- AAPના રોડ શો મુદ્દે જીતુ વાઘાણીનું નિવેદન
- મેયર કક્ષાના મુખ્યમંત્રી ગુજરાત આવ્યા છે-વાઘાણી
- કોઇને ઉતારી પાડવું એ ગુજરાતની સંસ્કૃતિ નથીઃ AAP
પંજાબ વિધાનસભાની ચૂંટણીમાં આમ આદમી પાર્ટીએ પોતાનો પરચમ બતાવ્યા બાદ હવે ગુજરાત પર નજર મંડરાઇ રહી છે. ગુજરાતમાં વિધાનસભાની ચૂંટણી આવનાર છે જેને લઇને આમ આદમી પાર્ટી પણ એક્ટિવ મોડમાં જોવા મળી રહી છે. ગુજરાતની રાજનીતિમાં ભાજપ અને આમ આદમી પાર્ટી વચ્ચે ટ્વિટર વૉર તો ચાલી જ રહ્યુ છે પરંતુ હવે ચૂંટણી ટાણે જનતાનું દિલ જીતવાનો આપ દ્વારા ફુલ પ્રયત્નો કરવામાં આવી રહ્યા છે. ત્યારે આપના નેતા દિલ્હીના મુખ્યમંત્રી અરવિંદ કેજરીવાલ તથા પંજાબના મુખ્યમંત્રી ભગવંત માન ગુજરાતની મુલાકાતે છે.અમદાવાદમાં નિકોલ ખોડિયાર મંદિરથી વિજય ચોક સુધી રૉડ શો યોજ્યો. ત્યારે ગુજરાતમાં આપના બંને નેતાઓની મુલાકાત અંગે ભાજપના નેતા જીતુ વાઘાણી દ્વારા કટાક્ષ કરવામાં આવ્યો.
'મેયર કક્ષાના મુખ્યમંત્રી ગુજરાત આવ્યા'
ભાજપના પ્રવક્તા જીતુ વાઘાણીએ આ અંગે કટાક્ષ કરતા જણાવ્યુ કે ગુજરાત દરેક અતિથીને આવકારે છે. ગુજરાતની જનતા બીજેપીને પ્રેમ આપશે એ નક્કી છે. પ્રવાસીઓ ગુજરાત અને આવે અને જાય છે. આ તો મેયર કક્ષાના મુખ્યમંત્રી ગુજરાત આવ્યા છે. મહત્વનું છે કે વિધાનસભાની ચૂંટણીના એંધાણ હવે ખૂબ જ નજીક જોવા મળી રહ્યા છે ત્યારે એક પછી એક રોડ શો પોલિટીકલ પાર્ટીઓ પણ કરી રહી છે પીએમ મોદી રોડ શો બાદ આપ નેતા અરવિંદ કેજરીવાલ અને પંજાબમાં ભગવંત માને પણ રોડ શો કરતા રાજકારણમાં ગરમાવો આવ્યો હતો.
ભાજપમાં બોખલાહટ અને ડર છેઃ AAP
તો જીતુ વાઘાણીના નિવેદન અંગે AAPએ આકરા પ્રહાર કર્યા હતા. ગોપાલ ઇટાલિયાએ જણાવ્યુ હતું કે જીતુ વાઘાણી નિમ્નકક્ષાની રાજનીતિ કરી રહ્યાં છે, ભાજપમાં બોખલાહટ અને ડર છે.
કોઇને ઉતારી પાડવું એ ગુજરાતની સંસ્કૃતિ નથી.
કેજરીવાલ અને ભગવંત માન બે દિવસ ગુજરાતની મુલાકાતે
ગુજરાત પ્રવાસે આવેલ આમ આદમી પાર્ટીના પીઢ નેતાઓ ગત મોડી રાતે જ અમદાવાદ આવી પહોંચ્યા હતા. જ્યાં સ્થાનિક કાર્યકર્તાઓ દ્વારા સ્વાગત કરવામાં આવ્યું હતું. આજે અરવિંદ કેજરીવાલ અને ભગવંત માન સાબરમતી ગાંધી આશ્રમની મુલાકાત લીધી હતી. જ્યાં બંન્ને નેતાઓએ ગાંધીજીની પ્રતિમાને સુતરની આંટી પહેરાવીને પુષ્પાંજલિ અર્પણ કરી હતી.તે ઉપરાંત તેમણે હૃદયકુંજની પણ મુલાકાત લીધી હતી. મુલાકાત બાદ પત્રકાર પરિષદને સંબોધતા કેજરીવાલે કહ્યું હતું કે, રાજનીતિની વાતો અમે આશ્રમ બહાર કરીશું. સાથે તેમણે એવું પણ જણાવ્યું હતું કે, જેટલી વખત ગાંધી આશ્રમની મુલાકાતે આવું છું તેટલી વખત શાંતિ પ્રાપ્ત થાય છે.
જાણો 3 એપ્રિલનો કાર્યક્રમ:
- સવારે 10 વાગ્યે જશે શાહીબાગ સ્વામિનારાયણ મંદિર
- ત્યાર બાદ રાજકીય, સામાજિક આગેવાનો અને પાર્ટીના આગેવાનો સાથે ચૂંટણીને લઈને ચર્ચા કરશે
- સાંજે 6 વાગ્યે દિલ્હી જવા રવાના થશે
ગુજરાત માટે AAPની કેવી કવાયત?
- AAPના નેતાઓ વીજળીની સમસ્યા, પોલીસ ગ્રેડ પે, બેરોજગારી મુદ્દે આક્રમક થયા
- ખેડૂતોને સમયસર વીજળી મળે તે માટે AAPએ સક્રિયતાથી મુદ્દો ઉઠાવ્યો
- ગુજરાતના અનેક વિસ્તારોમાં તિરંગા યાત્રા કાઢી
- પંજાબમાં મળેલી જીતની ગુજરાતમાં મોટી ઉજવણી કરી
- દિલ્લી બાદ પંજાબ મોડેલની AAPના નેતાઓના મુખે ચર્ચા
- દિલ્લીના મુખ્યમંત્રી કેજરીવાલ અને પંજાબના મુખ્યમંત્રી ભગવંત માન ગુજરાત આવી રહ્યા છે
- સોશિયલ મીડિયા પર દિલ્લી અને પંજાબ સરકારના નિર્ણયોનો પ્રચાર
- ગુજરાતમાં શિક્ષણની સ્થિતિ અંગે મનિષ સિસોદિયાએ પડકાર ફેંક્યો
- કોંગ્રેસના કેટલાક નેતાઓનો સંપર્ક કરી પક્ષમાં લેવાના પ્રયાસ
- BTP સાથે ગઠબંધન કરી આદિવાસી મત પરોક્ષ રીતે મેળવવા રણનીતિ ઘડી
