડ પર ડ્રગ્સનું દૂષણ ડામવા માંગી મંજૂરી

અત્યાર સુધી પંજાબ રાજ્યને ઉડતા પંજાબ કહેવામાં આવતું હતું. કેમકે પંજાબમાં ડ્રગ્સનું સેવન અને વેચાણ સૌથી વધુ થતું હતું. જોકે, થોડા સમયથી ગુજરાતમાં પણ ડ્રગ્સનું દૂષણ વધી રહ્યું છે. ગુજરાતમાં પણ ડ્રગ્સનો નશો યુવાધનને બરબાદ કરતો હોવાના અનેક કિસ્સાઓ સામે આવી રહ્યા છે. અમદાવાદમાં પણ છાશવારે ડ્રગ્સ પેડલર ઝડપાવવાના સમાચાર સામે આવી રહ્યા છે.

સિંધુભવન રોડ પર બનશે નાર્કોટિક્સ પોલીસ સ્ટેશન
અમદાવાદના જાણીતા એસબીઆર એટલે કે સિંધુભવન રોડ પર પોશ વિસ્તારના યુવાનોને ડ્રગ્સના રવાડે ચડાવવામાં આવી રહ્યા હોવાની માહિતી ખૂલતાં ચકચાર મચી જવા પામી છે. ત્યારે હવે સિંધુભવન રોડ પર ડ્રગ્સના દૂષણને ડામવા માટે પોલીસ કમિશનરે નાર્કોટિક્સ પોલીસ સ્ટેશન બનાવવા માટે મંજૂરી માંગી છે. 

પોલીસ કમિશનરે માંગી મંજૂરી
સિંધુભવન રોડ પર નાર્કોટિક્સ પોલીસ સ્ટેશન બનાવવા માટે કમિશનરે ગૃહ વિભાગ પાસે મંજૂરી માંગી છે. પોલીસ કમિશનરે ત્રણ 3 સ્થળોએ સર્વે કર્યા બાદ રાજ્યના ગૃહ વિભાગ પાસે સિંધુભવન રોડ પર નાર્કોટિક્સ પોલીસ સ્ટેશન બનાવવા માટે મંજૂરી માંગી છે. 

સિંધુભવન રોડ પરથી ઝડપાયા હતા બે પેડલર
આપને જણાવી દઈએ કે, તાજેતરમાં સિંધુભવન રોડ પરથી ડ્રગ્સ સાથે બે પેડલર ઝડપાયા હતા. SOGની ટીમે મૂળ પાલનપુરના રહેવાસી ઇરફાન ઉર્ફે પોપટ સિંધી અને નયામત અલી ખાન નાગોરી નામના બે શખ્સોની ધરપકડ કરી હતી. બંને આરોપીઓ ડ્રગ્સની ડિલિવરી કરવા આવતા પહેલાં જ એસઓજીના હાથે ઝડપાઈ ગયા હતા. 

લાખોનો મુદ્દામાલ કર્યો હતો કબજે
તેઓની પાસેથી પોલીસે 29 લાખનું 296 ગ્રામ એમડી ડ્રગ્સ કબજે કર્યું છે. આ બંને પાલનપુરથી ખાસ અમદાવાદના સિંધુ ભવન રોડ પર આપવા આવ્યા હતા. આરોપીઓ અત્યાર સુધીમાં છેલ્લા 6 માસમાં ત્રણ વાર અમદાવાદ આવી એમડી ડ્રગ્સની ડિલિવરી કરી ચૂક્યા છે.