- વાળની સાચવણી ખૂબ જરૂરી
- પ્રદૂષણ અને તણાવને લીધે વાળની સમસ્યા વધી
- વાળની માવજત ઘરેલૂ ઉપાયો કરીને પણ કરી શકાય છે
સતત બદલાતી ઋતુઓની સાથે-સાથે આપણે પણ બદલાતાં રહેવું પડે છે. બદલાતી ઋતુની ત્વચા અને વાળ ઉપર ઝડપથી અસર થતી હોય છે. ચોમાસામાં ભેજવાળા વાતાવરણના કારણે ઉનાળામાં પરસેવાના લીધે અને શિયાળામાં ઠંડકના કારણે શરીરના વિવિધ ભાગોની યોગ્ય માવજત જરૂરી બની જાય છે.
હવે ગરમીની શરૂઆત થઇ ગઈ છે અને તેની સીધી અસર વાળ પર પણ જોવા મળશે. અત્યારે ખોરાક અને પાણીના કારણે વાળ ખરવાની, રૂક્ષ થવાની અને ગ્રે હેરની સમસ્યા લગભગ તમામ વ્યક્તિમાં જોવા મળે છે. આ સમસ્યાઓ દૂર કરવા માટે તમારે કેટલીક બાબતોની કાળજી રાખવી પડે છે. '
- સૌપ્રથમ તો વાળને સવાર-સાંજ સૂર્યનો કોમળ તડકો અને હવા મળી રહે તેનું ધ્યાન રાખવું જોઇએ.
- સામાન્ય આદત પ્રમાણે યુવતીઓ વાળની ગૂંચ ઉપરથી કાઢતી હોય છે, પરંતુ ગૂંચ પહેલાં નીચેથી કાઢવી. ત્યાર બાદ ઉપરથી ગૂંચ કાઢવી, જેથી કરીને વાળ ઓછા તૂટે.
- વાળ ધોવા માટે ઠંડું પાણી અથવા તો નવશેકા પાણીનો ઉપયોગ કરવો જોઇએ. અતિશય ગરમ પાણી વાળને નુકસાન કરે છે.
- વાળ ધોવા માટે આયુર્વેદિક શેમ્પૂનો ઉપયોગ કરશો તો વાળ વધુ સારા રહેશે. હેરક્રીમ, હેરલોશન, હેરડાઇ, હેરકલર જેવાં દ્રવ્યોથી લાંબા ગાળે વાળને નુકસાન થાય છે.
ઘણાં પરિબળો વાળ પર અસર કરે છે
મહિલાઓની તણાવભરી જીવનશૈલી, પ્રદૂષણ અને અન્ય ઘણાં પરિબળો છે, જે વાળ પર અસર કરે છે, જેથી ખરાબ થઇ ગયેલા વાળને સુંવાળા અને મુલાયમ બનાવવા માટે હેર-સ્પા ટ્રીટમેન્ટ લઇ શકો છો અને આ ટ્રીટમેન્ટમાં માત્ર પ૦થી ૬૦ મિનિટ જેટલો સમય લાગે છે. આ ટ્રીટમેન્ટથી તમારા વાળને મૂળમાંથી જ પોષણ મળે છે, જેથી વાળના રી-ગ્રોથનું પ્રમાણ પણ વધે છે.
માથામાં નાખવા તલ કે કોપરેલનું તેલ વાપરો
જો તમે વાળ ધોઇને તેલ નાખવાનાં હો તો તકેદારી રાખો કે વાળ એકદમ સુકાઇ જાય પછી જ તેલ નાખો. જો તમે રોજ ઓફિસ જાઓ છો અને તેલ ન નાખી શકતાં હો તો રાતે તેલ નાખી લો અને સવારે માથું ધોઇ નાખવું. આથી આખી રાત દરમિયાન તેલ વાળને પોષણ પૂરું પાડશે, જેને શિયાળામાં શરદી રહેતી હોય અથવા જેને શરદીનો કોઠો હોય તેણે ઠંડાં તેલ જેવાં કે આમળાં, દૂધી કે બ્રાહ્મી તેલનો ઉપયોગ ટાળવો. તેમણે તલનું તેલ, કોપરેલ, ભૃંગરાજ તેલ વાપરવું જોઇએ.
