કાર્યવાહી / દેવભૂમિ દ્વારકામાં નહીં ચાલે દબાણ: આજે ફરી કરાશે મેગા ડિમોલિશન, અનેક લોકો સ્વેચ્છાએ ખાલી રહ્યા છે મકાન

• દ્વારકામાં ફરી મેગા ડિમોલિશન
• 122 જેટલા રહેણાંક મકાનો તોડી પડાશે
• 20 કોમર્શિયલ સ્થળો પર પણ કાર્યવાહી

દેવભૂમિ દ્વારકા જિલ્લામાં ફરી મેગા ડિમોલિશન ધરવામાં આવ્યું છે. આજે દ્વારકાના કલ્યાણપુરમાં દરિયા કિનારાની આસપાસના ગેરકાયદેસર દબાણો હટાવવાની કાર્યવાહી હાથ ધરવામાં આવશે. આજે પોલીસ તંત્રની હાજરીમાં 122 જેટલા રહેણાંક મકાનો, 20 જેટલા કોમર્શિયલ સ્થળો પર સરકારી બુલડોઝર ફરી વળશે. મહત્વનું છે કે, તંત્રની નોટિસ બાદ અનેક લોકો સ્વેચ્છાએ જગ્યા ખાલી કરી રહ્યા છે. 

મોડી રાતથી પોલીસ કાફલો તૈનાત
કલ્યાણપુરમાં ધાર્મિક સ્થળ હર્ષદ-ગાંધવી નજીક મેગા ડિમોલિશનની કામગીરી હાથ ધરવામાં આવશે. પોલીસના ઉચ્ચ અધિકારીઓની હાજરીમાં આ મેગા ઓપરેશનમાં ગેરકાયદે દબાણો પર બુલડોઝર ફેરવી દેવામાં આવશે. જેથી હર્ષદ-ગાંધવીમાં મોડી રાતથી જ પોલીસના કાફલાને તૈનાત કરવામાં આવ્યો છે. ધાર્મિક સ્થળ હર્ષદ નજીક સરકારી જમીન પર ગેરકાયદેસર દબાણ થયુ છે. 

ગત ઓક્ટોબર મહિનામાં પણ દૂર કરાયા હતા દબાણો
આપને જણાવી દઈએ કે, ગયા વર્ષે ઓક્ટોબર મહિનામાં પણ દેવભૂમિ દ્વારકા જિલ્લામાં બિનઅધિકૃત ખડકાયેલા દબાણો પર ફેલડોઝર ફેરવવામાં આવ્યું હતું. તંત્ર દ્વારા ચુસ્ત પોલીસ બંદોબસ્ત સાથે રહેણાંક અને વ્યવસાયિક દબાણો દૂર કરવામાં આવ્યા હતા. તંત્ર દ્વારા દબાણ દૂર કરી 3 લાખ ફૂટ જેટલી સરકારી જમીન ખાલી કરાવવામાં આવી હતી. એક હજારથી વધારે પોલીસકર્મીઓના બંદોબસ્ત અને રેવન્યુના અધિકારીઓને સાથે રાખીને ગેરકાયદે બાંધકામ અને વિવાદીત સ્થળોને દૂર કરવામાં આવ્યા હતા. 

મેગા ડિમોલિશન કામના વડાપ્રધાને પણ કર્યા હતા વખાણ 
ઉલ્લેખનીય છે કે, ગત વર્ષે બેટ દ્વારકામાં તંત્ર દ્વારા મેગા ડિમોલિશન હાથ ધરી કરોડોની કિંમતની જમીન પરનું દબાણ દૂર કરાયું હતું. મેગા ડિમોલિશનમાં ગોડાઉન અને ગેરકાયદેસર મકાનો તોડી પડાયા હતા. ત્યારે જામનગરની મુલાકાતે આવેલા વડાપ્રધાન નરેન્દ્ર મોદીએ પણ મેગા ડિમોલિશનની કામગીરીને મુક્તમને બિરદાવી હતી. તેમણે જણાવ્યું હતું કે મક્કમ મનનો માનવી લીડરશીપ લેતો હોય છે ત્યારે બધા જ વિરોધ વગર સહકાર આપતા હોય છે. જે આ મેગા ડિમોલિશનએ મક્કમ નિર્ણયનું ઉદાહરણ છે. વધુમાં ડિમોલિશન મામલે સંતોના નિવેદન સાંભળીને રાજીપો થયો હોવાનું પણ વડાપ્રધાને ઉમેર્યું હતું.