ટાઈટેનિકથી પણ 7 વર્ષ પહેલા ડૂબેલું જહાજ આખરે મળી ગયું છે. 1904ની સાલમાં SS Nemesis નામનું કાર્ગો જહાજ કોલસાની હેરાફેરી વખતે ભારે તોફાનને કારણે ઓસ્ટ્રેલિયાના દરિયામાં ડૂબી ગયું હતું અને તેની સાથે 32 પ્રવાસીઓ પણ ગુમ થઈ ગયા હતા. જહાજ ડૂબ્યાંના થોડા અઠવાડિયા બાદ 32 પ્રવાસીઓને લાશો તરતી તરતી મળી આવી હતી પરંતુ જહાજની કોઈ ભાળ મળી નહોતી. આ ઘટનાને 120 વર્ષ વીતી ગયાં હતા અને હવે આ જહાજની ભાળ મળી છે.
કેવી રીતે શોધાયું
120 વર્ષથી આ જહાજની શોધ ચાલતી હતી થોડા દિવસ પહેલા Marine Services એજન્સીએ દરિયામાં 525 ફૂટ ઊંડેથી તેને શોધી કાઢ્યું હતું. ચોંકાવનારી વાત એ છે કે તે આખુંને આખું સલામત હતું તેનો કોઈ ભાગ ખવાયો નહોતો. 120 વર્ષ જેટલા લાંબા સમય સુધી પાણીમાં રહ્યું હોવા છતાં પણ તે અતૂટ રહ્યું હતું.
કેવી રીતે ડૂબ્યું હતું જહાજ
ભારે તોફાનને કારણે ન્યૂ સાઉથ વેલ્સના દરિયામાં જહાજ સપડાયું હતું અને તેને કારણે તેનું એન્જિન બંધ પડી જતાં તે દરિયાના પેટાળમા જતું રહ્યું હતું. નિષ્ણાંતોનું માનવું છે કે એક મોટું મોજું ટકરાતાં તે ઝડપથી ડૂબવા લાગ્યું હતું અને લાઈફ બોટથી બચવાનો ટાઈમ જ ન રહેતાં 32 પ્રવાસીઓ પણ ડૂબી ગયાં હતા જેમની લાશો થોડા અઠવાડિયા બાદ તરીને બહાર આવી હતી.
શું હતું જહાજમાં
આ જહાજ ન્યૂ સાઉથ વેલ્સથી મેલબોર્નમાં કોલસાનો સપ્લાય પૂરો પાડતું હતું અને 1904ની સાલમાં ભારે તોફાનને કારણે તે ડૂબી ગયું હતું.
આ ઘટનાના 7 વર્ષ બાદ ટાઈટેનિક પણ ડૂબ્યું
આ ઘટનાના 7 વર્ષ બાદ એટલે કે 1911ની સાલમાં વિશાળ હિમશીલા ટકરાતાં વિશ્વવિખ્યાત ટાઈટેનિક જહાજ એટલાન્ટિક મહાસાગરમાં ડૂબ્યું હતું તેમાં 1500થી વધારે પ્રવાસીઓના મોત થયું હતું. આ જહાજનો કાટમાળ આજે પણ 12,000 ફૂટ નીચે પડ્યો છે જોકે તેમાંથી ઘણી બધી વસ્તુઓ બહાર લાવવામાં આવી છે.
