ચોમાસું / મેઘરાજા હજુ થોભવાના નથી: સૌરાષ્ટ્ર સહિત આટલા જિલ્લામાં અતિભારે વરસાદની આગાહી, અમદાવાદથી લઈને રાજકોટ ઘમરોળાશે

• ગુજરાતમાં ભારેથી અતિભારે વરસાદની આગાહી
• અગામી 5 દિવસ સમગ્ર ગુજરાતમાં રહેશે વરસાદી માહોલ
• સૌરાષ્ટ્રમાં અતિભારે વરસાદની આગાહી

ગુજરાતમાં ચોમાસાની શરૂઆત આ વર્ષે ધમાકેદાર થઈ છે અને હવે વરસાદનો ત્રીજો રાઉન્ડ પણ શરૂ થઈ ગયો છે. રાજ્યના અનેક જિલ્લાઓમાં ધોધમાર વરસાદ પણ પડી રહ્યો છે. તેવામાં રાજ્યના ખેડૂતોની ચિંતા વધારતી આગાહી હવામાન વિભાગ દ્વારા આપવામાં આવી છે. હવામાન વિભાગની આગાહી પ્રમાણે ગુજરાતમાં ભારેથી અતિભારે વરસાદ વરી શકે છે.

5 દિવસ સમગ્ર ગુજરાતમાં વરસાદી માહોલ રહેશે
હવમાન વિભાગની આગાહી મુજબ અગામી 5 દિવસ સમગ્ર ગુજરાતમાં વરસાદી માહોલ રહેશે. જેમાં સૌરાષ્ટ્રમાં અતિભારે વરસાદની આગાહી કરાઈ છે. જૂનાગઢ, જામનગર, ભાવનગર તેમજ રાજકોટ, પોરબંદર જિલ્લામાં ભારે વરસાદની આગાહી કરવામાં આવી છે. અમદાવાદ અને આસપાસના વિસ્તારમાં અતિભારે વરસાદની આગાહી છે તો બીજી તરફ ખેડા અને આણંદ જિલ્લામાં ભારે વરસાદની આગાહી કરવામાં આવી છે. ઉત્તર ગુજરાતમાં મધ્યમ વરસાદની આગાહી કરાઈ છે. તેમજ માછીમારોને અગામી 4 દિવસ દરિયો ન ખેડવા સૂચના આપવામાં આવી છે. 

ખેડૂતો ત્રાહિમામ પોકારી ગયા
મહત્વનું છે કે, છેલ્લા 1 મહિનાથી રાજ્યમાં અવિરત વરસાદી મહેર યથાવત છે. જેના કારણે હવે તો ખેડૂતો ત્રાહિમામ પોકારી ગયા છે. કારણ કે, સતત વરસાદી મહેરના કારણે ચોમાસું પાક હવે ફેઈલ થવાની કગારે પહોંચી ગયો છે. અને જો આગામી 5 દિવસ વરસાદ રહ્યો તો લીલા દુકાળની સંભાવના પણ છે. કારણ કે, આ અવિરત વરસાદના કારણે પાક કોહવાતો જઈ રહ્યો છે. જોકે હાલ તો હવામાન વિભાગે ભારે વરસાદની આગાહી આપી છે. તેવામાં જોવાનું એ રહેશે કે, આગામી 5 દિવસ વરસાદ કેવી આફત બનીને વરસે છે.