આરોપ / ચેક કરાવજો.! ડીસામાં પ્રતિષ્ઠિત જ્વેલર્સ માલિકે એક મહિલા ગ્રાહકને નકલી દાગીના પધરાવી દીધા, તમે પણ ન કરતાં મહિલા જેવી આ ભૂલ

• ડીસાના પ્રતિષ્ઠિત જ્વેલર્સ માલિકે નકલી સોનુ ધાબડી દીધું
• મહિલાએ જ્વેલર્સના માલિક સામે ડીસા પોલીસ મથકમાં નોંધાવી ફરિયાદ
• પોલીસ દ્વારા તપાસનો ધમધમાટ

ડીસાની એક પ્રતિષ્ઠિત જ્વેલર્સ માલિકે એક મહિલા ગ્રાહકને નકલી દાગીના પધરાવી દીધા હોવાની ઘટના સામે આવતા ચકચાર જાગી છે.જે મામલે મહિલાએ જ્વેલર્સના માલિક સામે ડીસા ઉત્તર પોલીસ મથકે ફરિયાદ નોંધાવતા પોલીસે તપાસના ચક્રોગતિમાન કર્યા છે.આ ચકચારી કિસ્સાની વિગત એવી છે કે ડીસાના લાલચાલી વિસ્તારમાં રહેતા કમલાબેન ઠક્કરે વર્ષ 2017 માં તેઓના કુલ સાત તોલા સોનાના દાગીના ખરીદ્યા હતા. આ દાગીના ડીસાના ફુવારા સર્કલ પાસે આવેલ રાજદીપ જ્વેલર્સમાંથી ખરીદ્યા હતા. જેમાં તેમણે સોનાનો દોરો, ચાર સોનાની બંગડી મળી કુલ પાંચ તોલા સોનાના દાગીના લેતા જ્વેલર્સ સંચાલકે પાકું બિલ પણ આપ્યુ હતું. 

17 માર્ચ 2023 ના રોજ દાગીના ખરીદ્યા હતા

ત્યારબાદ કમલાબેનને હવે રૂપિયાની જરૂર પડતા તેઓ તા. 17 માર્ચ 2023 ના રોજ તેમના પતી સાથે રાજદીપ જ્વેલર્સમાંથી ખરીદેલ સોનાના દાગીના પરત વેચવા જતા રાજદીપ જ્વેલર્સમાં હાજર મેનેજરે તેઓને અમો દાગીના પરત નહીં લઈએ તેમ જણાવ્યુ હતું. જેથી કમળાબેન અને તેમના પતિ  લેખરાજ ચાર રસ્તા પાસે આવેલ સોના ચાંદીની દુકાનમાં દાગીના વેચવા ગયા હતા. જેથી દુકાનદારે દાગીનાનું ટચ કઢાવ્યા બાદ ભાવની ખબર પડશે તેમ જણાવ્યા તેઓ બંને જણાએ સોનાના દાગીનાનો ટેસ્ટિંગ લેબોરેટરીમાં ટચ કઢાવતા ટેસ્ટિંગ કરનારે આ દાગીના નકલી હોવાનું  જણાવતા બન્નેના પગ નીચેથી જમીન સરકી ગઈ હતી.

દાગીના નકલી હોવાનું બિલ પણ આપ્યું હતું. દાગીના નકલી હોવાની જાણ થતાંજ કમલાબેન અને તેમના પતિ આ બિલ લઈને રાજદીપ જ્વેલર્સના માલિક ભરતભાઈ ચૌધરીને મળ્યા હતા પરંતુ ભરતભાઇએ આ દાગીના તેમની દુકાનેથી ખરીદેલ નથી તેમ કહી બંનેને દુકાનમાંથી કાઢી મૂક્યા હતા. ત્યારબાદ કમલાબેન અવારનવાર રાજદીપ જ્વેલર્સમાં જઈ તેમના દાગીના વિશે વાત કરતા તેઓ કોઈ જવાબ આપતા ન હતા. આમ  રાજદીપ જવેલર્સના માલિકે સોનાના દાગીનાની જગ્યાએ અલગ ધાતુ મિશ્ર કરી ખોટા દાગીના આપી છેતરપિંડી તેમજ વિશ્વાસઘાત કરેલ હોઇ કમલાબેને ડીસા ઉત્તર પોલીસ મથકે જ્વેલર્સ માલિક ભરત ચૌધરી સામે ફરિયાદ નોંધાવતા ડીસા શહેર ઉત્તર પોલીસે તપાસ હાથ ધરી છે.