ક્રાઈમ / 'સાહેબ, તમારા ક્રેડિટ કાર્ડમાં વધારાના પોઈન્ટ આવ્યા છે...' અમદાવાદમાં છેતરપિંડી કરતી આ ગેંગથી ચેતજો

• ક્રેડિટકાર્ડમાં વધારાના પોઇન્ટ રૂપિયામાં ટ્રાન્સફર નામે ઠગાઈ
• યુવકે લિંક ઓપન કરતાં ખાતામાંથી રૂપિયા ડેબિટ થઇ ગયા
• અનિરુદ્ધસિંહ ચૌહાણે ઠગાઈની ફરિયાદ નોંધાવી 

અમદાવાદ શહેરમાં ક્રેડિટકાર્ડમાં વધારાના પોઇન્ટ રૂપિયામાં ટ્રાન્સફર કરવાનું કહી ઠગાઈ કરતી ગેંગ હાલમાં ખૂબ જ સક્રિય થઇ છે. શહેરની ફાઈનાન્સમાં કામ કરતા યુવક સાથે પોઇન્ટ રૂપિયામાં કન્વર્ટ કરી આપવાના બહાને ગઠિયાએ 1.52 લાખની છેતરપિંડી આચરી હોવાની ઘટના સામે આવી છે. યુવકે લિંક ઓપન કરતાં ખાતામાંથી રૂપિયા ડેબિટ થઇ ગયા હતા.

અનિરુદ્ધસિંહ ચૌહાણે ઠગાઈની ફરિયાદ
સાણંદ ખાતે રહેતા અનિરુદ્ધસિંહ ચૌહાણે ઠગાઈની ફરિયાદ સાયબર ક્રાઇમ પોલીસ સ્ટેશનમાં નોંધાવી છે. અનિરુદ્ધસિંહ પ્રાઇવેટ ફાઇનાન્સમાં નોકરી કરે છે. અનિરુદ્ધસિંહ પર અજાણ્યા નંબર પરથી ફોન આવ્યો હતો અને તેણે કહ્યું હતું કે તમે જે કાર્ડ વાપરો છો તેમાં વધારાના પોઇન્ટ જમા થયા છે. તે જોઇતા હોય તો પોઇન્ટમાંથી રૂપિયામાં ટ્રાન્સફર કરી ક્રેડિટકાર્ડમાં જમા કરાવી દેશે. ગઠિયાએ અનિરુદ્ધસિંહના મોબાઈલમાં એક લિંક મોકલી હતી અને તેમાં આપેલી તમામ વિગત ભરવા માટે જણાવ્યું હતું. થોડી વાર બાદ અનિરુદ્ધસિંહના મોબાઈલમાં અલગ અલગ ઓટીપી આવ્યા હતા. અનિરુદ્ધસિંહના ખાતામાંથી કુલ 1.52 લાખ રૂપિયા ડેબિટ થયાનો મેસેજ આવ્યો હતો. ત્યાર બાદ અનિરુદ્ધસિંહે તરત જ એક્સિસ બેન્કના કસ્ટમર કેરમાં ફોન કરી કાર્ડ બ્લોક કરાવી દીધું હતું. 

બોપલ પોલીસે અજાણ્યા ગઠિયા વિરુદ્ધ ગુનો નોંધી વધુ તપાસ હાથ ધરી
અનિરુદ્ધસિંહ સાથે કોઈ ગઠિયાએ ઠગાઈ કરી હોવાથી તેણે સાયબર ક્રાઇમ પોલીસ સ્ટેશનમાં ફરિયાદ નોંધાવી છે. બોપલ પોલીસે અજાણ્યા ગઠિયા વિરુદ્ધ ગુનો નોંધી વધુ તપાસ હાથ ધરી છે. ઉલ્લેખનીય છે કે હાલમાં સાયબર ગઠિયાઓ લોકોને ફોન કરી અલગ અલગ ઓળખ આપી નવું ડેબિટ-ક્રેડિટકાર્ડ કઢાવવા, ક્રેડિટકાર્ડના રિવોર્ડ પોઈન્ટ જમા કરાવવા, દેશ-વિદેશની અગ્રણી કંપનીઓ, હોસ્પિટલમાં નોકરી અપાવવાનું કહી, લોન અપાવવાના બહાને તથા ગિફ્ટ-લોટરી લાગી હોવાના બહાને તેમજ ઓનલાઈન શોપિંગના બહાને છેતરપિંડી આચરી પડાવી રહ્યા છે.