વર્લ્ડ / જાપાનમાં વહેલી સવારે 6.1ની તીવ્રતાનો મોટો ભૂકંપ આવ્યો, લોકો ઘર બહાર ભાગ્યા

જાપાનના હોકાઈડો વિસ્તારમાં સોમવારે વહેલી સવારે ભૂકંપ અનુભવાયો હતો જેના ઝટકાથી લોકોમાં ભયનો માહોલ સર્જાયો હતો. રિક્ટર સ્કેલ પર આ ભૂકંપની તીવ્રતા 6.1 નોંધાઈ હોવાનું જાણવા મળ્યું છે. વહેલી સવારે મોટાભાગના લોકો ઊંઘમાં હતા ત્યારે અચાનક ધરતી ધ્રૂજતા ઘણા લોકો ગભરાઈને પોતાના ઘરની બહાર નીકળી ગયા હતા.

ક્યારે આવ્યો ભૂકંપ?

આ ભૂકંપ સ્થાનિક સમય મુજબ સવારે 5:24 વાગ્યે આવ્યો હતો, જ્યારે ભારતીય સમય મુજબ રાત્રે લગભગ 1:54 વાગ્યે તેનો અનુભવ થયો હતો. મધ્ય ટોકાચી વિસ્તારમાં જાપાનીઝ સિસ્મિક સ્કેલ મુજબ આ ઝટકાની તીવ્રતા ‘5+’ તરીકે નોંધાઈ હતી, જે મધ્યમથી વધુ અસરકારક ગણાય છે.

આ પણ વાંચોઃ વોશિંગ્ટનની હોટલમાં ફાયરિંગ, મેજની નીચે છુપાયા ટ્રમ્પ, ડરી ગઈ મેલાનિયા

આફ્ટરશોકની આશંકા

સદભાગ્યે આ ઘટનાની બાદ કોઈ સુનામીની ચેતવણી જાહેર કરવામાં આવી નથી. અધિકારીઓએ જણાવ્યું છે કે અત્યાર સુધી કોઈ મોટી જાનહાનિ અથવા સંપત્તિને ગંભીર નુકસાન થયાના અહેવાલો સામે આવ્યા નથી. જોકે, સ્થાનિક વહીવટીતંત્ર અને રાહત ટીમો પરિસ્થિતિ પર નજર રાખી રહી છે.

હવામાન વિભાગે અસરગ્રસ્ત વિસ્તારોના લોકોને ખાસ કરીને આગામી દિવસોમાં સતર્ક રહેવાની સલાહ આપી છે કારણ કે મુખ્ય ભૂકંપ બાદ ‘આફ્ટરશોક્સ’ તરીકે ઓળખાતા હળવા ઝટકાઓ આવવાની શક્યતા રહેતી હોય છે. આવી પરિસ્થિતિમાં સુરક્ષા પગલાંનું પાલન કરવું જરૂરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