નિર્ણય / વન્યપ્રેમીઓ માટે મહત્વના સમાચાર: આવતી કાલથી સાસણ ગીરમાં સિંહદર્શન બંધ, જાણો હવે ક્યારથી ખુલશે

• સાસણ ગીરમાં આવતીકાલથી સિંહદર્શન બંધ
• ચાર મહિના સુધી નહીં થઈ શકે સિંહદર્શન
• આવતીકાલથી 15 ઓકટોબર સુધી સિંહદર્શન બંધ

સિંહ પ્રેમીઓ માટે સાસણ ગીરમાં સિંહ દર્શનને લઇને સૌથી મહત્વના સમાચાર સામે આવ્યા છે. કારણ કે આવતી કાલથી સાસણમાં તારીખ 15 ઓકટોબર સુધી સિંહ દર્શન બંધ રહેશે. ચોમાસાના 4 મહિના સુધી પ્રવાસીઓ માટે સિંહ દર્શન બંધ રહેશે. કારણ કે ચોમાસામાં સિંહનો સંવનનકાળ શરૂ થાય છે આથી ચોમાસાના 4 મહિના સુધી સિંહદર્શન બંધ રહે છે.

પ્રવાસીઓ માટે માત્ર દેવળીયા સફારી પાર્ક ચાલુ રહેશે

ચોમાસાની સિઝનમાં સિંહ સહિત વન્ય જીવો માટે સંવનનકાળ હોવાથી વન્ય જીવોને ખલેલ ના પહોંચે તે માટે સાસણના જંગલમાં ચોમાસાનું ચાર માસનું વેકેશન હોય છે. ચાર માસના આ વેકેશન દરમિયાન જીપ્સીઓના તમામ રૂટ બંધ થશે અને પ્રવાસીઓ માટે માત્ર દેવળીયા સફારી પાર્ક ચાલુ રહેશે. જણાવી દઇએ કે, ચોમાસાની સીઝન દરમ્યાન સિંહો, દીપડા, હરણ, સાબર, ચિંકારા સહિતના મોટા ભાગના વન્ય જીવોમાં પ્રજનન કાળ ચાલતો હોય છે. આથી વન્ય જીવોના સંવનનમાં કોઇ પણ જાતની ખલેલ ના પહોંચે તે માટે વન વિભાગ દ્વારા તારીખ 15 જૂનથી સાસણમાં 4 માસ માટેનું વેકેશન જાહેર કરાયું છે.

સિંહ દર્શન બંધ રહેતા સ્થાનિક ધંધા-રોજગારને થશે માઠી અસર

આ વેકેશન 15 ઓકટોબરે પુર્ણ થશે અને 16 ઓક્ટોબરથી ફરી સિંહ દર્શન ચાલુ થશે. આ વેકેશન દરમિયાન પ્રવાસીઓને સિંહ દર્શન તેમજ સફારી માટે લઇ જવામાં આવતા જીપ્સીના તમામ રૂટો બંધ કરી દેવાય છે. જો કે દેવળીયા સફારી પાર્ક પ્રવાસીઓ માટે રાબેતા મુજબ ચાલુ રહેશે. જો કે, સાથે તમને જણાવી દઇએ કે, ચાર માસ સુધી સાસણમાં સિંહ દર્શન બંધ રહેતા તેનાથી ત્યાંના સ્થાનિક ધંધા-રોજગારને માઠી અસર થાય છે.