અમદાવાદ / અમરાઈવાડીમાં ચાર અજાણ્યા શખ્સોએ યુવકને છરીના આડેધડ ઘા ઝીકયા, માંસના લોંચા બહાર આવી ગયા.!

• અમરાઈવાડીમાં મોડી રાત્રે યુવક પર છરી વડે હુમલો કરાતા ચકચાર
• ચાર અજાણ્યા શખ્સોએ યુવકને છરીના આડેધડ ઘા ઝીંકી દીધા
• પોલીસે ગુનો નોંધી તપાસનાં ચક્રોગતિમાન કર્યા

 શહેરના અમરાઇવાડી વિસ્તારમાં મોડી રાતે ચાર અજાણ્યા શખ્સોએ એક યુવક પર અગમ્ય કારણોસર છરીના આડેધડ ઘા ઝીંકી દેતાં ચકચાર મચી ગઇ છે. યુવક પર છરીના ઘા એવી રીતે ઝીંક્યા કે તેના શરીરનું માંસ રીતસર બહાર આવી ગયું હતું. યુવક પર લૂંટના ઇરાદે હુમલો થયો છે કે પછી અંગત અદાવતમાં હુમલો થયો છે તે શોધવા માટે પોલીસે ચક્રો ગતિમાન કર્યાં છે. 

મૃતકનાં પરિવારજનોએ હુમલાની ફરિયાદ કરી
અમરાઇવાડી વિસ્તારમાં રહેતા અશ્વિન મકવાણાએ અમરાઇવાડી પોલીસ સ્ટેશનમાં ચાર અજાણ્યા શખ્સો વિરુદ્ધ હુમલાની ફરિયાદ કરી છે. અશ્વિન મકવાણા તેના પરિવાર સાથે રહે છે અને ઇસનપુરબ્રિજ નીચે આવેલી હાર્ડવેરની દુકાનમાં નોકરી કરે છે. ગઇ કાલે અશ્વિન મકવાણા ઘરે બેઠો હતો ત્યારે તેમના ભાઇ લક્ષ્મણ અને દીકરીઓ ઘરમાં હાજર હતાં ત્યારે નાનો ભાઇ અનુપ બહાર આંટો મારવા ગયો હતો. અનુપ સંતોષી પાન પાર્લર પાસે બેઠો હતો ત્યારે ભંગારની દુકાન ધરાવતા અનિલભાઇ અશ્વિનને કહેવા આવ્યા હતા કે અનુપને કોઇ મારી રહ્યું છે. અશ્વિન તરત જ અનિલભાઇની દુકાન આગળ ગયા ત્યારે અનુપ લોહીથી લથબથ હાલતમાં પડ્યો હતો.   હુમલાખોરોએ અનુપને છરીના ઘા માર્યા હતા, જેમાં તેના શરીરનું માંસ બહાર આવી ગયું હતું.

ઘટનાની જાણ સ્થાનિકોને થતાં તે પણ દોડી આવ્યા
અશ્વિને તેના ભાઇ લક્ષ્મણને જાણ કરી દીધી હતી, જેથી તે પણ દોડી આવ્યો હતો. ઘટનાની જાણ સ્થાનિકોને થતાં તે પણ દોડી આવ્યા હતા અને ઈજાગ્રસ્ત અનુપને સારવાર માટે હોસ્પિટલ ખસેડવામાં આવ્યો હતો. અનુપ પાન પાર્લર પાસે બેઠો હતો ત્યારે ચાર અજાણ્યા શખ્સો આવ્યા હતા અને એકાએક છરીઓ કાઢીને હુમલો કરી દીધો હતો. અનુપને ચારથી પાંચ છરીઓના ઘા ઝીંકી દેવામાં આવ્યા છે. ઘટનાની જાણ અમરાઇવાડી પોલીસને થતાં તેઓ તાત્કા‌િલક ઘટનાસ્થળે પહોંચી ગયા હતા. પોલીસે ચાર અજાણ્યા શખ્સો વિરુદ્ધ હુમલાની ફરિયાદ નોંધી છે, જ્યારે અનુપ પર હુમલો કરવાનું કારણ અંગત અદાવત કે પછી લૂંટનો ઇરાદો હતો તે જાણવા માટે પણ ચક્રો ગતિમાન કર્યાં છે.

આ મામલે ઈજાગ્રસ્ત યુવકના ભાઈ અશ્વિન મકવાણાએ જણાવ્યું છે કે મારા ભાઈ પર જ્યાં હુમલો થયો ત્યાં કેટલાક માથાભારે યુવકો દારૂ તેમજ માદક દ્વવ્યોનો નશો કરતા હોય છે. ગઈકાલે અનુપ ઉપર હુમલો કેમ થયો તેનું હજી સુધી જાણવા મળ્યું નથી.