વિકૃતિ / અમદાવાદમાં શિક્ષકની અશ્લીલ કરતૂત, કરાટે ટીચરે, વિદ્યાર્થીનીઓને ફોનમાં બીભત્સ વીડિયો બતાવ્યો, લંપટની ઘરપકડ

• એકલવ્ય સ્કૂલમાં બની શરમજનક ઘટના
• કરાટે શિક્ષકે વિદ્યાર્થીઓને બતાવ્યાં અશ્લીલ વીડિયોઝ
• લંપટ શિક્ષકે વિદ્યાર્થીનીઓને ધમકી પણ આપી હતી

અમદાવાદમાં વસ્ત્રાલ વિસ્તારમાં આવેલી એકલવ્ય એજ્યુકેશન સ્કૂલમાં ફરી એક શિક્ષકને લજવતો કિસ્સો સામે આવ્યો. વસ્ત્રાલમાં આ સ્કૂલની વિદ્યાર્થીનીઓને અશ્લીલ વિડીયો બતાવવા બદલ પોલીસે લંપટ શિક્ષક વિરુદ્ધ ફરિયાદ નોંધી હતી જે બાદ શિક્ષકની ધરપકડ કરવામાં આવી. શિક્ષકનાં આ વિકૃત વર્તનથી વાલીઓએ સ્કૂલમાં હોબાળો મચાવ્યો હતો.  પ્રતિષ્ઠિત સ્કૂલમાં કોણ છે આ વિકૃત  શિક્ષક?

કરાટે શીખવતો લંપટ શિક્ષક
અમદાવાદમાં વસ્ત્રાલ વિસ્તારમાં આવેલી એકલવ્ય એજ્યુકેશન સ્કૂલમાં કરાટે શીખવતાં લંપટ શિક્ષક શાળાની વિદ્યાર્થીનીઓને તેના ફોનમાં અશ્લીલ વીડિયો બતાવતો હતો. આ વિદ્યાર્થીનીઓને બીભત્સ વીડિયો બતાવ્યા બાદ શિક્ષકે વિદ્યાર્થીનીઓને કોઈને કહેશો તો ક્લાસમાં આવવા નહીં દે તેવી ધમકી પણ આપી હતી. જેનાં કારણે વિદ્યાર્થીનીઓએ કોઈને આ ઘટના અંગે જાણ નહોતી કરી. જો કે ઘટનાનું પુનરાવર્તન થતું રહેતા વિદ્યાર્થીનીઓએ તેમના વાલીને સમગ્ર ઘટના અંગે જાણ કરી હતી. ઘટનાની જાણ વાલીઓને થતાં તેઓ શાળાએ પહોંચી હોબાળો કરી લંપટ શિક્ષક આર્ય દુબેની ધુલાઈ કરી હતી. પોલીસે ઘટના સ્થળે પહોંચીને સમગ્ર મામલે વાલીઓના અને શાળાના પ્રિંસિપાલના નિવેદન નોંધી લંપટ શિક્ષક સામે ગુનો નોંધી ધરપકડ કરી છે.

પોલીસે કરી ધરપકડ
પોલીસ તપાસમાં સામે આવ્યું કે શિક્ષક આર્ય દુબે એ વિકૃત માનસિકતા સાથે ન્યૂડ વીડિયો બતાવ્યા હતા. દિવાળીના એક સપ્તાહ પહેલા શિક્ષક આર્ય દુબેએ વિદ્યાર્થીનીઓને આ વીડિયો બતાવ્યાં હતા. શિક્ષક છેલ્લા દોઢ વર્ષથી શાળામાં કરાટેના ટ્રેનર તરીકે કામ કરી રહ્યો હતો. સ્કૂલમાં વાલીઓએ રોષ વ્યકત કરતા શાળા પ્રશાસન દ્વારા વિદ્યાર્થીનીઓને પ્રત્યક્ષ રીતે બોલાવી તેમની સાથે બનેલ ઘટના અંગે જાણકારી મેળવી જેના આધારે શાળા દ્વારા આર્ય દુબે નામના કરાટે શિક્ષકને નોકરીમાંથી હાંકી કાઢવામાં આવ્યા. તેમ છતાંય વાલીઓનો આક્રોશ શાંત થયો ન હતો. કારણ કે  અશ્લીલ વીડિયોને લઈને શિક્ષકે વિદ્યાર્થીનીઓને કરાટેમાં માર્ક ન મુકવાની ધમકી પણ આપવામાં આવી હતી..

કોર્ટમાં થશે રજૂઆત
વસ્ત્રાલની એકલવ્ય સ્કૂલમાં બનેલી આ અશ્લીલ ઘટના બાદ રામોલ પોલીસે શિક્ષકની ધરપકડ કરીને કોર્ટમાં રજૂ કરવાની કાર્યવાહી હાથ ધરી છે. અગાઉ પણ સેન્ટ ઝેવિયર્સ લોયલા સ્કૂલના પીટી ટીચર દ્વારા પણ વિદ્યાર્થીનીઓની છેડતી કરવાની ઘટના સામે આવી હતી. ત્યારે આવા લંપટ શિક્ષકના કારણે હવે વિદ્યાર્થીનિઓ સ્કૂલમાં પણ સુરક્ષિત નથી.