મધ્યપ્રદેશ / આવું કામ જનતા માટે ન થઈ શકે? IAS ઓફિસરનો પાલતુ શ્વાન થયો ગુમ, આખું તંત્ર કર્યું દોડતું, ઈનામની પણ જાહેરાત

•  મધ્યપ્રદેશના ગ્વાલિયર જિલ્લામાં IAS અધિકારીનો પાલતુ શ્વાન ગુમ
• અધિકારી ભોપાલથી દિલ્હી જઇ રહ્યા હતા
• કૂતરાને શોધવા દર દર ભટકતો સમગ્ર વહીવટી સ્ટાફ

મધ્યપ્રદેશના ગ્વાલિયર જિલ્લામાં IAS અધિકારીનો પાલતુ શ્વાન ગુમ થઈ જતા તંત્ર બરોબરનું ધંધે લાગ્યું છે. અધિકારી ભોપાલથી દિલ્હી જઇ રહ્યા હતા આ વેળાએ મુસાફરી દરમિયાન કૂતરો ખોવાઈ ગયો હતો. જે કારમાંથી કૂદી ગયા બાદ આજ સુધી તેનો ક્યાંય પત્તો મળ્યો ન હતો. બાદમાં લાપતા બનેલા આ શ્વાનને શોધવા પોલીસ દિવસ, રાત એક કરીને કામગીરીમા જોતરાઈ છે. હાલ સમગ્ર વહીવટી સ્ટાફ કૂતરાને શોધવા દર દર ભટકતો હોય તેવો ઘાટ સર્જાયો છે. એટલું જ નહિ ગુમ થયેલા આ કૂતરા મામલે શહેરભરમાં પોસ્ટર લગાવી દેવામાં આવ્યા છે. જેને શોધી લાવનારને ઈનામની પણ જાહેરાત કરવામાં આવી છે.

કારમાંથી કૂતરો નાશી ગયો

આ મામલે ડાબરા એસડીપીઓ વિવેક શર્માએ માહિતી આપતા જણાવ્યું કે ભોપાલથી દિલ્હી વિલૌઆ પોલીસ મથકની હદમાં આવતા હાઈવે પરના ઢાબા પર કેટલાલ લોકો ભોજન માટે કાર રોકી ઢાબામાં ગયા હતા.આ દરમિયાન કૂતરો કારમાંથી કૂદીને ક્યાંક ચાલ્યો ગયો હતો. બાદમાં આ મામલે જાણ થતા આજુબાજુના વિસ્તારમાં શોધખોળ કરવામાં આવી હતી. છતાં પણ કુતરાની ક્યાંય ભાળ મળી ન હતી.

લાપતા શ્વાનની શોધ માટે શહેરભરમાં લાગી ગયા પોસ્ટર
બાદમાં પોલીસ સ્ટેશન આવીને ઘટનાની જાણ કરવામાં આવી હતી. જેમાં જણાવ્યું કે અમે કાર્યવાહી કરી રહ્યા છીએ, વધુમાં કૂતરા અંગે  સ્ટેશનો અને ઢાબા સંચાલકોને પણ જાણ કરી ધ્યાન રાખવા જણાવ્યું છે. બીજી બાજુ એક ઢાબા સંચાલકે જણાવ્યું હતું કે શુક્રવારની રાતે અમુક લોકો ટોર્ચ માંગવા આવ્યા હતા. રાત્રે 1.30 વાગ્યે તેઓએ ગેટ ખોલી અને જોયું તો ત્યાં બે-ત્રણ લોકો હતા જે બધા એક ગુમ થયેલાં કૂતરાને શોધી રહ્યા હતા. ભારે જહેમત બાદ પણ શ્વાન ન મળતા અંતે તેની શોધ માટે પોસ્ટર લગાવવામાં આવ્યા છે. જેમાં ઇનામની પણ જાહેરાત કરાઈ છે. બીજી તરફ તંત્રની આવી રોકેટગતીની કામગીરી નિહાળી 'આવું કામ જનતા માટે ન થઈ શકે? તેવો લોકોમાં પ્રશ્ન ઉદ્ભવ્યો છે.