રેકેટ / ભારે કરી! ઝેરોક્ષની દુકાનમાં બહુચરાજીમાં ચાલતું ડુપ્લીકેટ સર્ટિફિકેટ કૌભાંડ, લોકો નોકરીએ પણ લાગી ગયા

• ગુજરાતમાં ફરી એકવાર ડુપ્લીકેટ સર્ટિફિકેટ કૌભાંડ 
• બહુચરાજી  ખાતે ઝેરોક્ષની દુકાનમાં ચાલતું હતું કૌભાંડ 
• નકલી માર્કશીટ બનાવવાનું કારસ્તાન, 2 ઇસમો ઝડપાયા 

બહુચરાજીમાં ઝેરોક્ષની દુકાનમાં ડુપ્લીકેટ સર્ટિફિકેટ કૌભાંડ સામે આવ્યું છે. વાત જાણે એમ છે કે, મહેસાણા જિલ્લાના પવિત્ર યાત્રાધામ બહુચરાજી માં ડુપ્લિકેટ માર્કશીટનું કૌભાંડ સામે આવતા હડકંપ મચી ગયો છે. વિગતો મુજબ બહુચરાજી ના એક કોમ્પલેક્ષમાં બે ઇસમો દુકાન કરી ઓરીજનલ માર્કશીટમાં છેડછાડ કરી ડુપ્લિકેટ માર્કશીટ બનાવતા હતા. જોકે આ અંગેની બાતમી મહેસાણા LCBને મળતા ટીમ દ્વારા સ્થળ પર રેડ કરી કાર્યવાહી કરી હતી. 

ગુજરાતમાં ફરી એકવાર ડુપ્લીકેટ સર્ટિફિકેટ કૌભાંડ સામે આવતા અનેક સવાલો ઊભા થયા છે. મહેસાણા જિલ્લાના બહુચરાજી થી આ કૌભાંડ સામે આવ્યું છે. વિગતો મુજબ વિજય ઝાલા અને કુલદીપ સોલંકી નામના ઇસમો આ કૌભાંડમાં સામેલ હતા. જેમાં તેઓએ બહુચરાજી ખાતે આદિત્ય કોમ્પલેક્ષમાં અંબિકા ઝેરોક્ષ નામની દુકાન કરી હતી. જેમાં ઇસમો ભેગા મળી પોતાના કોમ્પ્યૂટરમાં ધોરણ 10-12, ITI અને ડિપ્લોમાં સુધીની માર્કશીટો છેડછાડ કરી ડુપ્લિકેટ માર્કશીટ બનાવતા હતા. 

LCBને બાતમી મળી અને પછી..... 
આ તરફ સમગ્ર કાંડની બાતમી મહેસાણા LCBને મળી હતી. જેને લઈ મહેસાણા LCB PSI હરેશ જોશી સહિતની ટીમે સ્થળ પર પહોંચી તપાસ શરૂ કરી હતી. જેમાં ચોંકાવનારી માહિતી સામે આવી હતી. આ ઇસમો ઓરીજનલ માર્કશીટમાં સુધારો-વધારો કરી નાપાસ થયેલા વિદ્યાર્થીઓને આપતા હતા. તપાસ મુજબ આ યુવકોએ 2 માસમાં 50 વિદ્યાર્થીઓને નકલી માર્કશીટ બનાવી આપી હતી.

1500 રૂપિયામાં ડુપ્લિકેટ માર્કશીટ બનાવી 
પોલીસ તપાસ દરમિયાન અનેક ચોંકાવનારી વિગતો સામે આવી છે. જેમાં ઇસમોએ બે માસમાં 50 વિદ્યાર્થીઓને ધોરણ 10થી માંડી ITI સુધીની નકલી માર્કશીટ બનાવી આપી છે. આ સાથે ડુપ્લિકેટ માર્કશીટ બનાવવા માટે ઇસમો 1500 રૂપિયા ચાર્જ લેતા હતા.આ તરફ LCBની ટીમે બહુચરાજી  અંબિકા ઝેરોક્ષમાં કરેલ રેડમાં વિજય ઝાલા અને કુલદીપ સોલંકીને દબોચી લીધા હતા. 

ડુપ્લિકેટ માર્કશીટથી કેટલાય તો નોકરી પણ લાગી ગયા 
નોંધનીય છે કે, બહુચરાજી  પંથકમાં અનેક કંપનીઓ આવેલ છે. જ્યાં મોટી સંખ્યામાં યુવાનો નોકરી પણ કરે છે. જોકે આ કંપનીઓમાં પણ ITI-ડિપ્લોમા પાસ માંગતા હોય છે. જેથી આ ઇસમોએ અન્ય વ્યક્તિઓનો ઓરીજનલ માર્કશીટમાં છેડછાડ કરી ડુપ્લિકેટ માર્કશીટ તૈયાર કરી હતી. જેથી હવે આવી ડુપ્લિકેટ માર્કશીટના કારણે અનેક લોકો નોકરીએ લાગી ગયાનું પણ સામે આવ્યું છે. 

86,400નો મુદ્દામાલ જપ્ત કરાયો
મહેસાણા LCBની કાર્યવાહી દરમિયાન ટીમ દ્વારા માર્કશીટ કાઢવા હાઈ ગ્લોસી ફોટો પેપર નંગ 15 તેમજ કોમ્પ્યુટર સહિતના સાધનો મળી કુલ રૂ. 86,400નો મુદ્દામાલ કબ્જે કર્યો હતો. આ તરફ હવે આ કેસમાં LCBએ બંને ઇસમો સામે બહુચરાજી  પોલીસ સ્ટેશનમાં કલમ 465, 468, 471, 114 મુજબ ફરિયાડ નોંધાવી છે. 

સળગતા સવાલ 

• વિદ્યાર્થીઓની મહેનત પર પાણી ફેરવનારાઓ કોણ પાઠ ભણાવશે?
• નોકરી મેળવવાની લાલચમાં યુવાઓ ક્યાં સુધી છેતરાતા રહેશે?
• નકલી માર્કશીટના નામે સાચા વિદ્યાર્થીઓના હકનું મારી ખાનારાને કોણ દંડશે?
• ડુપ્લીકેટ સર્ટીથી નોકરી મેળવવાની લાલચમાં વાલીઓ કેમ આવે છે?
• નકલી માર્કશીટના કૌભાંડના તાર ક્યાં સુધી છે તેની નિષ્પક્ષ તપાસ થશે?