સામુહિક આપઘાત કરનાર મનિષ સોલંકીના પરિવારના 7 સભ્યોની એકીસાથે નનામી ઉઠતાં સુરત હિબકે ચઢ્યું હતું.
Share
સુરતમાં પરિવારના 7 સભ્યોનો સામુહિક આપઘાત
એક જ પરિવારના 7 સભ્યોની નીકળી અંતિમયાત્રા
મનિષ સોલંકીએ પરિવાર સાથે કર્યો આપઘાત
સુરત માટે આજનો દિવસ ખૂબ ગમગીન રહ્યો છે. હસતો ખેલતો કિલ્લોલ કરતો અને લોકોને મદદ કરતો એક આખો પરિવાર કાયમ માટે દુનિયામાંથી વિદાય થઈ ગયો. સુરતના પાલનપુર જકાતનાકા વિસ્તારમાં સામુહિક આપઘાત કરેલા મનિષ સોલંકીના પરિવારના 7 સભ્યોની અંતિમયાત્રા નીકળી હતી ત્યારે આખું સુરત હિબકે ચઢ્યું હતું. પાલનપુર પાટિયા સ્થિત જકાતનાકા ખાતે આવેલ નિવાસ્થાન ખાતેથી અંતિમયાત્રા નીકળી લોકો ભારે હૈયે અંતિમયાત્રામાં જોડાયા હતા.
શું બન્યું હતું
સુરતના પાલનપુર જકાતનાક રોડ પર શનિવારે સવારે એક પરિવારના ત્રણ બાળકો સહિત સાત સભ્યો તેમના ઘરે મૃત હાલતમાં મળી આવ્યા હતા. પોલીસની પ્રાથમિક તપાસમાં છ વ્યક્તિઓના મોત ઝેરી પદાર્થ પીવાથી થયા હોવાનું બહાર આવ્યું છે, જ્યારે એક વ્યક્તિએ ફાંસો ખાધો હતો. એક જ પરિવારના 7 સભ્યોના સામૂહિક આપઘાત બાદ લોકોમાં જાતજાતની ચર્ચાઓ ચાલતી હતી. મૃતકની ઓળખ મનીષ સોલંકી, તેની પત્ની રીટા, તેના પિતા કનુ, તેની માતા શોભા અને ત્રણ બાળકો - દિશા, કાવ્યા અને કુશાલ તરીકે થઈ છે.
કેવી રીતે ખુલાસો થયો
શનિવારે સવારે તેના કર્મચારીઓ માલિક મનીષ સોલંકીનો સંપર્ક કરવાનો પ્રયાસ કરી રહ્યા હતા, અને જ્યારે તેમણે ફોનનો જવાબ ન આપ્યો ત્યારે તેમણે પડોશીઓને જાણ કરી અને બધા ભેગા થઈને પાછળની બારી તોડીને ઘરમાં પ્રવેશ્યા હતા. ત્યારે પરિવારના સભ્યો મરેલા પડ્યાં હતા જ્યારે એક વ્યક્તિ ગળેફાંસો ખાધેલી લટકતો હતો. મૃતદેહોને વધુ માટે પોસ્ટ-મોર્ટમ તપાસ માટે મોકલવામાં આવ્યા છે. સુરતમાં ફર્નિચર વેપારી મનિષ સોલંકીના પરિવારના 7 સભ્યોના સામુહિક આપઘાત મામલે પોલીસના હાથમાં સુસાઈડ નોટ આવી છે જેની પરથી ખબર પડે છે કે શા માટે તેમના પરિવારે ભેગા મળીને આપઘાત કરવાનું વિચાર્યું. કંઈ દેવા કે આર્થિક સમસ્યાને કારણે સોલંકી પરિવારે આપઘાત કર્યો નથી. પરંતુ ઉછીના પૈસાનું કારણ સામે આવ્યું છે. સોલંકી પરિવારના કિસ્સામાં ધરમ કરતા ધાડ પડી હોય તેવું લાગી રહ્યું છે.
