વિકાસની મંથર ગતિ / ગોકળગાયની ગતિએ રાજકોટના કે.કે.વી. બ્રિજનું કામકાજ ચાલતા લોકોને ભારે હાલાંકી, માત્ર નોટિસ ફટકારી મનપાએ સંતોષ માન્યો

• કે.કે.વી. બ્રિજના કામમાં ઢીલાશ
• રણજીત બિલ્ડકોનને મનપાની નોટિસ
• 15 જૂન સુધી તારીખ લંબાવતા નોટિસ

રાજકોટના કે.કે.વી. બ્રિજની ઢીલી કામગીરી મામલે મહાનગરપાલિકા એક્શનમાં આવી છે. મનપાએ બ્રિજના કામમાં ઢીલાશ મામલે રણજીત બિલ્ડકોનને નોટિસ ફટકારી છે. જોકે, રણજીત બિલ્ડકોન પર કોઈ પેનલ્ટી નહીં લગાવવામાં આવતા અનેક સવાલો ઉઠ્યા છે.

ધીમી ગતિએ ચાલી રહી છે કામગીરી
રાજકોટના કે.કે.વી ચોક પાસે મલ્ટીલેવલ બ્રિજની કામગીરી ચાલી રહી છે. આ કામ ખૂબ ધીમી ગતિએ ચાલી રહ્યું છે. લાંબા સમયથી દરરોજ હજારો વાહન ચાલકો હેરાન થઇ રહ્યા છે. કે.કે.વી બ્રિજના નિર્માણકાર્યથી ટ્રાફિકની સમસ્યા સર્જાઈ રહી છે. મહાનગરપાલિકા દ્વારા અપાયેલી મુદ્દતમાં કામ પૂર્ણ થયું નથી. 

નવી-નવી મુદ્દતે પણ પૂર્ણ નથી થયું કામ 
આ બ્રિજનું કામ નવી નવી મુદ્દતે પણ પૂર્ણ થયું નથી. સૌથી પહેલા બ્રિજ બનાવનાર એજન્સીને જાન્યુઆરી 2023નો સમય આપવામાં આવ્યો હતો. જે બાદ મુદ્દત માર્ચ મહિના સુધી વધારાઈ હતી. જોકે, માર્ચ મહિનામાં મુદ્દત એપ્રલ સુધી વધારાવામાં આવી હતી. 

રણજીત બિલ્ડકોનને અપાઈ નોટિસ
મલ્ટીલેવલ બ્રિજનું કામ ખુબ ધીમી ગતિએ ચાલી રહ્યું હોવાથી મ્યુનિસિપલ કમિશનર આનંદ પટેલે આ બ્રિજ પ્રોજેક્ટનો રિવ્યુ કર્યો છે. ઇજનેરોની હાજરીમાં કોન્ટ્રાક્ટર કંપની રણજીત બિલ્ડકોનના પ્રતિનિધિઓ સાથે મિટિંગ કરીને નોટિસ આપવામાં આવી છે. સાથે જ બ્રિજ કામગીરીની મુદ્દત 15 જૂન સુધી વધારાઈ છે. હવે 15 જૂન સુધી રણજીત બિલ્ડકોને બ્રિજ કરવો પડશે તૈયાર છે.

રણજીત બિલ્ડકોન પર રહેમ નજર કેમ?
કે.કે.વી. બ્રિજની ઢીલી કામગીરી મામલે મનપાએ માત્ર નોટિસ આપીને સંતોષ માન્યો છે. કે.કે.વી બ્રિજ માટે મનપાએ કોન્ટ્રાક્ટરને અત્યાર સુધી 25 નોટિસ ફટાકારી છે. રણજીત બિલ્ડકોનના ઢીલા કામ મુદ્દે મનપાએ પેનલ્ટી કેમ ન લીધી એ એક સવાલ છે.

સળગતા સવાલ
- રાજકોટ મનપા રણજીત બિલ્ડકોન વિરુદ્ધ કાર્યવાહી કેમ નથી કરતું?
- રણજીત બિલ્ડકોનને વારંવાર મુદતમાં વધારો કેમ આપવામાં આવે છે?
- શું મનપાના અધિકારીઓ જ રણજીત બિલ્ડકોનને છાવરે છે?
- બ્રિજ બનાવવા માટે 3-3 વખત મુદત કેમ વધારવામાં આવે છે?
- બ્રિજની ધીમી કામગીરીથી થતો ટ્રાફિકજામ મનપાના સત્તાધીશોને કેમ નથી દેખાતો?
- રણજીત બિલ્ડકોનને બ્લેક લિસ્ટ કરવા જેવી કામગીરી કેમ નથી થતી?