અમદાવાદ / જગન્નાથ મંદિર ટ્રસ્ટની જમીન વિવાદ મામલે ઉસ્માન ઘાંચી આવ્યા સામે, આક્ષેપોને ફગાવતા કહ્યું કે...

• ભાજપના નેતા ઉસ્માન ઘાંચી સામે આવ્યા
• મંદિરના આક્ષેપ તેમણે ફગાવ્યા
• કોર્પોરેશને આ જમીન ખેડૂતોને આપી હતી

જગન્નાથ મંદિર ટ્રસ્ટ મંદિરની જમીન વિવાદ મામલે અંતે ભાજપના નેતા ઉસ્માન યાસીન ઘાંચી સામે આવ્યા છે. ઉસ્માન ઘાંચી પર મંદિરને ગૌચર માટે આપેલી જમીન વેચાણથી લઇ લેવાના આક્ષેપ થયા છે. ત્યારે ભાજપના નેતા ઉસ્માન ઘાંચીએ આ મામલે વીટીવી સાથે વાતચીત કરી હતી. 

આ જમીન માત્ર ભાડા પટ્ટા પર લેવામાં આવી છે તે આક્ષેપો ખોટા છેઃ ઉસ્માન ઘાંચી

ઉસ્માન ઘાંચીએ જણાવ્યું હતું કે આ જમીનમાં કોઈ ગેરરીતિ કરવામાં આવી નથી. આ જમીન માત્ર ભાડા પટ્ટા પર લેવામાં આવી છે તે આક્ષેપ ખોટા છે. કોર્પોરેશન દ્વારા ખેડૂતોને આ જમીન આપવામાં આવી હતી. જેના કાયમી હકદાર મંદિર ટ્રસ્ટ હોવાથી ચેરિટી કમિશનરની પરવાનગી લીધી નથી. આ બાબતે અમે ચેરિટી કમિશનરમાં અમારો જવાબ આપીશું.

મહત્વનું છે કે અમદાવાદ જગન્નાથ મંદિર ટ્રસ્ટની જમીનનો વિવાદ સામે આવ્યો છે. મંદિર સાથે જોડાયેલા બે ટ્રસ્ટોની ૨.27 લાખ ચો.મી. જમીન ચેરિટી કમિશનરની પૂર્વ મંજુરી વિના કાયમી ભાડાપટ્ટે આપી દેવાના આક્ષેપો થયા છે. આ મામલે ચેરિટી કમિશનરે કાર્યવાહી શરૂ કરી છે. આ સમગ્ર મામલે ચેરિટી કમિશનરે કલેક્ટરને પત્ર લખ્યો છે. મંદિરના બંન્ને ટ્રસ્ટના મહેસૂલી રેકોર્ડમાં કોઈ ફેરફાર નહીં કરવા આદેશ આપ્યો છે. જગન્નાથ મંદિરના બે ટ્રસ્ટની જમીન મુદ્દે થયેલી ફરિયાદ અંગે ચેરિટી કમિશનમાં ૯મી જાન્યુઆરીએ સુનાવણી હાથ ધરવામાં આવશે. ટ્રસ્ટીઓએ મંજૂરી વિના ગૌચર જમીન વેચવાનો કારસો રચ્યો હતો. જગન્નાથ મંદિર ટ્રસ્ટની બહેરામપુરાની TP-138ની 2.27 લાખ ચો.મી જમીન મામલે વિવાદ સર્જાયો છે.