શું છે સુસાઈડ નોટમાં
સુરતમાં એક જ પરિવારના 7 લોકોના મોતથી ચકચાર મચી છે. સુરતના પાલનપુર જકાતરોડ પર સિદ્ધેશ્વર એપાર્ટમેન્ટના પહેલા માળે રહેતા મનિષ સોલંકીએ પરિવારના 7 સભ્યો સાથે મળીને સામુહિક આપઘાત કરીી લીધો હતો. મૃતકોમાં ફર્નિચર વેપારી મનિષ સોલંકી, તેમના પિતા કનુભાઈ, માતા, મનીષની પત્ની રીટા, તેની બે પુત્રીઓ દિશા, કાવ્યા અને પુત્ર કુશલ સામેલ છે. સિદ્ધેશ્વર એપાર્ટમેન્ટના પહેલા માળે આવેલા સોલંકી પરિવારના સાત સભ્યોની લાશ મળી આવતા ચોંકાવનારો ખુલાસો થયો છે. સુસાઈડ નોટમાં મનિષે નીચે પ્રમાણેનું લખ્યું છે.
"પરોપકાર, ભલમંતશાહી, દયાળુ, સત્યભાવ મને હેરાન કરી ગયું"
રૂપિયા લીધા પછી કોઈએ પાછા નથી આપ્યાં.
"ઉપકાર નો બદલો કોઈ પાછો આપતો નથી.
"મારી જિંદગી માં મેં ઘણાને મદદ કરી છે"
"મારા બાળકો અને મારા પિતાની ચિંતા સતત મને મારી નાંખતી"
"રિટાબેન તારું ધ્યાન રાખજે"
"ઘનશ્યામ, જિન્નાભાઈ, બાલાભાઈ બધા રીટાબેનનું ધ્યાન રાખજો"
"જાણતા-અજાણતા કોઈ ભૂલચૂક થઈ હોય તો માફ કરજો"
"અમારી જાતિના જવાબદાર વ્યક્તિઓના નામ લખવા નથી"
"જવાબદાર લોકોને કુદરત જરૂરથી પરચો આપશે"
"કોઈના નામ લખવામાં અમને સંકોચ થશે"
"જીવતા પણ કોઈને હેરાન નથી કર્યા અને મર્યા પછી પણ કોઈને હેરાન નહિ કરીએ"
અમારા મર્યા પછી કોઈને હેરાન કરતાં
મૃતક મનિષ સોલંકીએ આપઘાત નોટમાં એવું પણ લખ્યું કે અમારા ગયા પછી કોઈને હેરાન ન કરતાં કારણ કે અમે "જીવતા પણ કોઈને હેરાન નથી કર્યા અને મર્યા પછી પણ કોઈ હેરાન થાય તેવું અમે નથી ઈચ્છતા.
રુમમાંથી ખાલી બોટલ પણ મળી
આ મામલે સુરત ડીસીપી રાકેશ બારોટે જણાવ્યું હતું કે ઘરમાંથી સુસાઇડ નોટ સાથે ખાલી બોટલ મળી આવી છે. તેમાં કદાચ ઝેર હતું. મનીષ ઉપરાંત ઘરના અન્ય સભ્યોનું પણ ઝેરના કારણે મોત થયું છે. એક સાથે એક પરિવારના સાત લોકોના મોતના સમાચારથી શહેરમાં ચકચાર મચી ગઈ છે. પોલીસે મૃતદેહોને પોસ્ટ મોર્ટમ માટે મોકલી આપી તપાસ હાથ ધરી છે. એફએસએલની ટીમ પણ ઘટના સ્થળે પહોંચી ગઈ છે. તપાસ સાથે સંકળાયેલી પોલીસનું માનવું છે કે મનીષે પહેલા પરિવારને ઝેર આપ્યું હતું અને પછી ફાંસો ખાધો હતો. જો કે સત્ય શું છે, તે તપાસ બાદ જ ખબર પડશે.
