ગુજરાત શોકમગ્ન / મચ્છુના પાણીમાં હજુ પણ અનેક મૃતદેહ હોવાની આશંકા, સ્પેશ્યલ મશીન મંગાવી શોધખોળ શરૂ

• મોરબીમાં બચાવ કામગીરીમાં ડ્રિપ ટ્રેકર મશીન માંગાવાયું 
• મચ્છુ નદીમાં હજુ પણ અનેક મૃતદેહો ફસાયા હોવાની આશંકા
• ડ્રિપ ટ્રેકર મશીનની મદદથી મૃતદેહ શોધવાની કામગીરી કરાશે

મોરબી માટે રવિવારની સાંજ ગોઝારી સાબિત થઈ. કંઈક કડાકા જેવો સામાન્ય અવાજ આવ્યો. ખિલખિલાટ અને કિલકારીઓ વચ્ચે અચાનક જ ચીસાચીસ થઈ ગઈ. કોઈ કંઈ સમજે એ પહેલાં તો 500થી વધુ લોકોને મોત દેખાયું અને ટપોટપ મચ્છુ નદીમાં પડવા લાગ્યા, જેમાંથી 141 જેટલા મૃતદેહ બહાર કઢાયા છે. મચ્છુ નદીમાં હજુ પણ અનેક મૃતદેહો ફસાયા હોવાની આશંકા છે. જેના કારણે મોરબીમાં બચાવ કામગીરીમાં ડ્રિપ ટ્રેકર મશીન માંગવામાં આવ્યું છે. ડ્રિપ ટ્રેકર મશીનની મદદથી મૃતદેહ શોધવાની કામગીરી કરાશે. 

મચ્છુ નદી પરના ચેકડેમને તોડી પાણી ઓછુ કરાશે
મોરબી ઝુલતો પુલ તૂટતા સેના સહિત રેસ્ક્યૂ ટીમો દ્વારા બચાવ કામગીરી કરવામાં આવી રહી છે. નદીનું પાણી ઓછું કરવા ચેકડેમને તોડવામાં આવી રહ્યો છે. મચ્છુ નદી પરના ચેકડેમ તોડી પાણી ઓછુ કરાશે. નદીમાંથી પાણીના નિકાલ માટે ચેકડેમ તોડવાની કામગીરી ચાલી રહી છે. ચેકડેમમાં 10 ફૂટનું ગાબડુ પાડીને પાણી બહાર કાઢવાની કામગીરી કરવામાં આવી રહી છે. 

મૃતદેહો જોઈ ભલભલાના કાળજા કંપી ઉઠયા
મોરબીમાં હોનારત... દુર્ઘટના એવી કે આખા ગુજરાતની આંખોમાં આંસુ આવી ગયા. બાળકો અને મહિલાઓના મૃતદેહો જોઈ ભલભલાના કાળજા કંપી ઉઠયા, આખી રાત સેનાની ત્રણેય પાંખની ટુકડીઓ દ્વારા રેસ્ક્યૂ કરવામાં આવ્યું છે ત્યારે મુખ્યમંત્રી ભૂપેન્દ્ર પટેલે ફરી તમામ અધિકારીઓની બેઠક બોલાવી ચર્ચા કરી છે. જવાબદારો સામે કડકમાં કડક પગલાં લેવાની જરૂર છે તેવી આખા રાજ્યમાં લોકલાગણી હાલ તો દેખાઈ રહી છે. 

અત્યાર સુધીના તમામ અપડેટ:
- મોરબીમાં ઝૂલતો પૂલ તૂટી જતાં દુર્ઘટના: અત્યાર સુધીમાં 141 લોકોના મૃત્યુ થયા હોવાની પુષ્ટિ 
- ઘટનાની જાણ થયા બાદ PM મોદીએ CM ભૂપેન્દ્ર પટેલ સાથે જ્યારે ગૃહમંત્રી અમિત શાહે ગૃહરાજ્યમંત્રી હર્ષ સંઘવી સાથે કરી વાતચીત 
- CM ભૂપેન્દ્ર પટેલ તમામ કાર્યક્રમો રદ્દ કરી મોરબી પહોંચ્યા, આખી રાત રેસ્ક્યૂ કામોને લઈ કર્યા પ્રયાસ 
- આખી રાત સેનાની ટુકડીઓ, NDRF-SDRF ની મદદથી કરવામાં આવ્યું રેસ્ક્યૂ ઓપરેશન 
- મૃતકોના પરિજનો માટે કેન્દ્ર સરકારે 2 લાખ અને રાજ્ય સરકારે 4 લાખ રૂપિયાના વળતરની કરી જાહેરાત 
- તંત્રએ જાહેર કર્યો હેલ્પલાઈન નંબર: 02822 243300
- મુખ્યમંત્રીએ 5 સભ્યોની હાઈપાવર કમિટીનું કર્યું ગઠન, રાત્રે 2 વાગ્યાથી જ તપાસનો ધમધમાટ શરૂ 
- દુર્ઘટનાને ધ્યાને રાખી PM મોદીએ રોડ શો તથા સ્નેહમિલનના કાર્યક્રમ કર્યા રદ્દ
- ગુજરાતભરમાં અનેક સામાજિક તથા ધાર્મિક કાર્યક્રમ રદ્દ કરી દેવામાં આવ્યા 
- જવાબદારો સામે કલમ 304,308,114 મુજબ કેસ દાખલ કરવામાં આવ્યો