સફળતા / સુરતમાં મોબાઈલના નામે દુકાનમાં ચાલતું ડુપ્લીકેટ ID કાર્ડ બનાવવાનું નેટવર્ક, સામે આવ્યું બાંગ્લાદેશ કનેક્શન, 5ની ધરપકડ

• સુરતમાં નકલી આધારકાર્ડ બનાવવાનું નેટવર્ક ઝડપાયું
• સુરત શહેર પોલીસ, SOG, LCBએ ઝડપ્યું નેટવર્ક
• આધારકાર્ડ, ચૂંટણીકાર્ડ, પાનકાર્ડ સહિતના ડુપ્લીકેટ ડોક્યુમેન્ટ બનાવતા હતા

આધારકાર્ડ એ સરકાર માન્ય આઇડીમા સૌથી મહત્વનું ગણવામા આવે છે. ડોક્યુમેન્ટને લગતા કોઈ પણ કામો હોય તે આધારકાર્ડ વગર અધૂરા જ રહે છે. ત્યારે  સુરતમાં ડુપ્લીકેટ આધારકાર્ડ બનાવવાનું મસમોટું નેટવર્ક ઝડપાતા તંત્ર દોડતું થયું છે, સુરતના પુણામાં નકલી આધારકાર્ડ બનાવવાનુ કૌભાંડ ઝડપાયુ છે. સુરત પોલીસ, SOG, LCBએ સહિયારું ઓપરેશન હાથ ધરીને સમગ્ર નેટવર્કનો પર્દાફાશ કર્યો છે.

બાંગ્લાદેશી નાગરીક ડુપ્લીકેટ આધારકાર્ડ બનાવતા ઝડપાયો
સુરત શહેર પોલીસ, એસઓજી, એલસીબીને નકલી આધારકાર્ડના નેટવર્ક મામલે બાતમી મળી હતી.. જેને લઈને પોલીસે રેડ પાડી હતી. આ દરમિયાન એ.કે. મોબાઈલ નામની દુકાનમાંથી બોગસ આધારકાર્ડ, ચૂંટનીકાર્ડ, પાનકાર્ડ સહિતના ડુપ્લીકેટ ડોક્યુમેન્ટ બનાવતા હોવાનું ઉઘાડું પડ્યું હતું. જેની તપાસમાં આરોપીઓ કૉમ્પ્યુટરમાં ફોટોશોપ સોફ્ટવેર મારફતે ડુપ્લીકેટ ડોક્યુમેન્ટ બનાવતા હતા.

તમામ દસ્તાવેજની ચકાસણી કરવામાં આવશે
સમગ્ર કૌભાંડને લઈને પોલીસના પણ પગ તળેથી જમીન સરકી ગઈ હતી. આથી પોલીસે ઊંડી તપાસ હાથ ધરીને 85 જેટલા ડુપ્લીકેટ ડોક્યુમેન્ટ જપ્ત  કર્યા છે. આ તમામ દસ્તાવેજની ચકાસણી કરવામાં આવશે. પ્રાથમિક તપાસમાં એક બાંગ્લાદેશી શખ્સ સહિત 5 આરોપી ડુપ્લીકેટ આધારકાર્ડ બનાવતા હતા. જેને ઝડપી લીધા છે.

તો ગાંધીનગર RTOમાં બોગસ ડ્રાઈવિંગ લાયસન્સ કૌભાંડ સામે  આવ્યું છે .જેમાં ગાંધીનગર આરટીઓના બે એજન્ટ દ્વારા કાશ્મીરી યુવકો સાથે મળીને ગાંધીનગરમાં આવેલા વિવિધ કેન્ટોન્મેન્ટના એડ્રેસ પર બોગસ ડોક્યુમેન્ટના આધારે છેલ્લાં ત્રણ વર્ષમાં એક હજારથી વધુ ડ્રાઈવિંગ લાયસન્સ બનાવવામાં આવ્યા હતા. ક્રાઇમ બ્રાંચની ટીમે સંતોષસિંહ ચૌહાણ અને ધવલ રાવત નામના બે એજન્ટની ધરપક કરી હતી. ક્રાઇમ બ્રાંચે બંન્ને એજન્ટો પાસેથી 288થી વધુ લાયસન્સ રિકવર કર્યા હતા, જ્યારે ઓટોમેટિક રબર સ્ટેમ્પ બનાવવાનું મશીન તેમજ અલગ અલગ વસ્તુઓ પણ મળી આવી હતી.