Hu Chhu Gujarati / ગુજરાતમાં આવા 'શ્વાસ'ની જરૂર છે : આ યુવતી 11 વર્ષથી એવું કામ કરે છે કે જાણીને કરશો સલામ

શહેરની ફૂટપાથ કે સિગ્નલ પર રખડતા બાળકો જેને જોઇને ક્યારેક કારમાં પસાર થતાં લોકો પોતાની કારના કાચ બંધ કરી દેતા હોય છે. આવા બાળકોને ભેગા કરીને જીવન જીવવાના પાઠ શીખવાડી રહી છે આ ઍન્જિનિયરિંગ ભણેલી યુવતી. 

શરૂઆતનો તબક્કો ખૂબ જ કઠિન 

''શ્વાસ'' સંસ્થાના બેનર હેઠળ કિંજલ શાહ અને તેના સાથી મિત્રો શરૂઆતના તબક્કામાં શનિ-રવિ દરમિયાન શહેરની ફૂટપાથ કે સિગ્નલ પર રખડતા બાળકોને ભેગા કરતાં. તેમને ડ્રોઇંગ શિખવાડતા, કોઇના જન્મદિવસ ઉજવતા તો વળી ક્યારેક કોઇ ઉત્સવની ઉજવણી પણ આ બાળકો સાથે કરતા. સમય પસાર થતો ગયો અને બાળકો ''શ્વાસ'' સાથે જોડાતા રહ્યા. 

ક્યારેક તો છેવાડાના માનવી સમાન ગણાતા બાળકોના માવતરને એવું પણ લાગતું કે, આ લોકો ક્યાંક પોતાના બાળકોને ઉઠાવીને લઇ ન જાય. અંતે બાળકો અને કિંજલ શાહ વચ્ચે વિ'શ્વાસ' કેળવાતો ગયો અને આજે 'શ્વાસ' સાચા અર્થમાં રખડતા બાળકોને અભ્યાસથી લઇને તેમના જીવનપયોગી કાર્યમાં મદદ કરી રહી છે. 

શહેરના 11 સ્થળે કામ કરી રહી છે 'શ્વાસ' સંસ્થા

આજે 650 ગરીબ બાળકો માટે 'શ્વાસ' સંસ્થા એ જીવનના 'શ્વાસ' સમાન બની છે. શહેરના ગુલબાઇ ટેકરા, શાહીબાગ, રામદેવનગર, વસ્ત્રાપુર, થલતેજ, માનવમંદિર સહિત કુલ 11 સ્થળો પર સવાર-સાંજ કુલ 2 ક્લાસ લેવામાં આવે છે. જેમાં મોટી સંખ્યામાં બાળકો હાજર રહે છે. કિંજલ શાહ સહિત 22 શિક્ષકો આ બાળકોના ભવિષ્યને ભણતર અને ગણતરરૂપી ઓક્સિજન આપવાનું કામ કરી રહ્યા છે. 

'શ્વાસ'ની સફળતાના 11 વર્ષ

'શ્વાસ'ની શરૂઆત 2008માં થઇ. આજકાલ કરતા 11 વર્ષના વાણા વિતી ગયા છે. કિંજલ શાહ અને તેના સાથી મિત્રો પોતાનું સર્વસ્વ છોડીને 'રખડતા' બાળકોને 'પગભર' કરવાનું કામ કરી રહ્યા છે. શ્વાસ સાથે શરૂઆતથી જ જોડાયેલો એક છોકરો હાલ અમદાવાદની જાણીતી કોલેજમાં BCA નો અભ્યાસ કરીને સમાજના મોટા લોકોના બાળકો સાથે ખભેખભો મળાવી રહ્યો છે. 

બાળકો અમને પણ શીખવાડે છે

'શ્વાસ' સંસ્થામાં અભ્યાસ કરતા બાળકોના માતા-પિતા પણ 'શ્વાસ' અને પોતાના બાળકો પર ગર્વ અનુભવે છે કારણ કે, તેમના બાળકોની 'રસ્તે રખડતા'ની વ્યાખ્યા બદલાઇ છે અને ધીમેધીમે માવતરના વ્યવસાયમાં પણ આ બાળકો મદદરૂપ થઇ રહ્યા છે. 

પતંગિયાની પાંખોને ખુલવા દ્યો, આકાશ ચૂમી લેશે 

મિત્રો, આજે 21મી સદીમાં આપણે જીવતા સૌ લોકો પાસે એક-બીજા માટે તો સમય નથી ત્યારે ક્યારેક સમય કાઢીને કારની અને હ્રદયની બારીઓ ખોલી સમાજના પછાત વર્ગના બાળકોને સામાન્ય મદદ કરીશું તો ચોક્કસ આશા છે કે, આ પતંગિયા જેવા બાળકોને પાંખો ફૂટશે અને પોતાના સપનાના આકાશને ચૂમી શકશે.