ગૌરવ / ફ્રાન્સ ખાતે ફિલ્મ ફેસ્ટિવલમાં ગુજરાતી ફિલ્મ અભિનેત્રી કોમલ ઠક્કરે રેડ કાર્પેટ પર વૉક કરી વધાર્યું ગૌરવ

• ગુજરાતી ફિલ્મ ઇન્ડસ્ટ્રી અને ગુજરાતનું ગૌરવ વધાર્યું
• ગાલા લુકને કારણે ઉપસ્થિત લોકોમાં કોમલે વિશેષ આકર્ષણ જમાવ્યું
• કોમલ ઠક્કરે 2004માં મીસ કચ્છનો ખિતાબ જીત્યો હતો

તાજેતરમાં ફ્રાન્સ ખાતે કાન્સ ફિલ્મ ફેસ્ટિવલ યોજાયો હતો. આંતરરાષ્ટ્રીય સ્તરની આ ઇવેન્ટમાં મૂળ કચ્છની ગુજરાતી અભિનેત્રી કોમલ ઠક્કરે ભારતીય સાડી સાથે રેડ કાર્પેટ પર પહોંચીને ગુજરાતીઓનો ડંકો વગાડ્યો હતો. ગાલા લુકને કારણે ઉપસ્થિત અનેક લોકોમાં કોમલે વિશેષ આકર્ષણ જમાવ્યું હતુ અને તેમની સાથે સેલ્ફી લેવા માટે લોકોએ રીતસરની પડાપડી કરી હતી. 

બોલિવૂડ એભિનેત્રીની સાથે વોક કરનારી પહેલી ગુજરાતી અભિનેત્રી બની 
ફ્રાન્સ ખાતે દબદબાભેર યોજાતા અવ્વલ દરજ્જાના આ કાન્સ ફિલ્મ ફેસ્ટિવલમાં સતત ચર્ચામાં રહી કોમલ ઠક્કરે ભવિષ્યમાં ગુજરાતી ફિલ્મો માટે પાયો નાખી દીધો છે. ત્યારે ઢોલીવુડની ખ્યાતનામ અભિનેત્રી કોમલ ઠક્કરે કાન્સ ફિલ્મ ફેસ્ટિવલમાં રેડ કાર્પેટ વૉક કરી ગુજરાતી ફિલ્મ ઇન્ડસ્ટ્રી અને ગુજરાતનું ગૌરવ વધાર્યું છે. આ સાથે જ કોમલ ઠક્કર કાન્સમાં બોલિવૂડ એભિનેત્રીઓની સાથે વોક કરનારી આ પહેલી ગુજરાતી અભિનેત્રી બની ગઈ છે.

કોમલ ઠક્કરે 2004માં મીસ કચ્છનો ખિતાબ પણ જીત્યો
ગુજરાતની આ અભિનેત્રીએ કાન્સ ફિલ્મ ફેસ્ટિવલમાં રેડ કાર્પેટ પર વૉક કરતાં ગુજરાતી ફિલ્મ ઉદ્યોગમાં ગૌરવની લાગણી જન્મી છે. મહત્વનું છે કે, કોમલ ઠક્કરે ગુજરાતી ફિલ્મ મહીસાગરના સોગંદ, સહિયરની ચૂંદડી, ભડનો દીકરો, મારા ટોડલે બેઠો મોર ક્યાં બોલે ઉપરાંત અન્ય ફિલ્મોમાં અદભૂત અભિનય કર્યો છે.અત્રે નોંધનીય છે કે, આ ગુજરાતી અભિનેત્રી કોમલ ઠક્કરે 2004માં મીસ કચ્છનો ખિતાબ જીતીને પણ શાનદાર ખ્યાતિ મેળવી છે.