અનેક સવાલ / પાલીતાણામાં વિદ્યાર્થીઓને આપવાના બદલે સરકારી શાળાના પુસ્તકો ભંગારમાં વેંચી મરાયા

• પાલીતાણામાં સરકારી શાળાના પુસ્તકોની પસ્તી
• ધોરણ 1 થી 7ના પાઠ્યપુસ્તકો પસ્તીમાં વેચાયા
• એક ટેમ્પો ભરીને પાઠ્યપુસ્તકો પસ્તીમાં અપાતા રોષ

પાલીતાણાની સરકારી શાળાના વિદ્યાર્થીઓને વિનામૂલ્યે અપાતા પુસ્તકો પસ્તી ગણીને વેચી મારવામાં આવ્યાનું સામે આવ્યું છે. પસ્તી કરાયેલા પુસ્તકો ધોરણ 1 થી 7 ના હોવાનું સામે આવ્યું છે. તેવામાં સરકારી પુસ્તકો પસ્તીમાં વહેચતા પહેલા કોઈપણ જાતની પૂર્વ મંજૂરી સહિતની પ્રક્રિયા કરાઇ કે કેમ ? કયા કારણસર પુસ્તક વેચવામાં આવ્યા તે સહીતના સવાલો ઊભા થયા છે.

સરકારી શાળામાંથી પુસ્તકો લીધાની કબૂલાત
પાલીતાણામાં સરકારી શાળાના પુસ્તકોને પસ્તીમાં વેચી નાખ્યાની ચોંકાવનારી ઘટના સામે આવી છે. સરકારી શાળાના એક ટેમ્પો ભરાઈને પાઠ્ય પુસ્તકો પસ્તીમાં અપાતા આ અંગે સ્થાનિક લોકોને જાણ થઇ હતી જેને લઇને સ્થાનિકોએ રોષે ભરાયા હતા. લોકોએ એક સૂર થઇને પાઠ્ય પુસ્તકોને પસ્તીમાં વેચતા રોક્યા હતા.આ  અંગે લોકોએ ટેમ્પો વાળા અને પુસ્તક ખરીદનાર ધંધાર્થીની પૂછપરછ કરી હતી જેમાં માત્ર રૂ.21 કીલોના ભાવે પુસ્તકો વેચવામાં આવ્યા હોવાનું સામે આવ્યું હતું. વધુમાં પાલિતાણાની સરકારી શાળામાંથી પુસ્તકોની ખરીદી કરી હોવાની કબૂલાત પણ આપી હતી. જોકે પસ્તીમાં વેંચાયેલા પુસ્તકોનો જથ્થો કેટલો છે? તેનું કોઇ ચોક્કસ આંકડો સામે આવ્યો નથી.

મોટી સંખ્યામાં પુસ્તકો મળતા અનેક સવાલો
નોંધનિય છે કે સરકાર પાઠ્યપુસ્તક પાછળ કરોડો રૂપિયાનો ખર્ચ કરે છે, ત્યારે આમ  મોટી સંખ્યામાં પુસ્તકો પસ્તી બનતા હોવાથી સરકારનો ખર્ચ પાણીમાં જાય તેવો ઘાટ સર્જાયો છે. બીજી તરફ  શાળામાં વિદ્યાર્થીઓની ગણતરી બાદ જ પાઠ્યપુસ્તકો મેળવવામાં આવે છે, તો આ પાઠ્યપુસ્તક હજી સુધી પડ્યા રહ્યા તેની પાછળનું કારણ શુ? વિદ્યાર્થીઓને પાઠ્યપુસ્તકથી વંચિત રાખવામાં આવ્યા છે કે કેમ? જેવા અનેક સવાલો લોકોમાંથી ઉઠી રહ્યા છે.