લૉકડાઉનમાં લફરું / અમદાવાદમાં પત્નીની જાણ બહાર પતિએ એવું કામ કર્યું કે નોંધાઇ ફરિયાદ

• પત્નીની જાણ બહાર પતિ પ્રેમિકા સાથે ફરાર
• મહિલાએ વેજલપુર પોલીસ સ્ટેશનમાં નોંધાવી ફરિયાદ
• પત્ની ઘરખર્ચ માગતી તો પતિ માર મારતો

કોરોનાકાળમાં પત્ની પાસે જવાનું બંધ કરી દઇને યુવતી સાથે નાસી જનાર પતિ વિરુદ્ધ વેજલપુર પોલીસ સ્ટેશનમાં ફરિયાદ નોંધાઇ છે. પત્ની પતિને સાસરિયાંથી અલગ રહેવા માટે લઇ ગઇ હતી. જોકે પતિ અઠવાડિયામાં એક જ વખત પત્ની પાસે જતો હતો. 

અમદાવાદના વેજલપુર વિસ્તારમાં રહેતી ૩૬ વર્ષિય મહિલાએ વેજલપુર પોલીસ સ્ટેશનમાં પતિ તેમજ સાસરિયાં વિરુદ્ધ ફરિયાદ કરી છે. ફરિયાદમાં કરેલા આક્ષેપ પ્રમાણે મહિલાનાં લગ્ન વર્ષ ૨૦૧૦માં ગોમતીપુરમાં રહેતા યુવક સાથે થયાં હતા. લગ્ન બાદ મહિલાને સાસુ-સસરા અને અન્ય સાસરિયાંએ દોઢેક વર્ષ સુધી સારી રીતે રાખ્યા બાદ નાની-મોટી વાતોમાં ત્રાસ આપવાનું શરૂ કર્યું હતું. મહિલાને તેના પુત્રની સામે પતિ પણ અલગ અલગ બાબતોમાં ઝઘડા કરી મારમારી ત્રાસ આપતો હતો. 

સાસરિયાંના ત્રાસથી પત્ની અલગ રહેવા ગઇ ચાલી ગઇ

સાસરિયાંના ત્રાસથી કંટાળીને મહિલા તેના સાસરિયાંથી અલગ પતિ સાથે રહેવા માટે ગઇ હતી ત્યારે સાસુ સસરાએ મહિલાને અલગ નહીં રહેવાનું કહ્યું હતું. જોકે મહિલા નહીં માનતાં તે અલગ રહેવા ગઇ હતી. મહિલાના આ નિર્ણયથી તેનો પતિ વિરોધમાં હતો. જેથી તે માતા-પિતા સાથે રહેતો હતો અને અઠવાડિયામાં એક જ દિવસ પત્ની અને પુત્ર પાસે રહેવા માટે જતો હતો.

'મારા દીકરાને જ્યાં જવુ હશે ત્યાં જશે તારે શું કામ છે, તું તલાક આપી દે' - સાસરિયા

મહિલા જ્યારે ઘરખર્ચ માગતી હતી ત્યારે તેને પતિ માર મારતો હતો. કોરોનાની મહામારી વખતે લોકડાઉન આવતાં મહિલા પાસે તેનો પતિ આવતો નહિ અને જ્યારે તે ફોન કરે તો તે ઉપાડતો પણ નહિ. મહિલા તેનો પતિ આવશે તેવી આશા રાખીને બેઠી હતી. તેવામાં તેને જાણવા મળ્યું કે તેનો પતિ કોઈ યુવતીને લઈને ભાગી ગયો છે. જેથી મહિલાએ તેની સાસુ અને સસરાને પૂછતાં તે લોકોએ કહ્યું કે મારા દીકરાને જ્યાં જવું હશે ત્યાં જશે તારે શું કામ છે તું તલાક આપી દે. આમ પતિ સહિતનાં સાસરિયાંએ ત્રાસ આપતાં આખરે મહિલાએ ફરિયાદ નોંધાવતાં વેજલપુર પોલીસે તપાસ શરૂ કરી છે.