અમદાવાદ / બોલો, કૌભાંડી કંપની લલ્લુજી એન્ડ સન્સને માથે ગુજ યુનિ.નું 6 વર્ષનું 6 કરોડ ભાડું બાકી, માફ કરી દેવા લખ્યો પત્ર

• લલ્લુજી એન્ડ સન્સે ગુજરાત યુનિવર્સિટીને નથી ચૂકવ્યું ભાડું
• કંપનીએ 6 મહિનાથી 6 કરોડનું ભાડું નથી ચૂકવ્યું
• યુનિવર્સિટી કન્વેન્શન હોલનું ભાડું માફ કરવા લખ્યો પત્ર

કોરોના મહામારીનો લાભ મેળવવા લલ્લુજી એન્ડ સન્સનું વધુ એક કાવતરું સામે આવ્યું છે. કૌભાંડી કંપની લલ્લુજી એન્ડ સન્સે 6 મહિનાથી ગુજરાત યુનિવર્સિટીને યુનિવર્સિટી કન્વેન્શન હોલનું 6 કરોડનું ભાડું નથી ચૂકવ્યું. કંપનીએ ગુજરાત યુનિવર્સિટીના VCને ભાડા માફી માટે પત્ર લખ્યો છે. લલ્લુજી એન્ડ સન્સ યુનિવર્સિટીના મેદાનનો પણ ઉપયોગ કરે છે. સામાન સ્ટોરેજ માટે મેદાનનો પણ કોઇ રોકટોક વિના ઉપયોગ થાય છે. ત્યારે કરોડોની કમાણી છતાં લલ્લુજી એન્ડ સન્સને ભાડા માફી જોઇએ છે.

ઉત્તરપ્રદેશ સરકાર કરી ચૂકી છે કાર્યવાહી

કંપનીનો સમગ્ર ખેલ ઉત્તરપ્રદેશથી સામે આવ્યો છે જ્યાં સરકારે આ કંપની સામે કાર્યવાહી શરુ કરી છે. કંપનીએ યુપીના કુંભના મેળામાં કરોડો રૂપિયાના ખોટા બિલ રજૂ કર્યા હતા. જેમાં કંપનીનું કૌભાંડ હોવાનું બહાર આવ્યું હતું. ત્યારે હવે ગુજરાતના પ્રવાસન સ્થળોમાં પણ આ કંપનીનું સામ્રાજ્ય છે. કચ્છથી લઈને સ્ટેચ્યુ ઓફ યુનિટી સુધી આ જ કંપની પાસે બધા કોન્ટ્રાક્ટ છે. તો ટેન્ટસિટી કૌભાંડ આચરનાર કંપની પર ગુજરાત સરકારના ચાર હાથ હોય તેવું દેખાઈ રહ્યું છે.સરકારી કોન્ટ્રાક્ટમાં કૌભાંડ આચરનાર કંપની સામે ગુજરાત સરકારની રહેમ નજર પર સવાલો ઉભા થઇ રહ્યા છે. આ કંપની સામે સરકાર દ્વારા કોઈ કાર્યવાહી હાથ ધરવામાં આવી રહી નથી અને સરકારી બાબુઓ તો કંપનીની ખાતરદારી કરી રહ્યા છે.

ટેન્ટસિટી બનાવવા 1 રૂપિયાના ટોકન ભાવે જમીન આપી દેવામાં આવી!

રાજ્ય સરકાર આ કંપની પર એટલી બધી મહેરબાન થઇ ગઈ છે કે SOU પાસે ટેન્ટસિટી બનાવવા 1 રૂપિયાના ટોકન ભાવે જમીન આપી દેવામાં આવી હોવાના આક્ષેપ સામે આવી રહ્યા છે. 30 વર્ષ માટે 34 એકર જમીન ટોકન ભાવમાં આપી દેવામાં આવ્યું છે ત્યારે આ કંપની પ્રવાસીઓના ખીસ્સા ખંખેરવાનું કામ કરી રહી છે. સરકારની રહેમ નજર હેઠળ કંપની ઉઘાડી લૂંટ ચલાવી રહી છે અને સરકાર આંખ આડા કાન કરી રહી છે. ત્યારે જો આ કંપની સામે ગુજરાતમાં તપાસ થાય તો મોટા અધિકારીઓ અને નેતાઓના નામ સામે આવી શકે છે.