- દેવભૂમિ દ્વારકાની શાળાના વીડિયો મુદ્દે શિક્ષણમંત્રી પ્રફુલ્લ પાનસેરિયાનું નિવેદન
- શાળામાં ઉજવાયેલા 'જોયફૂલ સેટરડે'ની પ્રફુલ્લ પાનસેરિયાએ કરી પ્રશંસા
- પ્રફુલ્લ પાનસેરિયાએ વીડિયોકોલથી શિક્ષક સામત બેલાના કાર્યની કરી સરાહના
- બાળકો જાતે ભોજન બનાવી જમતા હોવાનો વીડિયો થયો હતો વાયરલ
- હરીપર ગામના શિક્ષક સામત બેલાએ બાળકોના સુંદર વીડિયો બનાવ્યો હતો
- શિક્ષણમંત્રીએ શિક્ષકને અભિનંદન પાઠવી કાર્યના કર્યા વખાણ
Dwarka News : દેવભૂમિ દ્વારકા જિલ્લાના કલ્યાણપુર તાલુકાના હરીપર પ્રાથમિક શાળાના બાળકોનો એક વિડીયો વાયરલ થયા બાદ આ સમગ્ર મામલે ગુજરાતના શિક્ષણ મંત્રી પ્રફુલ પાનસરિયા એ મહત્વની પ્રતિક્રિયા આપી અને બાળકોનો તેમજ શિક્ષકોનો ઉત્સાહ વધાર્યો હતો. વાત જાણે એમ છે કે, કલ્યાણપુર તાલુકાના છેવાડા ના હરીપર ગામમાં આવેલ સરકારી પ્રાથમિક શાળામાં બાળકો રીંગણાંનો ઓળો અને રોટલા બનાવતા અને જમતા હોય તેવો વિડિયો સોશિયલ મીડિયામાં વાયરલ થયો હતો. જે બાદમાં ખુદ શિક્ષણમંત્રીએ શિક્ષકને ફોન કરી શાળા અને બાળકોના વખાણ કર્યા હતા.
શનિવારના દિવસે દેવભૂમિ દ્વારકા જિલ્લાના કલ્યાણપુર તાલુકાના હરીપર પ્રાથમિક શાળામાં જોયફૂલ સેટરડે અંતર્ગત શાળામાં બાળકોનો સર્વાંગી વિકાસના હેતુથી જમવાનો કાર્યક્રમ કરવામાં આવ્યો હતો. આ કાર્યક્રમમાં બાળકોએ જાતે રીંગણાંનો ઓળો તેમજ બાજરીના રોટલા હાથે બનાવી સમગ્ર શાળાના બાળકોને જમાડ્યા હતાબાળકોએ ઉત્સાહ સભર આ કાર્યક્રમમાં સુંદર અને સ્વાદિષ્ટ રસોઈ બનાવી હતી. આ શાળાના શિક્ષક સામત બેલાએ એક સુંદર વિડિયો બનાવ્યો હતો જે વિડિયો સોશિયલ મીડિયામાં ખૂબ વાયરલ થયો હતો.
શિક્ષણ મંત્રી પ્રફુલ પાનસરિયાએ જોયો વિડીયો અને પછી....
આ વીડિયોને ખુદ ગુજરાતના શિક્ષણ મંત્રી પ્રફુલ પાનસરિયાએ નિહાળી તાત્કાલિક આ શાળાના શિક્ષક સામત બેલનો નંબર મેળવી તેઓને વિડિયો કોલ કરી આ કાર્યક્રમની સરાહના કરી તેઓને અભિનંદન પાઠવી શાળાના શિક્ષકો તેમજ બાળકોનો ઉત્સાહ વધાર્યો હતો. શિક્ષણ મંત્રીએ શાળાના શિક્ષકોની સાથે તેમજ શાળાના બાળકોની સાથે પણ લાગણી આભાર સંવાદ કરી એક શ્રેષ્ઠ શિક્ષણ મંત્રીની છાપ છોડી હતી. શિક્ષકો તેમજ બાળકો સાથે વિડિયો કોલ મારફતે વાર્તાલાપ કર્યાંનો વિડિયો પણ સોશિયલ મીડિયામાં ખૂબ વાયરલ થયા બાદ સમગ્ર ગુજરાતમાં શિક્ષણ જગતમાં આ વિડિયો ભારે ચર્ચાનું કેન્દ્ર બન્યો હતો.
ગુજરાતમાં એક તરફ ખાનગી શાળાઓની મોહ વધી રહ્યો છે ત્યારે ગામડાઓમાં ખાનગી શાળાઓને ટક્કર મારતાં શાળાના શિક્ષકોએ સરકારી શાળાઓને શ્રેષ્ઠ બનાવી રહ્યા છે. છેલ્લા ઘણા સમયથી દ્વારકા જિલ્લામાં સરકારી શાળાઓની કામગીરી નોંધપાત્ર રહી છે. જિલ્લાના પ્રાથમિક શિક્ષણ અધિકારી એસ.જે ડુમરાણીયા દ્વારા જિલ્લા વિવિધ સરાહનીય કાર્યક્રમો સરકારી શાળાઓમાં શરૂ કરવામાં આવ્યા છે. જેમાં "જોયફુલ સેટરડે", "બાલદેવો ભવ:", "ભણતર સાથે ગણતર"સહ અભ્યાસિક પ્રવૃતિઓ સરકારી શાળાઓમાં શરૂ કરી ગામડાઓમાં શ્રેષ્ઠ શિક્ષણ આપવાનું ભગીરથ કામ શરૂ કર્યું છે.
સરકારી શાળાઓમાં બાળકોને શ્રેષ્ઠ શિક્ષણ ની સાથે સર્વાંગી વિકાસ થાય તેવા પ્રયાસો હાથ ધરવામાં આવી રહ્યા છે ત્યારે હરીપર જેવા નાના ગામમાં ધોરણ 1થી8 સુધી સુધી અહી ગામડાના બાળકો શિક્ષણ મેળવે છે. અહીં શાળાના શિક્ષકો પણ ખૂબ ઉત્સાહ સાથે બાળકોને વિવિધ શિક્ષકરમતો અંતર્ગત ઉત્સાહ પૂરો પાડી બાળકોનું શ્રેષ્ઠ ઘડતર કરી રહ્યા છે. હરિપર પ્રાથમિક શાળાના બાળકોનો રીંગણાંનો ઓળો અને રોટલા બનાવતા વિડિયો વાયરલ થયા બાદ આ મુદ્દો ખૂબ ચર્ચામાં રહ્યો ત્યારે આ શાળાની VTV ન્યૂઝની ટીમે મુલાકાત લઈ બાળકો અને શિક્ષકો સાથે ચર્ચા કરી હતી.
