કાર્યવાહી / ગીર સોમનાથના ઉનામાં ખાણ ખનીજ વિભાગના દરોડા, 5 ટ્રક અને ટ્રેક્ટર સહિત કુલ 70 લાખનો મુદ્દામાલ જપ્ત

• ગીર સોમનાથ જિલ્લાના ઉનામાં ખાણ ખનીજ વિભાગના દરોડા
• 5 ટ્રક અને ટ્રેકટર સહિત કુલ 70 લાખનો મુદ્દામાલ જપ્ત કરાયો
• લાઈમસ્ટોન અને રેતીની થતી હતી ગેરકાયદે હેરાફેરી

ગીર સોમનાથ જિલ્લાના ઉનામાં ખાણ ખનીજ વિભાગે દરોડા પાડ્યા હોવાનું સામે આવ્યું. જેમાં ગેરકાયદે ખનીજની હેરાફેરી કરતી ટ્રકો ઝડપાઇ છે. ખાણ ખનીજ વિભાગે 5 ટ્રક અને ટ્રેક્ટર સહિત કુલ 70 લાખનો મુદ્દામાલ જપ્ત કર્યો છે. લાઈમસ્ટોન અને રેતીની ગેરકાયદે હેરાફેરી થતી હતી. માંગરોળ અને પોરબંદરમાંથી ગેરકાયદે ખનીજની હેરાફેરી થતી હતી.

કોડિનાર સરહદ વિસ્તારની અંદર ખનીજ આવી રહ્યું હતું

ઉના ખાણ ખનીજ વિભાગ દ્વારા ખાસ કરીને કોડિનાર સરહદ વિસ્તારની અંદર પોરબંદર, જૂનાગઢ અને માંગરોળ વિસ્તારમાંથી જે ખનીજ આવી રહ્યું હતું, તેમાં ખાસ કરીને જે પથ્થર (લાઇમસ્ટોન) અને રેતી હોય છે તે ખૂબ મોટા પ્રમાણમાં અહીં ગેરકાયદેસર રીતે આવતુ હોય છે. આ બધા જ વાહનો વધારે ઓવરલોડ હતાં.

થાનગઢ તાલુકાના સરોડી ગામે ઝડપાયું હતું ખનિજચોરીનું કૌભાંડ

ઉલ્લેખનીય છે કે, તાજેતરમાં જ સુરેન્દ્રનગરના થાનગઢ તાલુકાના સરોડી ગામે મામલતદારની ટીમે દરોડો પાડયો હતો. જેમાં ગેરકાયદે ખનીજ પ્રવૃત્તિને ઝડપી લઇ રૂપિયા 42 લાખનો મુદ્દામાલ જપ્ત કરાયો હતો. તે ઉપરાંત ગેરકાયદે ખનન પ્રવૃત્તિ સામે આવતા તપાસ ટીમે ખનીજની લીઝ સીલ કરી આગળની કાર્યવાહી હાથ ધરી હતી. જેના પગલે ખનિજ માફિયા તત્વોમાં ફફડાટ ફેલાઇ ગયો હતો.

મળતી વિગત મુજબ, થાનગઢ તાલુકાના સરોડી ગામના સરકારી ખરાબામાં આવેલી સર્વે નંબર 188 પૈકીની ખનીજની લીઝમાં નિયમો વિરુદ્ધ ખનીજ પ્રવૃત્તિ કરવામાં આવતી હોવાની માહિતી મળી હતી. જેના આધારે મામલતદારની ટીમે દરોડો પાડ્યો હતો. તે દરમિયાન નિયમોનો ભંગ કરીને ગેરકાયદે ખનીજ પ્રવૃત્તિ ધમધમતી હોવાનું જણાઇ આવ્યું હતું. જેથી તંત્રએ 6 કટર મશીન સહિતનો રૂપિયા 42 લાખનો મુદ્દામાલ જપ્ત કરી સીઝ કરી લીઝને સીલ કરવામાં આવી હતી.